Read Roman Urdu Geo 2-salātīn 25 Bible Online

2-salātīn 25 - Roman Urdu Geo bible

2-salātīn 25

¹is lie shāh-e-bābal nabūkadnazzar tamām fauj ko apne sāth le kar dubārā yarūshalam pahuṅchā tāki us par hamlā kare. sidqiyāh kī hukūmat ke naweṅ sāl meṅ bābal kī fauj yarūshalam kā muhāsarā karne lagī. yih kām dasweṅ mahīne ke dasweṅ din [4] shurū huā. pūre shahr ke irdgird bādshāh ne pushte banwāe.

²sidqiyāh kī hukūmat ke 11weṅ sāl tak yarūshalam qāim rahā.

³lekin phir kāl ne shahr meṅ zor pakaṛā, aur awām ke lie khāne kī chīzeṅ na rahīṅ. chauthe mahīne ke naweṅ din [5]

⁴bābal ke faujiyoṅ ne fasīl meṅ raḳhnā ḍāl diyā. usī rāt sidqiyāh apne tamām faujiyoṅ samet farār hone meṅ kāmyāb huā, agarche shahr dushman se ghirā huā thā. wuh fasīl ke us darwāze se nikle jo shāhī bāġh ke sāth mulhiq do dīwāroṅ ke bīch meṅ thā. wuh wādī-e-yardan kī taraf bhāgne lage,

⁵lekin bābal kī fauj ne bādshāh kā tāqqub karke use yarīhū ke maidān meṅ pakaṛ liyā. us ke faujī us se alag ho kar chāroṅ taraf muntashir ho gae.

⁶aur wuh ḳhud giriftār ho gayā. phir use riblā meṅ shāh-e-bābal ke pās lāyā gayā, aur wahīṅ sidqiyāh par faislā sādir kiyā gayā.

⁷sidqiyāh ke deḳhte deḳhte us ke beṭoṅ ko qatl kiyā gayā. is ke bād faujiyoṅ ne us kī āṅkheṅ nikāl kar use pītal kī zanjīroṅ meṅ jakaṛ liyā aur bābal le gae.

⁸shāh-e-bābal nabūkadnazzar kī hukūmat ke 19weṅ sāl meṅ bādshāh kā ḳhās afsar nabūzarādān yarūshalam pahuṅchā. wuh shāhī muhāfizoṅ par muqarrar thā. pāṅchweṅ mahīne ke sātweṅ din [6] us ne ā kar

⁹rab ke ghar, shāhī mahal aur yarūshalam ke tamām makānoṅ ko jalā diyā. har baṛī imārat bhasm ho gaī.

¹⁰us ne apne tamām faujiyoṅ se shahr kī fasīl ko bhī girā diyā.

¹¹phir nabūzarādān ne sab ko jilāwatan kar diyā jo yarūshalam aur yahūdāh meṅ pīchhe rah gae the. wuh bhī un meṅ shāmil the jo jang ke daurān ġhaddārī karke shāh-e-bābal ke pīchhe lag gae the.

¹²lekin nabūzarādān ne sab se nichle tabqe ke bāz logoṅ ko mulk-e-yahūdāh meṅ chhoṛ diyā tāki wuh angūr ke bāġhoṅ aur khetoṅ ko saṅbhāleṅ.

¹³bābal ke faujiyoṅ ne rab ke ghar meṅ jā kar pītal ke donoṅ satūnoṅ, pānī ke bāsanoṅ ko uṭhāne wālī hathgāṛiyoṅ aur samundar nāmī pītal ke hauz ko toṛ diyā aur sārā pītal uṭhā kar bābal le gae.

¹⁴wuh rab ke ghar kī ḳhidmat saranjām dene ke lie darkār sāmān bhī le gae yānī bālṭiyāṅ, belche, battī katarne ke auzār, bartan aur pītal kā bāqī sārā sāmān.

¹⁵ḳhālis sone aur chāṅdī ke bartan bhī is meṅ shāmil the yānī jalte hue koele ke bartan aur chhiṛkāo ke kaṭore. shāhī muhāfizoṅ kā afsar sārā sāmān uṭhā kar bābal le gayā.

¹⁶jab donoṅ satūnoṅ, samundar nāmī hauz aur bāsanoṅ ko uṭhāne wālī hathgāṛiyoṅ kā pītal tuṛwāyā gayā to wuh itnā waznī thā ki use tolā na jā sakā. sulaimān bādshāh ne yih chīzeṅ rab ke ghar ke lie banwāī thīṅ.

¹⁷har satūn kī ūṅchāī 27 fuṭ thī. un ke bālāī hissoṅ kī ūṅchāī sāṛhe chār fuṭ thī, aur wuh pītal kī jālī aur anāroṅ se saje hue the.

¹⁸shāhī muhāfizoṅ ke afsar nabūzarādān ne zail ke qaidiyoṅ ko alag kar diyā: imām-e-āzam sirāyāh, us ke bād āne wālā imām safaniyāh, rab ke ghar ke tīn darbānoṅ,

¹⁹shahr ke bache huoṅ meṅ se us afsar ko jo shahr ke faujiyoṅ par muqarrar thā, sidqiyāh bādshāh ke pāṅch mushīroṅ, ummat kī bhartī karne wāle afsar aur shahr meṅ maujūd us ke 60 mardoṅ ko.

²⁰nabūzarādān in sab ko alag karke sūbā hamāt ke shahr riblā le gayā jahāṅ bābal kā bādshāh thā.

²¹wahāṅ nabūkadnazzar ne unheṅ sazā-e-maut dī. yūṅ yahūdāh ke bāshindoṅ ko jilāwatan kar diyā gayā.

²²jin logoṅ ko bābal ke bādshāh nabūkadnazzar ne yahūdāh meṅ pīchhe chhoṛ diyā thā, un par us ne jidaliyāh bin aḳhīqām bin sāfan muqarrar kiyā.

²³jab fauj ke bache hue afsaroṅ aur un ke dastoṅ ko ḳhabar milī ki jidaliyāh ko gawarnar muqarrar kiyā gayā hai to wuh misfāh meṅ us ke pās āe. afsaroṅ ke nām ismāīl bin nataniyāh, yūhanān bin qarīh, sirāyāh bin tanhūmat natūfātī aur yāzaniyāh bin mākātī the. un ke faujī bhī sāth āe.

²⁴jidaliyāh ne qasam khā kar un se wādā kiyā, “bābal ke afsaroṅ se mat ḍarnā! mulk meṅ rah kar bābal ke bādshāh kī ḳhidmat kareṅ to āp kī salāmatī hogī.”

²⁵lekin us sāl ke sātweṅ mahīne meṅ ismāīl bin nataniyāh bin ilīsamā ne das sāthiyoṅ ke sāth misfāh ā kar dhoke se jidaliyāh ko qatl kiyā. ismāīl shāhī nasl kā thā. jidaliyāh ke ilāwā unhoṅ ne us ke sāth rahne wāle yahūdāh aur bābal ke tamām logoṅ ko bhī qatl kiyā.

²⁶yih dekh kar yahūdāh ke tamām bāshinde chhoṭe se le kar baṛe tak faujī afsaroṅ samet hijrat karke misr chale gae. kyūṅki wuh bābal ke intiqām se ḍarte the.

²⁷yahūdāh ke bādshāh yahūyākīn kī jilāwatanī ke 37weṅ sāl meṅ awīl-marūdak bābal kā bādshāh banā. usī sāl ke 12weṅ mahīne ke 27weṅ din us ne yahūyākīn ko qaidḳhāne se āzād kar diyā.

²⁸us ne us se narm bāteṅ karke use izzat kī aisī kursī par biṭhāyā jo bābal meṅ jilāwatan kie gae bāqī bādshāhoṅ kī nisbat zyādā aham thī.

²⁹yahūyākīn ko qaidiyoṅ ke kapṛe utārne kī ijāzat milī, aur use zindagī bhar bādshāh kī mez par bāqāidagī se sharīk hone kā sharf hāsil rahā.

³⁰bādshāh ne muqarrar kiyā ki yahūyākīn ko umr bhar itnā wazīfā miltā rahe ki us kī rozmarrā zarūriyāt pūrī hotī raheṅ.