Read Roman Urdu Geo 1-tawārīḳh 12 Bible Online

1-tawārīḳh 12 - Roman Urdu Geo bible

1-tawārīḳh 12

¹zail ke ādmī siqlāj meṅ dāūd ke sāth mil gae. us waqt jab wuh sāūl bin qīs se chhupā rahtā thā. yih un faujiyoṅ meṅ se the jo jang meṅ dāūd ke sāth mil kar laṛte the

²aur behtarīn tīrandāz the, kyūṅki yih na sirf dahne balki bāeṅ hāth se bhī mahārat se tīr aur falāḳhan kā patthar chalā sakte the. in ādmiyoṅ meṅ se darj-e-zail binyamīn ke qabīle aur sāūl ke ḳhāndān se the.

³un kā rāhnumā aḳhīazar, phir yūās (donoṅ samā'āh jibiātī ke beṭe the), yazī'el aur falat (donoṅ azmāwat ke beṭe the), barākā, yāhū anatotī,

⁴ismāyāh jibaūnī jo dāūd ke 30 afsaroṅ kā ek sūrmā aur līḍar thā, yarmiyāh, yahzī'el, yūhanān, yūzabad jadīrātī,

⁵iliūzī, yarīmot, bāliyāh, samariyāh aur safatiyāh ḳharūfī.

⁶qorah ke ḳhāndān meṅ se ilqānā, yissiyāh, azarel, yūazar aur yasūbiām dāūd ke sāth the.

⁷in ke ilāwā yarohām jadūrī ke beṭe yūīlā aur zabadiyāh bhī the.

⁸jad ke qabīle se bhī kuchh bahādur aur tajribākār faujī sāūl se alag ho kar dāūd ke sāth mil gae jab wuh registān ke qile meṅ thā. yih mard mahārat se ḍhāl aur nezā istemāl kar sakte the. un ke chehre sherbabar ke chehroṅ kī mānind the, aur wuh pahāṛī ilāqe meṅ ġhazāloṅ kī tarah tez chal sakte the.

⁹un kā līḍar azar zail ke das ādmiyoṅ par muqarrar thā: abadiyāh, iliyāb,

¹⁰mismannā, yarmiyāh,

¹¹attī, ilī'el,

¹²yūhanān, ilzabad,

¹³yarmiyāh aur makbannī.

¹⁴jad ke yih mard sab ālā faujī afsar ban gae. un meṅ se sab se kamzor ādmī sau ām faujiyoṅ kā muqābalā kar saktā thā jabki sab se tāqatwar ādmī hazār kā muqābalā kar saktā thā.

¹⁵in hī ne bahār ke mausam meṅ daryā-e-yardan ko pār kiyā, jab wuh kināroṅ se bāhar ā gayā thā, aur mashriq aur maġhrib kī wādiyoṅ ko band kar rakhā.

¹⁶binyamīn aur yahūdāh ke qabīloṅ ke kuchh mard dāūd ke pahāṛī qile meṅ āe.

¹⁷dāūd bāhar nikal kar un se milne gayā aur pūchhā, “kyā āp salāmatī se mere pās āe haiṅ? kyā āp merī madad karnā chāhte haiṅ? agar aisā hai to maiṅ āp kā achchhā sāthī rahūṅgā. lekin agar āp mujhe dushmanoṅ ke hawāle karne ke lie āe haiṅ hālāṅki mujh se koī bhī zulm nahīṅ huā hai to hamāre bāpdādā kā ḳhudā ise dekh kar āp ko sazā de.”

¹⁸phir rūh-ul-quds 30 afsaroṅ ke rāhnumā amāsī par nāzil huā, aur us ne kahā, “ai dāūd, ham tere hī log haiṅ. ai yassī ke beṭe, ham tere sāth haiṅ. salāmatī, salāmatī tujhe hāsil ho, aur salāmatī unheṅ hāsil ho jo terī madad karte haiṅ. kyūṅki terā ḳhudā terī madad karegā.” yih sun kar dāūd ne unheṅ qabūl karke apne chhāpāmār dastoṅ par muqarrar kiyā.

¹⁹manassī ke qabīle ke kuchh mard bhī sāūl se alag ho kar dāūd ke pās āe. us waqt wuh filistiyoṅ ke sāth mil kar sāūl se laṛne jā rahā thā, lekin bād meṅ use maidān-e-jang meṅ āne kī ijāzat na milī. kyūṅki filistī sardāroṅ ne āpas meṅ mashwarā karne ke bād use yih kah kar wāpas bhej diyā ki ḳhatrā hai ki yih hameṅ maidān-e-jang meṅ chhoṛ kar apne purāne mālik sāūl se dubārā mil jāe. phir ham tabāh ho jāeṅge.

²⁰jab dāūd siqlāj wāpas jā rahā thā to manassī ke qabīle ke darj-e-zail afsar sāūl se alag ho kar us ke sāth ho lie: adnā, yūzabad, yadīael, mīkāel, yūzabad, ilīhū aur zillatī. manassī meṅ har ek ko hazār hazār faujiyoṅ par muqarrar kiyā gayā thā.

²¹unhoṅ ne lūṭne wāle amālīqī dastoṅ ko pakaṛne meṅ dāūd kī madad kī, kyūṅki wuh sab diler aur qābil faujī the. sab us kī fauj meṅ afsar ban gae.

²²roz-ba-roz log dāūd kī madad karne ke lie āte rahe, aur hote hote us kī fauj allāh kī fauj jaisī baṛī ho gaī.

²³darj-e-zail un tamām faujiyoṅ kī fahrist hai jo habrūn meṅ dāūd ke pās āe tāki use sāūl kī jagah bādshāh banāeṅ, jis tarah rab ne hukm diyā thā.

²⁴yahūdāh ke qabīle ke ḍhāl aur neze se les 6,800 mard the.

²⁵shamāūn ke qabīle ke 7,100 tajribākār faujī the.

²⁶lāwī ke qabīle ke 4,600 mard the.

²⁷un meṅ hārūn ke ḳhāndān kā sarparast yahoyadā bhī shāmil thā jis ke sāth 3,700 ādmī the.

²⁸sadoq nāmī ek diler aur jawān faujī bhī shāmil thā. us ke sāth us ke apne ḳhāndān ke 22 afsar the.

²⁹sāūl ke qabīle binyamīn ke bhī 3,000 mard the, lekin is qabīle ke aksar faujī ab tak sāūl ke ḳhāndān ke sāth lipṭe rahe.

³⁰ifrāīm ke qabīle ke 20,800 faujī the. sab apne ḳhāndānoṅ meṅ asar-o-rasūḳh rakhne wāle the.

³¹manassī ke ādhe qabīle ke 18,000 mard the. unheṅ dāūd ko bādshāh banāne ke lie chun liyā gayā thā.

³²ishkār ke qabīle ke 200 afsar apne dastoṅ ke sāth the. yih log waqt kī zarūrat samajh kar jānte the ki isrāīl ko kyā karnā hai.

³³zabūlūn ke qabīle ke 50,000 tajribākār faujī the. wuh har hathiyār se les aur pūrī wafādārī se dāūd ke lie laṛne ke lie tayyār the.

³⁴naftālī ke qabīle ke 1,000 afsar the. un ke taht ḍhāl aur neze se musallah 37,000 ādmī the.

³⁵dān ke qabīle ke 28,600 mard the jo sab laṛne ke lie musta'id the.

³⁶āshar ke qabīle ke 40,000 mard the jo sab laṛne ke lie tayyār the.

³⁷daryā-e-yardan ke mashriq meṅ ābād qabīloṅ rūbin, jad aur manassī ke ādhe hisse ke 1,20,000 mard the. har ek har qism ke hathiyār se les thā.

³⁸sab tartīb se habrūn āe tāki pūre azm ke sāth dāūd ko pūre isrāīl kā bādshāh banāeṅ. bāqī tamām isrāīlī bhī muttafiq the ki dāūd hamārā bādshāh ban jāe.

³⁹yih faujī tīn din tak dāūd ke pās rahe jis daurān un ke qabāilī bhāī unheṅ khāne-pīne kī chīzeṅ muhayyā karte rahe.

⁴⁰qarīb ke rahne wāloṅ ne bhī is meṅ un kī madad kī. ishkār, zabūlūn aur naftālī tak ke log apne gadhoṅ, ūṅṭoṅ, ḳhachcharoṅ aur bailoṅ par khāne kī chīzeṅ lād kar wahāṅ pahuṅche. maidā, anjīr aur kishmish kī ṭikkiyāṅ, mai, tel, bail aur bheṛ-bakriyāṅ baṛī miqdār meṅ habrūn lāī gaīṅ, kyūṅki tamām isrāīlī ḳhushī manā rahe the.