Read Roman Urdu Geo 2-salātīn 9 Bible Online

2-salātīn 9 - Roman Urdu Geo bible

2-salātīn 9

¹ek din ilīshā nabī ne nabiyoṅ ke guroh meṅ se ek ko bulā kar kahā, “safar ke lie kamarbastā ho kar rāmāt-jiliād ke lie rawānā ho jāeṅ. zaitūn ke tel kī yih kuppī apne sāth le jāeṅ.

²wahāṅ pahuṅch kar yāhū bin yahūsafat bin nimsī ko talāsh kareṅ. jab us se mulāqāt ho to use us ke sāthiyoṅ se alag karke kisī andarūnī kamre meṅ le jāeṅ.

³wahāṅ kuppī le kar yāhū ke sar par tel unḍel deṅ aur kaheṅ, ‘rab farmātā hai ki maiṅ tujhe tel se masah karke isrāīl kā bādshāh banā detā hūṅ.’ is ke bād der na kareṅ balki fauran darwāze ko khol kar bhāg jāeṅ!”

⁴chunāṅche jawān nabī rāmāt-jiliād ke lie rawānā huā.

⁵jab wahāṅ pahuṅchā to faujī afsar mil kar baiṭhe hue the. wuh un ke qarīb gayā aur bolā, “mere pās kamānḍar ke lie paiġhām hai.” yāhū ne sawāl kiyā, “ham meṅ se kis ke lie?” nabī ne jawāb diyā, “āp hī ke lie.”

⁶yāhū khaṛā huā aur us ke sāth ghar meṅ gayā. wahāṅ nabī ne yāhū ke sar par tel unḍel kar kahā, “rab isrāīl kā ḳhudā farmātā hai, ‘maiṅ ne tujhe masah karke apnī qaum kā bādshāh banā diyā hai.

⁷tujhe apne mālik aḳhiyab ke pūre ḳhāndān ko halāk karnā hai. yūṅ maiṅ un nabiyoṅ kā intiqām lūṅgā jo merī ḳhidmat karte hue shahīd ho gae haiṅ. hāṅ, maiṅ rab ke un tamām ḳhādimoṅ kā badlā lūṅgā jinheṅ īzabil ne qatl kiyā hai.

⁸aḳhiyab kā pūrā gharānā tabāh ho jāegā. maiṅ us ke ḳhāndān ke har mard ko halāk kar dūṅgā, ḳhwāh wuh bāliġh ho yā bachchā.

⁹merā aḳhiyab ke ḳhāndān ke sāth wuhī sulūk hogā jo maiṅ ne yarubiām bin nabāt aur bāshā bin aḳhiyāh ke ḳhāndānoṅ ke sāth kiyā.

¹⁰jahāṅ tak īzabil kā tālluq hai use dafnāyā nahīṅ jāegā balki kutte use yazrael kī zamīn par khā jāeṅge’.” yih kah kar nabī darwāzā khol kar bhāg gayā.

¹¹jab yāhū nikal kar apne sāthī afsaroṅ ke pās wāpas āyā to unhoṅ ne pūchhā, “kyā sab ḳhairiyat hai? yih dīwānā āp se kyā chāhtā thā?” yāhū bolā, “ḳhair, āp to is qism ke logoṅ ko jānte haiṅ ki kis tarah kī gappeṅ hāṅkte haiṅ.”

¹²lekin us ke sāthī is jawāb se mutma'in na hue, “jhūṭ! sahīh bāt batāeṅ.” phir yāhū ne unheṅ khul kar bāt batāī, “ādmī ne kahā, ‘rab farmātā hai ki maiṅ ne tujhe masah karke isrāīl kā bādshāh banā diyā hai’.”

¹³yih sun kar afsaroṅ ne jaldī jaldī apnī chādaroṅ ko utār kar us ke sāmne sīṛhiyoṅ par bichhā diyā. phir wuh narsingā bajā bajā kar nārā lagāne lage, “yāhū bādshāh zindābād!”

¹⁴yāhū bin yahūsafat bin nimsī fauran yūrām bādshāh ko taḳht se utārne ke mansūbe bāndhne lagā. yūrām us waqt pūrī isrāīlī fauj samet rāmāt-jiliād ke qarīb damishq ke bādshāh hazāel se laṛ rahā thā. lekin shahr kā difā karte karte

¹⁵bādshāh shām ke faujiyoṅ ke hāthoṅ zaḳhmī ho gayā thā aur maidān-e-jang ko chhoṛ kar yazrael wāpas āyā thā tāki zaḳhm bhar jāeṅ. ab yāhū ne apne sāthī afsaroṅ se kahā, “agar āp wāqaī mere sāth haiṅ to kisī ko bhī shahr se nikalne na deṅ, warnā ḳhatrā hai ki koī yazrael jā kar bādshāh ko ittilā de de.”

¹⁶phir wuh rath par sawār ho kar yazrael chalā gayā jahāṅ yūrām ārām kar rahā thā. us waqt yahūdāh kā bādshāh aḳhaziyāh bhī yūrām se milne ke lie yazrael āyā huā thā.

¹⁷jab yazrael ke burj par khaṛe pahredār ne yāhū ke ġhol ko shahr kī taraf āte hue dekhā to us ne bādshāh ko ittilā dī. yūrām ne hukm diyā, “ek ghuṛsawār ko un kī taraf bhej kar un se mālūm kareṅ ki sab ḳhairiyat hai yā nahīṅ.”

¹⁸ghuṛsawār shahr se niklā aur yāhū ke pās ā kar kahā, “bādshāh pūchhte haiṅ ki kyā sab ḳhairiyat hai?” yāhū ne jawāb diyā, “is se āp kā kyā wāstā? āeṅ, mere pīchhe ho leṅ.” burj par ke pahredār ne bādshāh ko ittilā dī, “qāsid un tak pahuṅch gayā hai, lekin wuh wāpas nahīṅ ā rahā.”

¹⁹tab bādshāh ne ek aur ghuṛsawār ko bhej diyā. yāhū ke pās pahuṅch kar us ne bhī kahā, “bādshāh pūchhte haiṅ ki kyā sab ḳhairiyat hai?” yāhū ne jawāb diyā, “is se āp kā kyā wāstā? mere pīchhe ho leṅ.”

²⁰burj par ke pahredār ne yih dekh kar bādshāh ko ittilā dī, “hamārā qāsid un tak pahuṅch gayā hai, lekin yih bhī wāpas nahīṅ ā rahā. aisā lagtā hai ki un kā rāhnumā yāhū bin nimsī hai, kyūṅki wuh apne rath ko dīwāne kī tarah chalā rahā hai.”

²¹yūrām ne hukm diyā, “mere rath ko tayyār karo!” phir wuh aur yahūdāh kā bādshāh apne apne rath meṅ sawār ho kar yāhū se milne ke lie shahr se nikle. un kī mulāqāt us bāġh ke pās huī jo nabot yazraelī se chhīn liyā gayā thā.

²²yāhū ko pahchān kar yūrām ne pūchhā, “yāhū, kyā sab ḳhairiyat hai?” yāhū bolā, “ḳhairiyat kaise ho saktī hai jab terī māṅ īzabil kī butparastī aur jādūgarī har taraf phailī huī hai?”

²³yūrām bādshāh chillā uṭhā, “ai aḳhaziyāh, ġhaddārī!” aur muṛ kar bhāgne lagā.

²⁴yāhū ne fauran apnī kamān khaiṅch kar tīr chalāyā jo sīdhā yūrām ke kandhoṅ ke darmiyān yūṅ lagā ki dil meṅ se guzar gayā. bādshāh ek dam apne rath meṅ gir paṛā.

²⁵yāhū ne apne sāth wāle afsar bidqar se kahā, “is kī lāsh uṭhā kar us bāġh meṅ phaiṅk deṅ jo nabot yazraelī se chhīn liyā gayā thā. kyūṅki wuh din yād kareṅ jab ham donoṅ apne rathoṅ ko is ke bāp aḳhiyab ke pīchhe chalā rahe the aur rab ne aḳhiyab ke bāre meṅ elān kiyā,

²⁶‘yaqīn jān ki kal nabot aur us ke beṭoṅ kā qatl mujh se chhupā na rahā. is kā muāwazā maiṅ tujhe nabot kī isī zamīn par dūṅgā.’ chunāṅche ab yūrām ko uṭhā kar us zamīn par phaiṅk deṅ tāki rab kī bāt pūrī ho jāe.”

²⁷jab yahūdāh ke bādshāh aḳhaziyāh ne yih dekhā to wuh bait-gān kā rāstā le kar farār ho gayā. yāhū us kā tāqqub karte hue chillāyā, “use bhī mār do!” iblīām ke qarīb jahāṅ rāstā jūr kī taraf chaṛhtā hai aḳhaziyāh apne rath meṅ chalte chalte zaḳhmī huā. wuh bach to niklā lekin majiddo pahuṅch kar mar gayā.

²⁸us ke mulāzim lāsh ko rath par rakh kar yarūshalam lāe. wahāṅ use yarūshalam ke us hisse meṅ jo ‘dāūd kā shahr’ kahlātā hai ḳhāndānī qabr meṅ dafnāyā gayā.

²⁹aḳhaziyāh yūrām bin aḳhiyab kī hukūmat ke 11weṅ sāl meṅ yahūdāh kā bādshāh ban gayā thā.

³⁰is ke bād yāhū yazrael chalā gayā. jab īzabil ko ittilā milī to us ne apnī āṅkhoṅ meṅ surmā lagā kar apne bāloṅ ko ḳhūbsūratī se saṅwārā aur phir khiṛkī se bāhar jhāṅkne lagī.

³¹jab yāhū mahal ke geṭ meṅ dāḳhil huā to īzabil chillāī, “ai zimrī jis ne apne mālik ko qatl kar diyā hai, kyā sab ḳhairiyat hai?”

³²yāhū ne ūpar dekh kar āwāz dī, “kaun mere sāth hai, kaun?” do yā tīn ḳhwājāsarāoṅ ne khiṛkī se bāhar dekh kar us par nazar ḍālī

³³to yāhū ne unheṅ hukm diyā, “use nīche phaiṅk do!” tab unhoṅ ne malikā ko nīche phaiṅk diyā. wuh itne zor se zamīn par girī ki ḳhūn ke chhīṅṭe dīwār aur ghoṛoṅ par paṛ gae. yāhū aur us ke logoṅ ne apne rathoṅ ko us ke ūpar se guzarne diyā.

³⁴phir yāhū mahal meṅ dāḳhil huā aur khāyā aur piyā. is ke bād us ne hukm diyā, “koī jāe aur us lānatī aurat ko dafn kare, kyūṅki wuh bādshāh kī beṭī thī.”

³⁵lekin jab mulāzim use dafn karne ke lie bāhar nikle to dekhā ki sirf us kī khopaṛī, hāth aur pāoṅ bāqī rah gae haiṅ.

³⁶yāhū ke pās wāpas jā kar unhoṅ ne use āgāh kiyā. tab us ne kahā, “ab sab kuchh pūrā huā hai jo rab ne apne ḳhādim ilyās tishbī kī mārifat farmāyā thā, ‘yazrael kī zamīn par kutte īzabil kī lāsh khā jāeṅge.

³⁷us kī lāsh yazrael kī zamīn par gobar kī tarah paṛī rahegī tāki koī yaqīn se na kah sake ki wuh kahāṅ hai’.”