Read Roman Urdu Geo 2-salātīn 22 Bible Online

2-salātīn 22 - Roman Urdu Geo bible

2-salātīn 22

¹yūsiyāh 8 sāl kī umr meṅ bādshāh banā, aur yarūshalam meṅ rah kar us kī hukūmat kā daurāniyā 31 sāl thā. us kī māṅ yadīdā bint adāyāh busqat kī rahne wālī thī.

²yūsiyāh wuh kuchh kartā rahā jo rab ko pasand thā. wuh har bāt meṅ apne bāp dāūd ke achchhe namūne par chaltā rahā aur us se na dāīṅ, na bāīṅ taraf haṭā.

³apnī hukūmat ke 18weṅ sāl meṅ yūsiyāh bādshāh ne apne mīrmunshī sāfan bin asaliyāh bin masullām ko rab ke ghar ke pās bhej kar kahā,

⁴“imām-e-āzam ḳhilqiyāh ke pās jā kar use batā denā ki un tamām paisoṅ ko gin leṅ jo darbānoṅ ne logoṅ se jamā kie haiṅ.

⁵phir paise un ṭhekedāroṅ ko de deṅ jo rab ke ghar kī marammat karwā rahe haiṅ tāki wuh kārīgaroṅ, tāmīr karne wāloṅ aur rājoṅ kī ujrat adā kar sakeṅ. in paisoṅ se wuh darāṛoṅ ko ṭhīk karne ke lie darkār lakaṛī aur tarāshe hue patthar bhī ḳharīdeṅ.

⁷ṭhekedāroṅ ko aḳhrājāt kā hisāb-kitāb dene kī zarūrat nahīṅ hai, kyūṅki wuh qābil-e-etimād haiṅ.”

⁸jab mīrmunshī sāfan ḳhilqiyāh ke pās pahuṅchā to imām-e-āzam ne use ek kitāb dikhā kar kahā, “mujhe rab ke ghar meṅ sharīat kī kitāb milī hai.” us ne use sāfan ko de diyā jis ne use paṛh liyā.

⁹tab sāfan bādshāh ke pās gayā aur use ittilā dī, “ham ne rab ke ghar meṅ jamāshudā paise marammat par muqarrar ṭhekedāroṅ aur bāqī kām karne wāloṅ ko de die haiṅ.”

¹⁰phir sāfan ne bādshāh ko batāyā, “ḳhilqiyāh ne mujhe ek kitāb dī hai.” kitāb ko khol kar wuh bādshāh kī maujūdagī meṅ us kī tilāwat karne lagā.

¹¹kitāb kī bāteṅ sun kar bādshāh ne ranjīdā ho kar apne kapṛe phāṛ lie.

¹²us ne ḳhilqiyāh imām, aḳhīqām bin sāfan, akbor bin mīkāyāh, mīrmunshī sāfan aur apne ḳhās ḳhādim asāyāh ko bulā kar unheṅ hukm diyā,

¹³“jā kar merī aur qaum balki tamām yahūdāh kī ḳhātir rab se is kitāb meṅ darj bātoṅ ke bāre meṅ daryāft kareṅ. rab kā jo ġhazab ham par nāzil hone wālā hai wuh nihāyat saḳht hai, kyūṅki hamāre bāpdādā na kitāb ke farmānoṅ ke tābe rahe, na un hidāyāt ke mutābiq zindagī guzārī hai jo us meṅ hamāre lie darj kī gaī haiṅ.”

¹⁴chunāṅche ḳhilqiyāh imām, aḳhīqām, akbor, sāfan aur asāyāh ḳhuldā nabiyā ko milne gae. ḳhuldā kā shauhar sallūm bin tiqwā bin ḳharḳhas rab ke ghar ke kapṛe saṅbhāltā thā. wuh yarūshalam ke nae ilāqe meṅ rahte the.

¹⁵ḳhuldā ne unheṅ jawāb diyā, “rab isrāīl kā ḳhudā farmātā hai ki jis ādmī ne tumheṅ bhejā hai use batā denā, ‘rab farmātā hai ki maiṅ is shahr aur us ke bāshindoṅ par āfat nāzil karūṅga. wuh tamām bāteṅ pūrī ho jāeṅgī jo yahūdāh ke bādshāh ne kitāb meṅ paṛhī haiṅ.

¹⁷kyūṅki merī qaum ne mujhe tark karke dīgar mābūdoṅ ko qurbāniyāṅ pesh kī haiṅ aur apne hāthoṅ se but banā kar mujhe taish dilāyā hai. merā ġhazab is maqām par nāzil ho jāegā aur kabhī ḳhatm nahīṅ hogā.’

¹⁸lekin yahūdāh ke bādshāh ke pās jāeṅ jis ne āp ko rab se daryāft karne ke lie bhejā hai aur use batā deṅ ki rab isrāīl kā ḳhudā farmātā hai, ‘merī bāteṅ sun kar

¹⁹terā dil narm ho gayā hai. jab tujhe patā chalā ki maiṅ ne is maqām aur is ke bāshindoṅ ke bāre meṅ farmāyā hai ki wuh lānatī aur tabāh ho jāeṅge to tū ne apne āp ko rab ke sāmne past kar diyā. tū ne ranjīdā ho kar apne kapṛe phāṛ lie aur mere huzūr phūṭ phūṭ kar royā. rab farmātā hai ki yih dekh kar maiṅ ne terī sunī hai.

²⁰jab tū mere kahne par mar kar apne bāpdādā se jā milegā to salāmatī se dafn hogā. jo āfat maiṅ shahr par nāzil karūṅga wuh tū ḳhud nahīṅ dekhegā’.” afsar bādshāh ke pās wāpas gae aur use ḳhuldā kā jawāb sunā diyā.