Read Roman Urdu Geo 1-tawārīḳh 18 Bible Online

1-tawārīḳh 18 - Roman Urdu Geo bible

1-tawārīḳh 18

¹phir aisā waqt āyā ki dāūd ne filistiyoṅ ko shikast de kar unheṅ apne tābe kar liyā aur jāt shahr par gird-o-nawāh kī ābādiyoṅ samet qabzā kar liyā.

²us ne moābiyoṅ par bhī fath pāī, aur wuh us ke tābe ho kar use ḳharāj dene lage.

³dāūd ne shimālī shām ke shahr zobāh ke bādshāh hadadazar ko bhī hamāt ke qarīb harā diyā jab hadadazar daryā-e-furāt par qābū pāne ke lie nikal āyā thā.

⁴dāūd ne 1,000 rathoṅ, 7,000 ghuṛsawāroṅ aur 20,000 piyādā sipāhiyoṅ ko giriftār kar liyā. rathoṅ ke 100 ghoṛoṅ ko us ne apne lie mahfūz rakhā jabki bāqiyoṅ kī us ne koṅcheṅ kāṭ dīṅ tāki wuh āindā jang ke lie istemāl na ho sakeṅ.

⁵jab damishq ke arāmī bāshinde zobāh ke bādshāh hadadazar kī madad karne āe to dāūd ne un ke 22,000 afrād halāk kar die.

⁶phir us ne damishq ke ilāqe meṅ apnī faujī chaukiyāṅ qāim kīṅ. arāmī us ke tābe ho gae aur use ḳharāj dete rahe. jahāṅ bhī dāūd gayā wahāṅ rab ne use kāmyābī baḳhshī.

⁷sone kī jo ḍhāleṅ hadadazar ke afsaroṅ ke pās thīṅ unheṅ dāūd yarūshalam le gayā.

⁸hadadazar ke do shahroṅ kūn aur tibḳhat se us ne kasrat kā pītal chhīn liyā. bād meṅ sulaimān ne yih pītal rab ke ghar meṅ ‘samundar’ nāmī pītal kā hauz, satūn aur pītal kā muḳhtalif sāmān banāne ke lie istemāl kiyā.

⁹jab hamāt ke bādshāh tūī ko ittilā milī ki dāūd ne zobāh ke bādshāh hadadazar kī pūrī fauj par fath pāī hai

¹⁰to us ne apne beṭe hadūrām ko dāūd ke pās bhejā tāki use salām kahe. hadūrām ne dāūd ko hadadazar par fath ke lie mubārakbād dī, kyūṅki hadadazar tūī kā dushman thā, aur un ke darmiyān jang rahī thī. hadūrām ne dāūd ko sone, chāṅdī aur pītal ke bahut se tohfe bhī pesh kie.

¹¹dāūd ne yih chīzeṅ rab ke lie maḳhsūs kar dīṅ. jahāṅ bhī wuh dūsrī qaumoṅ par ġhālib āyā wahāṅ kī sonā-chāṅdī us ne rab ke lie maḳhsūs kar dī. yūṅ adom, moāb, ammon, filistiyā aur amālīq kī sonā-chāṅdī rab ko pesh kī gaī.

¹²abīshai bin zarūyāh ne namak kī wādī meṅ adomiyoṅ par fath pā kar 18,000 afrād halāk kar die.

¹³us ne adom ke pūre mulk meṅ apnī faujī chaukiyāṅ qāim kīṅ, aur tamām adomī dāūd ke tābe ho gae. dāūd jahāṅ bhī jātā rab us kī madad karke use fath baḳhshtā.

¹⁴jitnī der dāūd pūre isrāīl par hukūmat kartā rahā utnī der tak us ne dhyān diyā ki qaum ke har ek shaḳhs ko insāf mil jāe.

¹⁵yoāb bin zarūyāh fauj par muqarrar thā. yahūsafat bin aḳhīlūd bādshāh kā mushīr-e-ḳhās thā.

¹⁶sadoq bin aḳhītūb aur abīmalik bin abiyātar imām the. shaushā mīrmunshī thā.

¹⁷bināyāh bin yahoyadā dāūd ke ḳhās daste banām karetī aur faletī kā kaptān muqarrar thā. dāūd ke beṭe ālā afsar the.