Read Roman Urdu Geo 2-salātīn 24 Bible Online

2-salātīn 24 - Roman Urdu Geo bible

2-salātīn 24

¹yahūyaqīm kī hukūmat ke daurān bābal ke bādshāh nabūkadnazzar ne yahūdāh par hamlā kiyā. natīje meṅ yahūyaqīm us ke tābe ho gayā. lekin tīn sāl ke bād wuh sarkash ho gayā.

²tab rab ne bābal, shām, moāb aur ammon se ḍākuoṅ ke jaththe bhej die tāki use tabāh kareṅ. waisā hī huā jis tarah rab ne apne ḳhādimoṅ yānī nabiyoṅ kī mārifat farmāyā thā.

³yih āfateṅ is lie yahūdāh par āīṅ ki rab ne in kā hukm diyā thā. wuh manassī ke sangīn gunāhoṅ kī wajah se yahūdāh ko apne huzūr se ḳhārij karnā chāhtā thā.

⁴wuh yih haqīqat bhī nazarandāz na kar sakā ki manassī ne yarūshalam ko bequsūr logoṅ ke ḳhūn se bhar diyā thā. rab yih muāf karne ke lie tayyār nahīṅ thā.

⁵bāqī jo kuchh yahūyaqīm kī hukūmat ke daurān huā aur jo kuchh us ne kiyā wuh ‘shāhān-e-yahūdāh kī tārīḳh’ kī kitāb meṅ darj hai.

⁶jab wuh mar kar apne bāpdādā se jā milā to us kā beṭā yahūyākīn taḳhtnashīn huā.

⁷us waqt misr kā bādshāh dubārā apne mulk se nikal na sakā, kyūṅki bābal ke bādshāh ne misr kī sarhad banām wādī-e-misr se le kar daryā-e-furāt tak kā sārā ilāqā misr ke qabze se chhīn liyā thā.

⁸yahūyākīn 18 sāl kī umr meṅ bādshāh banā, aur yarūshalam meṅ us kī hukūmat kā daurāniyā tīn māh thā. us kī māṅ nahushtā bint ilnātan yarūshalam kī rahne wālī thī.

⁹apne bāp kī tarah yahūyākīn bhī aisā kām kartā rahā jo rab ko nāpasand thā.

¹⁰us kī hukūmat ke daurān bābal ke bādshāh nabūkadnazzar kī fauj yarūshalam tak baṛh kar us kā muhāsarā karne lagī.

¹¹nabūkadnazzar ḳhud shahr ke muhāsare ke daurān pahuṅch gayā.

¹²tab yahūyākīn ne shikast mān kar apne āp ko apnī māṅ, mulāzimoṅ, afsaroṅ aur darbāriyoṅ samet bābal ke bādshāh ke hawāle kar diyā. bādshāh ne use giriftār kar liyā. yih nabūkadnazzar kī hukūmat ke āṭhweṅ sāl meṅ huā.

¹³jis kā elān rab ne pahle kiyā thā wuh ab pūrā huā, nabūkadnazzar ne rab ke ghar aur shāhī mahal ke tamām ḳhazāne chhīn lie. us ne sone kā wuh sārā sāmān bhī lūṭ liyā jo sulaimān ne rab ke ghar ke lie banwāyā thā.

¹⁴aur jitne khāte-pīte log yarūshalam meṅ the un sab ko bādshāh ne jilāwatan kar diyā. un meṅ tamām afsar, faujī, dastkār aur dhātoṅ kā kām karne wāle shāmil the, kul 10,000 afrād. ummat ke sirf ġharīb log pīchhe rah gae.

¹⁵nabūkadnazzar yahūyākīn ko bhī qaidī banā kar bābal le gayā aur us kī māṅ, bīwiyoṅ, darbāriyoṅ aur mulk ke tamām asar-o-rasūḳh rakhne wāloṅ ko bhī.

¹⁶us ne faujiyoṅ ke 7,000 afrād aur 1,000 dastkāroṅ aur dhātoṅ kā kām karne wāloṅ ko jilāwatan karke bābal meṅ basā diyā. yih sab māhir aur jang karne ke qābil ādmī the.

¹⁷yarūshalam meṅ bābal ke bādshāh ne yahūyākīn kī jagah us ke chachā mattaniyāh ko taḳht par biṭhā kar us kā nām sidqiyāh meṅ badal diyā.

¹⁸sidqiyāh 21 sāl kī umr meṅ bādshāh banā, aur yarūshalam meṅ us kī hukūmat kā daurāniyā 11 sāl thā. us kī māṅ hamūtal bint yarmiyāh libnā shahr kī rahne wālī thī.

¹⁹yahūyaqīm kī tarah sidqiyāh aisā kām kartā rahā jo rab ko nāpasand thā.

²⁰rab yarūshalam aur yahūdāh ke bāshindoṅ se itnā nārāz huā ki āḳhir meṅ us ne unheṅ apne huzūr se ḳhārij kar diyā. ek din sidqiyāh bābal ke bādshāh se sarkash huā,