Read Roman Urdu Geo 2-salātīn 4 Bible Online

2-salātīn 4 - Roman Urdu Geo bible

2-salātīn 4

¹ek din ek bewā ilīshā ke pās āī jis kā shauhar jab zindā thā nabiyoṅ ke guroh meṅ shāmil thā. bewā chīḳhtī chillātī ilīshā se muḳhātib huī, “āp jānte haiṅ ki merā shauhar jo āp kī ḳhidmat kartā thā allāh kā ḳhauf māntā thā. ab jab wuh faut ho gayā hai to us kā ek sāhūkār ā kar dhamkī de rahā hai ki agar qarz adā na kiyā gayā to maiṅ tere do beṭoṅ ko ġhulām banā kar le jāūṅgā.”

²ilīshā ne pūchhā, “maiṅ kis tarah āp kī madad karūṅ? batāeṅ, ghar meṅ āp ke pās kyā hai?” bewā ne jawāb diyā, “kuchh nahīṅ, sirf zaitūn ke tel kā chhoṭā sā bartan.”

³ilīshā bolā, “jāeṅ, apnī tamām paṛosanoṅ se ḳhālī bartan māṅgeṅ. lekin dhyān rakheṅ ki thoṛe bartan na hoṅ!

⁴phir apne beṭoṅ ke sāth ghar meṅ jā kar darwāze par kunḍī lagāeṅ. tel kā apnā bartan le kar tamām ḳhālī bartanoṅ meṅ tel unḍeltī jāeṅ. jab ek bhar jāe to use ek taraf rakh kar dūsre ko bharnā shurū kareṅ.”

⁵bewā ne jā kar aisā hī kiyā. wuh apne beṭoṅ ke sāth ghar meṅ gaī aur darwāze par kunḍī lagāī. beṭe use ḳhālī bartan dete gae aur māṅ un meṅ tel unḍeltī gaī.

⁶bartanoṅ meṅ tel ḍalte ḍalte sab labālab bhar gae. māṅ bolī, “mujhe ek aur bartan de do” to ek laṛke ne jawāb diyā, “aur koī nahīṅ hai.” tab tel kā silsilā ruk gayā.

⁷jab bewā ne mard-e-ḳhudā ke pās jā kar use ittilā dī to ilīshā ne kahā, “ab jā kar tel ko bech deṅ aur karze ke paise adā kareṅ. jo bach jāe use āp aur āp ke beṭe apnī zarūriyāt pūrī karne ke lie istemāl kar sakte haiṅ.”

⁸ek din ilīshā shūnīm gayā. wahāṅ ek amīr aurat rahtī thī jis ne zabardastī use apne ghar biṭhā kar khānā khilāyā. bād meṅ jab kabhī ilīshā wahāṅ se guzartā to wuh khāne ke lie us aurat ke ghar ṭhahar jātā.

⁹ek din aurat ne apne shauhar se bāt kī, “maiṅ ne jān liyā hai ki jo ādmī hamāre hāṅ ātā rahtā hai wuh allāh kā muqaddas paiġhambar hai.

¹⁰kyūṅ na ham us ke lie chhat par chhoṭā sā kamrā banā kar us meṅ chārpāī, mez, kursī aur shamādān rakheṅ. phir jab bhī wuh hamāre pās āe to wuh us meṅ ṭhahar saktā hai.”

¹¹ek din jab ilīshā āyā to wuh apne kamre meṅ jā kar bistar par leṭ gayā.

¹²us ne apne naukar jaihāzī se kahā, “shūnīmī mezbān ko bulā lāo.” jab wuh ā kar us ke sāmne khaṛī huī

¹³to ilīshā ne jaihāzī se kahā, “use batā denā ki āp ne hamāre lie bahut taqlīf uṭhāī hai. ab ham āp ke lie kyā kuchh kareṅ? kyā ham bādshāh yā fauj ke kamānḍar se bāt karke āp kī sifārish kareṅ?” aurat ne jawāb diyā, “nahīṅ, is kī zarūrat nahīṅ. maiṅ apne hī logoṅ ke darmiyān rahtī hūṅ.”

¹⁴bād meṅ ilīshā ne jaihāzī se bāt kī, “ham us ke lie kyā kareṅ?” jaihāzī ne jawāb diyā, “ek bāt to hai. us kā koī beṭā nahīṅ, aur us kā shauhar kāfī būṛhā hai.”

¹⁵ilīshā bolā, “use wāpas bulāo.” aurat wāpas ā kar darwāze meṅ khaṛī ho gaī. ilīshā ne us se kahā,

¹⁶“agle sāl isī waqt āp kā apnā beṭā āp kī god meṅ hogā.” shūnīmī aurat ne etirāz kiyā, “nahīṅ nahīṅ, mere āqā. mard-e-ḳhudā aisī bāteṅ karke apnī ḳhādimā ko jhūṭī tasallī mat deṅ.”

¹⁷lekin aisā hī huā. kuchh der ke bād aurat kā pāoṅ bhārī ho gayā, aur ain ek sāl ke bād us ke hāṅ beṭā paidā huā. sab kuchh waisā hī huā jaisā ilīshā ne kahā thā.

¹⁸bachchā parwān chaṛhā, aur ek din wuh ghar se nikal kar khet meṅ apne bāp ke pās gayā jo fasal kī kaṭāī karne wāloṅ ke sāth kām kar rahā thā.

¹⁹achānak laṛkā chīḳhne lagā, “hāy merā sar, hāy merā sar!” bāp ne kisī mulāzim ko batāyā, “laṛke ko uṭhā kar māṅ ke pās le jāo.”

²⁰naukar use uṭhā kar le gayā, aur wuh apnī māṅ kī god meṅ baiṭhā rahā. lekin dopahar ko wuh mar gayā.

²¹māṅ laṛke kī lāsh ko le kar chhat par chaṛh gaī. mard-e-ḳhudā ke kamre meṅ jā kar us ne use us ke bistar par liṭā diyā. phir darwāze ko band karke wuh bāhar niklī

²²aur apne shauhar ko bulwā kar kahā, “zarā ek naukar aur ek gadhī mere pās bhej deṅ. mujhe fauran mard-e-ḳhudā ke pās jānā hai. maiṅ jald hī wāpas ā jāūṅgī.”

²³shauhar ne hairān ho kar pūchhā, “āj us ke pās kyūṅ jānā hai? na to nae chāṅd kī īd hai, na sabat kā din.” bīwī ne kahā, “sab ḳhairiyat hai.”

²⁴gadhī par zīn kas kar us ne naukar ko hukm diyā, “gadhī ko tez chalā tāki ham jaldī pahuṅch jāeṅ. jab maiṅ kahūṅgī tab hī ruknā hai, warnā nahīṅ.”

²⁵chalte chalte wuh karmil pahāṛ ke pās pahuṅch gae jahāṅ mard-e-ḳhudā ilīshā thā. use dūr se dekh kar ilīshā jaihāzī se kahne lagā, “dekho, shūnīm kī aurat ā rahī hai!

²⁶bhāg kar us ke pās jāo aur pūchho ki kyā āp, āp kā shauhar aur bachchā ṭhīk haiṅ?” jaihāzī ne jā kar us kā hāl pūchhā to aurat ne jawāb diyā, “jī, sab ṭhīk hai.”

²⁷lekin jūṅ hī wuh pahāṛ ke pās pahuṅch gaī to ilīshā ke sāmne gir kar us ke pāoṅ se chimaṭ gaī. yih dekh kar jaihāzī use haṭāne ke lie qarīb āyā, lekin mard-e-ḳhudā bolā, “chhoṛ do! koī bāt ise bahut taqlīf de rahī hai, lekin rab ne wajah mujh se chhupāe rakhī hai. us ne mujhe is ke bāre meṅ kuchh nahīṅ batāyā.”

²⁸phir shūnīmī aurat bol uṭhī, “mere āqā, kyā maiṅ ne āp se beṭe kī darḳhwāst kī thī? kyā maiṅ ne nahīṅ kahā thā ki mujhe ġhalat ummīd na dilāeṅ?”

²⁹tab ilīshā ne naukar ko hukm diyā, “jaihāzī, safar ke lie kamarbastā ho kar merī lāṭhī ko le lo aur bhāg kar shūnīm pahuṅcho. agar rāste meṅ kisī se milo to use salām tak na karnā, aur agar koī salām kahe to use jawāb mat denā. jab wahāṅ pahuṅchoge to merī lāṭhī laṛke ke chehre par rakh denā.”

³⁰lekin māṅ ne etirāz kiyā, “rab kī aur āp kī hayāt kī qasam, āp ke baġhair maiṅ ghar wāpas nahīṅ jāūṅgī.” chunāṅche ilīshā bhī uṭhā aur aurat ke pīchhe pīchhe chal paṛā.

³¹jaihāzī bhāg bhāg kar un se pahle pahuṅch gayā aur lāṭhī ko laṛke ke chehre par rakh diyā. lekin kuchh na huā. na koī āwāz sunāī dī, na koī harkat huī. wuh ilīshā ke pās wāpas āyā aur bolā, “laṛkā abhī tak murdā hī hai.”

³²jab ilīshā pahuṅch gayā to laṛkā ab tak murdā hālat meṅ us ke bistar par paṛā thā.

³³wuh akelā hī andar gayā aur darwāze par kunḍī lagā kar rab se duā karne lagā.

³⁴phir wuh laṛke par leṭ gayā, yūṅ ki us kā muṅh bachche ke muṅh se, us kī āṅkheṅ bachche kī āṅkhoṅ se aur us ke hāth bachche ke hāthoṅ se lag gae. aur jūṅ hī wuh laṛke par jhuk gayā to us kā jism garm hone lagā.

³⁵ilīshā khaṛā huā aur ghar meṅ idhar udhar phirne lagā. phir wuh ek aur martabā laṛke par leṭ gayā. is dafā laṛke ne sāt bār chhīṅkeṅ mār kar apnī āṅkheṅ khol dīṅ.

³⁶ilīshā ne jaihāzī ko āwāz de kar kahā, “shūnīmī aurat ko bulā lāo.” wuh kamre meṅ dāḳhil huī to ilīshā bolā, “āeṅ, apne beṭe ko uṭhā kar le jāeṅ.”

³⁷wuh āī aur ilīshā ke sāmne aundhe muṅh jhuk gaī, phir apne beṭe ko uṭhā kar kamre se bāhar chalī gaī.

³⁸ilīshā jiljāl ko lauṭ āyā. un dinoṅ meṅ mulk kāl kī girift meṅ thā. ek din jab nabiyoṅ kā guroh us ke sāmne baiṭhā thā to us ne apne naukar ko hukm diyā, “baṛī deg le kar nabiyoṅ ke lie kuchh pakā lo.”

³⁹ek ādmī bāhar nikal kar khule maidān meṅ kaddū ḍhūṅḍne gayā. kahīṅ ek bel nazar āī jis par kaddū jaisī koī sabzī lagī thī. in kaddū'oṅ se apnī chādar bhar kar wuh wāpas āyā aur unheṅ kāṭ kāṭ kar deg meṅ ḍāl diyā, hālāṅki kisī ko bhī mālūm nahīṅ thā ki kyā chīz hai.

⁴⁰sālan pak kar nabiyoṅ meṅ taqsīm huā. lekin use chakhte hī wuh chīḳhne lage, “mard-e-ḳhudā, sālan meṅ zahr hai! ise khā kar bandā mar jāegā.” wuh use bilkul na khā sake.

⁴¹ilīshā ne hukm diyā, “mujhe kuchh maidā lā kar deṅ.” phir use deg meṅ ḍāl kar bolā, “ab ise logoṅ ko khilā deṅ.” ab khānā khāne ke qābil thā aur unheṅ nuqsān na pahuṅchā sakā.

⁴²ek aur mauqe par kisī ādmī ne bāl-salīsā se ā kar mard-e-ḳhudā ko naī fasal ke jau kī 20 roṭiyāṅ aur kuchh anāj de diyā. ilīshā ne jaihāzī ko hukm diyā, “ise logoṅ ko khilā do.”

⁴³jaihāzī hairān ho kar bolā, “yih kaise mumkin hai? yih to 100 ādmiyoṅ ke lie kāfī nahīṅ hai.” lekin ilīshā ne isrār kiyā, “ise logoṅ meṅ taqsīm kar do, kyūṅki rab farmātā hai ki wuh jī bhar kar khāeṅge balki kuchh bach bhī jāegā.”

⁴⁴aur aisā hī huā. jab naukar ne ādmiyoṅ meṅ khānā taqsīm kiyā to unhoṅ ne jī bhar kar khāyā, balki kuchh khānā bach bhī gayā. waisā hī huā jaisā rab ne farmāyā thā.