Read Roman Urdu Geo 1-tawārīḳh 10 Bible Online

1-tawārīḳh 10 - Roman Urdu Geo bible

1-tawārīḳh 10

¹jilbūa ke pahāṛī silsile par filistiyoṅ aur isrāīliyoṅ ke darmiyān jang chhiṛ gaī. laṛte laṛte isrāīlī farār hone lage, lekin bahut log wahīṅ shahīd ho gae.

²phir filistī sāūl aur us ke beṭoṅ yūnatan, abīnadāb aur malkīshūa ke pās jā pahuṅche. tīnoṅ beṭe halāk ho gae.

³jabki laṛāī sāūl ke irdgird urūj tak pahuṅch gaī. phir wuh tīrandāzoṅ kā nishānā ban kar zaḳhmī ho gayā.

⁴us ne apne silāhbardār ko hukm diyā, “apnī talwār miyān se khaiṅch kar mujhe mār ḍāl! warnā yih nāmaḳhtūn mujhe be'izzat kareṅge.” lekin silāhbardār ne inkār kiyā, kyūṅki wuh bahut ḍarā huā thā. āḳhir meṅ sāūl apnī talwār le kar ḳhud us par gir gayā.

⁵jab silāhbardār ne dekhā ki merā mālik mar gayā hai to wuh bhī apnī talwār par gir kar mar gayā.

⁶yūṅ us din sāūl, us ke tīn beṭe aur us kā tamām gharānā halāk ho gae.

⁷jab maidān-e-yazrael ke isrāīliyoṅ ko ḳhabar milī ki isrāīlī fauj bhāg gaī aur sāūl apne beṭoṅ samet mārā gayā hai to wuh apne shahroṅ ko chhoṛ kar bhāg nikle, aur filistī chhoṛe hue shahroṅ par qabzā karke un meṅ basne lage.

⁸agle din filistī lāshoṅ ko lūṭne ke lie dubārā maidān-e-jang meṅ ā gae. jab unheṅ jilbūa ke pahāṛī silsile par sāūl aur us ke tīnoṅ beṭe murdā mile

⁹to unhoṅ ne sāūl kā sar kāṭ kar us kā zirābaktar utār liyā aur qāsidoṅ ko apne pūre mulk meṅ bhej kar apne butoṅ aur apnī qaum ko fath kī ittilā dī.

¹⁰sāūl kā zirābaktar unhoṅ ne apne dewatāoṅ ke mandir meṅ mahfūz kar liyā aur us ke sar ko dajūn dewatā ke mandir meṅ laṭkā diyā.

¹¹jab yabīs-jiliād ke bāshindoṅ ko ḳhabar milī ki filistiyoṅ ne sāūl kī lāsh ke sāth kyā kuchh kiyā hai

¹²to shahr ke tamām laṛne ke qābil ādmī bait-shān ke lie rawānā hue. wahāṅ pahuṅch kar wuh sāūl aur us ke beṭoṅ kī lāshoṅ ko utār kar yabīs le gae jahāṅ unhoṅ ne un kī haḍḍiyoṅ ko yabīs ke baṛe daraḳht ke sāy meṅ dafnāyā. unhoṅ ne rozā rakh kar pūre hafte tak un kā mātam kiyā.

¹³sāūl ko is lie mārā gayā ki wuh rab kā wafādār na rahā. us ne us kī hidāyāt par amal na kiyā, yahāṅ tak ki us ne murdoṅ kī rūh se rābitā karne wālī jādūgarnī se mashwarā kiyā,

¹⁴hālāṅki use rab se daryāft karnā chāhie thā. yihī wajah hai ki rab ne use sazā-e-maut de kar saltanat ko dāūd bin yassī ke hawāle kar diyā.