Read Roman Urdu Geo 1-tawārīḳh 26 Bible Online

1-tawārīḳh 26 - Roman Urdu Geo bible

1-tawārīḳh 26

¹rab ke ghar ke sahan ke darwāzoṅ par pahrādārī karne ke guroh bhī muqarrar kie gae. un meṅ zail ke ādmī shāmil the: qorah ke ḳhāndān kā fard masalamiyāh bin qore jo āsaf kī aulād meṅ se thā.

²masalamiyāh ke sāt beṭe baṛe se le kar chhoṭe tak zakariyāh, yadīael, zabadiyāh, yatnī'el,

³ailām, yūhanān aur ilīhūainī the.

⁴obed-adom bhī darbān thā. allāh ne use barkat de kar āṭh beṭe die the. baṛe se le kar chhoṭe tak un ke nām samāyāh, yahūzabad, yūāḳh, sakār, natanī'el, ammī'el, ishkār aur fa'ūllatī the.

⁶samāyāh bin obed-adom ke beṭe ḳhāndānī sarbarāh the, kyūṅki wuh kāfī asar-o-rasūḳh rakhte the.

⁷un ke nām utnī, rafāel, obed aur ilzabad the. samāyāh ke rishtedār ilīhū aur samakiyāh bhī guroh meṅ shāmil the, kyūṅki wuh bhī ḳhās haisiyat rakhte the.

⁸obed-adom se nikle yih tamām ādmī lāiq the. wuh apne beṭoṅ aur rishtedāroṅ samet kul 62 afrād the aur sab mahārat se apnī ḳhidmat saranjām dete the.

⁹masalamiyāh ke beṭe aur rishtedār kul 18 ādmī the. sab lāiq the.

¹⁰mirārī ke ḳhāndān kā fard hūsā ke chār beṭe simrī, ḳhilqiyāh, tabaliyāh aur zakariyāh the. hūsā ne simrī ko ḳhidmat ke guroh kā sarbarāh banā diyā thā agarche wuh pahlauṭhā nahīṅ thā.

¹¹dūsre beṭe baṛe se le kar chhoṭe tak ḳhilqiyāh, tabaliyāh aur zakariyāh the. hūsā ke kul 13 beṭe aur rishtedār the.

¹²darbānoṅ ke in gurohoṅ meṅ ḳhāndānī sarparast aur tamām ādmī shāmil the. bāqī lāwiyoṅ kī tarah yih bhī rab ke ghar meṅ apnī ḳhidmat saranjām dete the.

¹³qur'ā-andāzī se muqarrar kiyā gayā ki kaun sā guroh sahan ke kis darwāze kī pahrādārī kare. is silsile meṅ baṛe aur chhoṭe ḳhāndānoṅ meṅ imtiyāz na kiyā gayā.

¹⁴yūṅ jab qur'ā ḍālā gayā to masalamiyāh ke ḳhāndān kā nām mashriqī darwāze kī pahrādārī karne ke lie niklā. zakariyāh bin masalamiyāh ke ḳhāndān kā nām shimālī darwāze kī pahrādārī karne ke lie niklā. zakariyāh apne dānā mashwaroṅ ke lie mashhūr thā.

¹⁵jab qur'ā junūbī darwāze kī pahrādārī ke lie ḍālā gayā to obed-adom kā nām niklā. us ke beṭoṅ ko godām kī pahrādārī karne kī zimmādārī dī gaī.

¹⁶jab maġhribī darwāze aur salakat darwāze ke lie qur'ā ḍālā gayā to suffīm aur hūsā ke nām nikle. salakat darwāzā chaṛhnī wāle rāste par hai. pahrādārī kī ḳhidmat yūṅ bāṅṭī gaī:

¹⁷rozānā mashriqī darwāze par chhih lāwī pahrā dete the, shimālī aur junūbī darwāzoṅ par chār chār afrād aur godām par do.

¹⁸rab ke ghar ke sahan ke maġhribī darwāze par chhih lāwī pahrā dete the, chār rāste par aur do sahan meṅ.

¹⁹yih sab darbānoṅ ke guroh the. sab qorah aur mirārī ke ḳhāndānoṅ kī aulād the.

²⁰dūsre kuchh lāwī allāh ke ghar ke ḳhazānoṅ aur rab ke lie maḳhsūs kī gaī chīzeṅ saṅbhālte the.

²¹do bhāī zaitām aur yoel rab ke ghar ke ḳhazānoṅ kī pahrādārī karte the. wuh yihī'el ke ḳhāndān ke sarparast the aur yūṅ lādān jairsonī kī aulād the.

²³amrām, izhār, habrūn aur uzzī'el ke ḳhāndānoṅ kī yih zimmādāriyāṅ thīṅ:

²⁴sabūel bin jairsom bin mūsā ḳhazānoṅ kā nigarān thā.

²⁵jairsom ke bhāī ilīazar kā beṭā rahabiyāh thā. rahabiyāh kā beṭā yasāyāh, yasāyāh kā beṭā yūrām, yūrām kā beṭā zikrī aur zikrī kā beṭā salūmīt thā.

²⁶salūmīt apne bhāiyoṅ ke sāth un muqaddas chīzoṅ ko saṅbhāltā thā jo dāūd bādshāh, ḳhāndānī sarparastoṅ, hazār hazār aur sau sau faujiyoṅ par muqarrar afsaroṅ aur dūsre ālā afsaroṅ ne rab ke lie maḳhsūs kī thīṅ.

²⁷yih chīzeṅ jangoṅ meṅ lūṭe hue māl meṅ se le kar rab ke ghar ko mazbūt karne ke lie maḳhsūs kī gaī thīṅ.

²⁸in meṅ wuh sāmān bhī shāmil thā jo samūel ġhaibbīn, sāūl bin qīs, abinair bin nair aur yoāb bin zarūyāh ne maqdis ke lie maḳhsūs kiyā thā. salūmīt aur us ke bhāī in tamām chīzoṅ ko saṅbhālte the.

²⁹izhār ke ḳhāndān ke afrād yānī kananiyāh aur us ke beṭoṅ ko rab ke ghar se bāhar kī zimmādāriyāṅ dī gaīṅ. unheṅ nigarānoṅ aur qāziyoṅ kī haisiyat se isrāīl par muqarrar kiyā gayā.

³⁰habrūn ke ḳhāndān ke afrād yānī hasbiyāh aur us ke bhāiyoṅ ko daryā-e-yardan ke maġhrib ke ilāqe ko saṅbhālne kī zimmādārī dī gaī. wahāṅ wuh rab ke ghar se mutālliq kāmoṅ ke ilāwā bādshāh kī ḳhidmat bhī saranjām dete the. in lāiq ādmiyoṅ kī kul tādād 1,700 thī.

³¹dāūd bādshāh kī hukūmat ke 40weṅ sāl meṅ nasabnāme kī tahqīq kī gaī tāki habrūn ke ḳhāndān ke bāre meṅ mālūmāt hāsil ho jāeṅ. patā chalā ki us ke kaī lāiq rukn jiliād ke ilāqe ke shahr yāzer meṅ ābād haiṅ. yariyāh un kā sarparast thā.

³²dāūd bādshāh ne use rūbin, jad aur manassī ke mashriqī ilāqe ko saṅbhālne kī zimmādārī dī. yariyāh kī is ḳhidmat meṅ us ke ḳhāndān ke mazīd 2,700 afrād bhī shāmil the. sab lāiq aur apne apne ḳhāndānoṅ ke sarparast the. us ilāqe meṅ wuh rab ke ghar se mutālliq kāmoṅ ke ilāwā bādshāh kī ḳhidmat bhī saranjām dete the.