Read Roman Urdu Geo 2-salātīn 23 Bible Online

2-salātīn 23 - Roman Urdu Geo bible

2-salātīn 23

¹tab bādshāh yahūdāh aur yarūshalam ke tamām buzurgoṅ ko bulā kar

²rab ke ghar meṅ gayā. sab log chhoṭe se le kar baṛe tak us ke sāth gae yānī yahūdāh ke ādmī, yarūshalam ke bāshinde, imām aur nabī. wahāṅ pahuṅch kar jamā'at ke sāmne ahd kī us pūrī kitāb kī tilāwat kī gaī jo rab ke ghar meṅ milī thī.

³phir bādshāh ne satūn ke pās khaṛe ho kar rab ke huzūr ahd bāndhā aur wādā kiyā, “ham rab kī pairawī kareṅge, ham pūre dil-o-jān se us ke ahkām aur hidāyāt pūrī karke is kitāb meṅ darj ahd kī bāteṅ qāim rakheṅge.” pūrī qaum ahd meṅ sharīk huī.

⁴ab bādshāh ne imām-e-āzam ḳhilqiyāh, dūsre darje par muqarrar imāmoṅ aur darbānoṅ ko hukm diyā, “rab ke ghar meṅ se wuh tamām chīzeṅ nikāl deṅ jo bāl dewatā, yasīrat dewī aur āsmān ke pūre lashkar kī pūjā ke lie istemāl huī haiṅ.” phir us ne yih sārā sāmān yarūshalam ke bāhar wādī-e-qidron ke khule maidān meṅ jalā diyā aur us kī rākh uṭhā kar bait-el le gayā.

⁵us ne un butparast pujāriyoṅ ko bhī haṭā diyā jinheṅ yahūdāh ke bādshāhoṅ ne yahūdāh ke shahroṅ aur yarūshalam ke gird-o-nawāh ke mandiroṅ meṅ qurbāniyāṅ pesh karne ke lie muqarrar kiyā thā. yih pujārī na sirf bāl dewatā ko apne nazarāne pesh karte the balki sūraj, chāṅd, jhurmaṭoṅ aur āsmān ke pūre lashkar ko bhī.

⁶yasīrat dewī kā khambā yūsiyāh ne rab ke ghar se nikāl kar shahr ke bāhar wādī-e-qidron meṅ jalā diyā. phir us ne use pīs kar us kī rākh ġharīb logoṅ kī qabroṅ par bikher dī.

⁷rab ke ghar ke pās aise makān the jo jismfarosh mardoṅ aur auratoṅ ke lie banāe gae the. un meṅ aurateṅ yasīrat dewī ke lie kapṛe bhī buntī thīṅ. ab bādshāh ne un ko bhī girā diyā.

⁸phir yūsiyāh tamām imāmoṅ ko yarūshalam wāpas lāyā. sāth sāth us ne yahūdāh ke shimāl meṅ jibā se le kar junūb meṅ bair-sabā tak ūṅchī jaghoṅ ke un tamām mandiroṅ kī behurmatī kī jahāṅ imām pahle qurbāniyāṅ pesh karte the. yarūshalam ke us darwāze ke pās bhī do mandir the jo shahr ke sardār yashūa ke nām se mashhūr thā. in ko bhī yūsiyāh ne ḍhā diyā. (shahr meṅ dāḳhil hote waqt yih mandir bāīṅ taraf nazar āte the.)

⁹jin imāmoṅ ne ūṅchī jaghoṅ par ḳhidmat kī thī unheṅ yarūshalam meṅ rab ke huzūr qurbāniyāṅ pesh karne kī ijāzat nahīṅ thī. lekin wuh bāqī imāmoṅ kī tarah beḳhamīrī roṭī ke lie maḳhsūs roṭī khā sakte the.

¹⁰bin-hinnūm kī wādī kī qurbāngāh banām tūfat ko bhī bādshāh ne ḍhā diyā tāki āindā koī bhī apne beṭe yā beṭī ko jalā kar malik dewatā ko qurbān na kar sake.

¹¹ghoṛe ke jo mujassame yahūdāh ke bādshāhoṅ ne sūraj dewatā kī tāzīm meṅ khaṛe kie the unheṅ bhī yūsiyāh ne girā diyā aur un ke rathoṅ ko jalā diyā. yih ghoṛe rab ke ghar ke sahan meṅ darwāze ke sāth khaṛe the, wahāṅ jahāṅ darbārī afsar banām nātan-malik kā kamrā thā.

¹²āḳhaz bādshāh ne apnī chhat par ek kamrā banāyā thā jis kī chhat par bhī muḳhtalif bādshāhoṅ kī banī huī qurbāngāheṅ thīṅ. ab yūsiyāh ne in ko bhī ḍhā diyā aur un do qurbāngāhoṅ ko bhī jo manassī ne rab ke ghar ke do sahnoṅ meṅ khaṛī kī thīṅ. in ko ṭukṛe ṭukṛe karke us ne malbā wādī-e-qidron meṅ phaiṅk diyā.

¹³nīz, bādshāh ne yarūshalam ke mashriq meṅ ūṅchī jaghoṅ ke mandiroṅ kī behurmatī kī. yih mandir halākat ke pahāṛ ke junūb meṅ the, aur sulaimān bādshāh ne unheṅ tāmīr kiyā thā. us ne unheṅ saidā kī sharmnāk dewī astārāt, moāb ke makrūh dewatā kamos aur ammon ke qābil-e-ghin dewatā milkūm ke lie banāyā thā.

¹⁴yūsiyāh ne dewatāoṅ ke lie maḳhsūs kie gae satūnoṅ ko ṭukṛe ṭukṛe karke yasīrat dewī ke khambe kaṭwā die aur maqāmāt par insānī haḍḍiyāṅ bikher kar un kī behurmatī kī.

¹⁵bait-el meṅ ab tak ūṅchī jagah par wuh mandir aur qurbāngāh paṛī thī jo yarubiām bin nabāt ne tāmīr kī thī. yarubiām hī ne isrāīl ko gunāh karne par uksāyā thā. jab yūsiyāh ne dekhā ki jis pahāṛ par qurbāngāh hai us kī ḍhalānoṅ par bahut sī qabreṅ haiṅ to us ne hukm diyā ki un kī haḍḍiyāṅ nikāl kar qurbāngāh par jalā dī jāeṅ. yūṅ qurbāngāh kī behurmatī bilkul usī tarah huī jis tarah rab ne mard-e-ḳhudā kī mārifat farmāyā thā. is ke bād yūsiyāh ne mandir aur qurbāngāh ko girā diyā. us ne yasīrat dewī kā mujassamā kūṭ kūṭ kar āḳhir meṅ sab kuchh jalā diyā.

¹⁶

¹⁷phir yūsiyāh ko ek aur qabr nazar āī. us ne shahr ke bāshindoṅ se pūchhā, “yih kis kī qabr hai?” unhoṅ ne jawāb diyā, “yih yahūdāh ke us mard-e-ḳhudā kī qabr hai jis ne bait-el kī qurbāngāh ke bāre meṅ ain wuh peshgoī kī thī jo āj āp ke wasīle se pūrī huī hai.”

¹⁸yih sun kar bādshāh ne hukm diyā, “ise chhoṛ do! koī bhī is kī haḍḍiyoṅ ko na chheṛe.” chunāṅche us kī aur us nabī kī haḍḍiyāṅ bach gaīṅ jo sāmariyya se us se milne āyā aur bād meṅ us kī qabr meṅ dafnāyā gayā thā.

¹⁹jis tarah yūsiyāh ne bait-el ke mandir ko tabāh kiyā usī tarah us ne sāmariyya ke tamām shahroṅ ke mandiroṅ ke sāth kiyā. unheṅ ūṅchī jaghoṅ par banā kar isrāīl ke bādshāhoṅ ne rab ko taish dilāyā thā.

²⁰in mandiroṅ ke pujāriyoṅ ko us ne un kī apnī apnī qurbāngāhoṅ par sazā-e-maut dī aur phir insānī haḍḍiyāṅ un par jalā kar un kī behurmatī kī. is ke bād wuh yarūshalam lauṭ gayā.

²¹yarūshalam meṅ ā kar bādshāh ne hukm diyā, “pūrī qaum rab apne ḳhudā kī tāzīm meṅ fasah kī īd manāe, jis tarah ahd kī kitāb meṅ farmāyā gayā hai.”

²²us zamāne se le kar jab qāzī isrāīl kī rāhnumāī karte the yūsiyāh ke dinoṅ tak fasah kī īd is tarah nahīṅ manāī gaī thī. isrāīl aur yahūdāh ke bādshāhoṅ ke ayyām meṅ bhī aisī īd nahīṅ manāī gaī thī.

²³yūsiyāh kī hukūmat ke 18weṅ sāl meṅ pahlī dafā rab kī tāzīm meṅ aisī īd yarūshalam meṅ manāī gaī.

²⁴yūsiyāh un tamām hidāyāt ke tābe rahā jo sharīat kī us kitāb meṅ darj thīṅ jo ḳhilqiyāh imām ko rab ke ghar meṅ milī thī. chunāṅche us ne murdoṅ kī rūhoṅ se rābitā karne wāloṅ, rammāloṅ, gharelū butoṅ, dūsre butoṅ aur bāqī tamām makrūh chīzoṅ ko ḳhatm kar diyā.

²⁵na yūsiyāh se pahle, na us ke bād us jaisā koī bādshāh huā jis ne us tarah pūre dil, pūrī jān aur pūrī tāqat ke sāth rab ke pās wāpas ā kar mūswī sharīat ke har farmān ke mutābiq zindagī guzārī ho.

²⁶to bhī rab yahūdāh par apne ġhusse se bāz na āyā, kyūṅki manassī ne apnī ġhalat harkatoṅ se use had se zyādā taish dilāyā thā.

²⁷isī lie rab ne farmāyā, “jo kuchh maiṅ ne isrāīl ke sāth kiyā wuhī kuchh yahūdāh ke sāth bhī karūṅga. maiṅ use apne huzūr se ḳhārij kar dūṅgā. apne chune hue shahr yarūshalam ko maiṅ radd karūṅga aur sāth sāth us ghar ko bhī jis ke bāre meṅ maiṅ ne kahā, ‘wahāṅ merā nām hogā’.”

²⁸bāqī jo kuchh yūsiyāh kī hukūmat ke daurān huā aur jo kuchh us ne kiyā wuh ‘shāhān-e-yahūdāh kī tārīḳh’ kī kitāb meṅ bayān kiyā gayā hai.

²⁹yūsiyāh kī hukūmat ke daurān misr kā bādshāh nikoh fir'aun daryā-e-furāt ke lie rawānā huā tāki asūr ke bādshāh se laṛe. rāste meṅ yūsiyāh us se laṛne ke lie niklā. lekin jab majiddo ke qarīb un kā ek dūsre ke sāth muqābalā huā to nikoh ne use mār diyā.

³⁰yūsiyāh ke mulāzim us kī lāsh rath par rakh kar majiddo se yarūshalam le āe jahāṅ use us kī apnī qabr meṅ dafn kiyā gayā. phir ummat ne us ke beṭe yahūāḳhaz ko masah karke bāp ke taḳht par biṭhā diyā.

³¹yahūāḳhaz 23 sāl kī umr meṅ bādshāh banā, aur yarūshalam meṅ us kī hukūmat kā daurāniyā tīn māh thā. us kī māṅ hamūtal bint yarmiyāh libnā kī rahne wālī thī.

³²apne bāpdādā kī tarah wuh bhī aisā kām kartā rahā jo rab ko nāpasand thā.

³³nikoh fir'aun ne mulk-e-hamāt ke shahr riblā meṅ use giriftār kar liyā, aur us kī hukūmat ḳhatm huī. mulk-e-yahūdāh ko ḳharāj ke taur par taqrīban 3,400 kilogrām chāṅdī aur 34 kilogrām sonā adā karnā paṛā.

³⁴yahūāḳhaz kī jagah fir'aun ne yūsiyāh ke ek aur beṭe ko taḳht par biṭhāyā. us ke nām iliyāqīm ko us ne yahūyaqīm meṅ badal diyā. yahūāḳhaz ko wuh apne sāth misr le gayā jahāṅ wuh bād meṅ marā bhī.

³⁵matlūbā chāṅdī aur sone kī raqm adā karne ke lie yahūyaqīm ne logoṅ se ḳhās ṭaiks liyā. ummat ko apnī daulat ke mutābiq paise dene paṛe. is tarīqe se yahūyaqīm fir'aun ko ḳharāj adā kar sakā.

³⁶yahūyaqīm 25 sāl kī umr meṅ bādshāh banā, aur wuh yarūshalam meṅ rah kar 11 sāl hukūmat kartā rahā. us kī māṅ zabūdā bint fidāyāh rūmāh kī rahne wālī thī.

³⁷bāpdādā kī tarah us kā chāl-chalan bhī rab ko nāpasand thā.