Read Roman Urdu Geo 1-tawārīḳh 16 Bible Online

1-tawārīḳh 16 - Roman Urdu Geo bible

1-tawārīḳh 16

¹allāh kā sandūq us tambū ke darmiyān meṅ rakhā gayā jo dāūd ne us ke lie lagwāyā thā. phir unhoṅ ne allāh ke huzūr bhasm hone wālī aur salāmatī kī qurbāniyāṅ pesh kīṅ.

²is ke bād dāūd ne qaum ko rab ke nām se barkat de kar

³har isrāīlī mard aur aurat ko ek roṭī, khajūr kī ek ṭikkī aur kishmish kī ek ṭikkī de dī.

⁴us ne kuchh lāwiyoṅ ko rab ke sandūq ke sāmne ḳhidmat karne kī zimmādārī dī. unheṅ rab isrāīl ke ḳhudā kī tamjīd aur hamd-o-sanā karnī thī.

⁵un kā sarbarāh āsaf jhāṅjh bajātā thā. us kā nāib zakariyāh thā. phir yaī'el, samīrāmot, yihī'el, mattitiyāh, iliyāb, bināyāh, obed-adom aur yaī'el the jo sitār aur sarod bajāte the.

⁶bināyāh aur yahzī'el imāmoṅ kī zimmādārī allāh ke ahd ke sandūq ke sāmne turam bajānā thī.

⁷us din dāūd ne pahlī dafā āsaf aur us ke sāthī lāwiyoṅ ke hawāle zail kā gīt karke unheṅ rab kī satāish karne kī zimmādārī dī.

⁸“rab kā shukr karo aur us kā nām pukāro! aqwām meṅ us ke kāmoṅ kā elān karo.

⁹sāz bajā kar us kī madahsarāī karo. us ke tamām ajāib ke bāre meṅ logoṅ ko batāo.

¹⁰us ke muqaddas nām par faḳhr karo. rab ke tālib dil se ḳhush hoṅ.

¹¹rab aur us kī qudrat kī daryāft karo, har waqt us ke chehre ke tālib raho.

¹²jo mojize us ne kie unheṅ yād karo. us ke ilāhī nishān aur us ke muṅh ke faisle dohrāte raho.

¹³tum jo us ke ḳhādim isrāīl kī aulād aur yāqūb ke farzand ho, jo us ke barguzīdā log ho, tumheṅ sab kuchh yād rahe!

¹⁴wuhī rab hamārā ḳhudā hai, wuhī pūrī duniyā kī adālat kartā hai.

¹⁵wuh hameshā apne ahd kā ḳhayāl rakhtā hai, us kalām kā jo us ne hazār pushtoṅ ke lie farmāyā thā.

¹⁶yih wuh ahd hai jo us ne ibrāhīm se bāndhā, wuh wādā jo us ne qasam khā kar is'hāq se kiyā thā.

¹⁷us ne use yāqūb ke lie qāim kiyā tāki wuh us ke mutābiq zindagī guzāre, us ne tasdīq kī ki yih merā isrāīl se abadī ahd hai.

¹⁸sāth sāth us ne farmāyā, ‘maiṅ tujhe mulk-e-kan'ān dūṅgā. yih terī mīrās kā hissā hogā.’

¹⁹us waqt wuh tādād meṅ kam aur thoṛe hī the balki mulk meṅ ajnabī hī the.

²⁰ab tak wuh muḳhtalif qaumoṅ aur saltanatoṅ meṅ ghūmte phirte the.

²¹lekin allāh ne un par kisī ko zulm karne na diyā, aur un kī ḳhātir us ne bādshāhoṅ ko ḍānṭā,

²²‘mere masah kie hue ḳhādimoṅ ko mat chheṛnā, mere nabiyoṅ ko nuqsān mat pahuṅchānā.’

²³ai pūrī duniyā, rab kī tamjīd meṅ gīt gā! roz-ba-roz us kī najāt kī ḳhushḳhabrī sunā.

²⁴qaumoṅ meṅ us kā jalāl aur tamām ummatoṅ meṅ us ke ajāib bayān karo.

²⁵kyūṅki rab azīm aur satāish ke bahut lāiq hai. wuh tamām mābūdoṅ se mahīb hai.

²⁶kyūṅki dīgar qaumoṅ ke tamām mābūd but hī haiṅ jabki rab ne āsmān ko banāyā.

²⁷us ke huzūr shān-o-shaukat, us kī sukūnatgāh meṅ qudrat aur jalāl hai.

²⁸ai qaumoṅ ke qabīlo, rab kī tamjīd karo, rab ke jalāl aur qudrat kī satāish karo.

²⁹rab ke nām ko jalāl do. qurbānī le kar us ke huzūr āo. muqaddas libās se ārāstā ho kar rab ko sijdā karo.

³⁰pūrī duniyā us ke sāmne laraz uṭhe. yaqīnan duniyā mazbūtī se qāim hai aur nahīṅ ḍagmagāegī.

³¹āsmān shādmān ho, aur zamīn jashn manāe. qaumoṅ meṅ kahā jāe ki rab bādshāh hai.

³²samundar aur jo kuchh us meṅ hai ḳhushī se garaj uṭhe, maidān aur jo kuchh us meṅ hai bāġh bāġh ho.

³³phir jangal ke daraḳht rab ke sāmne shādiyānā bajāeṅge, kyūṅki wuh ā rahā hai, wuh zamīn kī adālat karne ā rahā hai.

³⁴rab kā shukr karo, kyūṅki wuh bhalā hai, aur us kī shafqat abadī hai.

³⁵us se iltimās karo, ‘ai hamārī najāt ke ḳhudā, hameṅ bachā! hameṅ jamā karke dīgar qaumoṅ ke hāth se chhuṛā. tab hī ham tere muqaddas nām kī satāish kareṅge aur tere qābil-e-tārīf kāmoṅ par faḳhr kareṅge.’

³⁶azal se abad tak rab, isrāīl ke ḳhudā kī hamd ho!” tab pūrī qaum ne “āmīn” aur “rab kī hamd ho” kahā.

³⁷dāūd ne āsaf aur us ke sāthī lāwiyoṅ ko rab ke ahd ke sandūq ke sāmne chhoṛ kar kahā, “āindā yahāṅ bāqāidagī se rozānā kī zarūrī ḳhidmat karte jāeṅ.”

³⁸is guroh meṅ obed-adom aur mazīd 68 lāwī shāmil the. obed-adom bin yadūtūn aur hūsā darbān ban gae.

³⁹lekin sadoq imām aur us ke sāthī imāmoṅ ko dāūd ne rab kī us sukūnatgāh ke pās chhoṛ diyā jo jibaūn kī pahāṛī par thī.

⁴⁰kyūṅki lāzim thā ki wuh wahāṅ har subh aur shām ko bhasm hone wālī qurbāniyāṅ pesh kareṅ aur bāqī tamām hidāyāt par amal kareṅ jo rab kī taraf se isrāīl ke lie sharīat meṅ bayān kī gaī haiṅ.

⁴¹dāūd ne haimān, yadūtūn aur mazīd kuchh chīdā lāwiyoṅ ko bhī jibaūn meṅ un ke pās chhoṛ diyā. wahāṅ un kī ḳhās zimmādārī rab kī hamd-o-sanā karnā thī, kyūṅki us kī shafqat abadī hai.

⁴²un ke pās turam, jhāṅjh aur bāqī aise sāz the jo allāh kī tārīf meṅ gāe jāne wāle gītoṅ ke sāth bajāe jāte the. yadūtūn ke beṭoṅ ko darbān banāyā gayā.

⁴³jashn ke bād sab log apne apne ghar chale gae. dāūd bhī apne ghar lauṭā tāki apne ḳhāndān ko barkat de kar salām kare.