Read Roman Urdu Geo 1-tawārīḳh 5 Bible Online

1-tawārīḳh 5 - Roman Urdu Geo bible

1-tawārīḳh 5

¹isrāīl kā pahlauṭhā rūbin thā. lekin chūṅki us ne apne bāp kī dāshtā se hambistar hone se bāp kī behurmatī kī thī is lie pahlauṭhe kā maurūsī haq us ke bhāī yūsuf ke beṭoṅ ko diyā gayā. isī wajah se nasabnāme meṅ rūbin ko pahlauṭhe kī haisiyat se bayān nahīṅ kiyā gayā.

²yahūdāh dīgar bhāiyoṅ kī nisbat zyādā tāqatwar thā, aur us se qaum kā bādshāh niklā. to bhī yūsuf ko pahlauṭhe kā maurūsī haq hāsil thā.

³isrāīl ke pahlauṭhe rūbin ke chār beṭe hanūk, fallū, hasron aur karmī the.

⁴yoel ke hāṅ samāyāh paidā huā, samāyāh ke jūj, jūj ke simaī,

⁵simaī ke mīkāh, mīkāh ke riyāyāh, riyāyāh ke bāl aur

⁶bāl ke baīrā. baīrā ko asūr ke bādshāh tiglat-pilesar ne jilāwatan kar diyā. baīrā rūbin ke qabīle kā sarparast thā.

⁷un ke nasabnāme meṅ us ke bhāī un ke ḳhāndānoṅ ke mutābiq darj kie gae haiṅ, sar-e-fahrist yaī'el, phir zakariyāh

⁸aur bālā bin azaz bin samā bin yoel. rūbin kā qabīlā aroīr se le kar nabū aur bāl-maūn tak ke ilāqe meṅ ābād huā.

⁹mashriq kī taraf wuh us registān ke kināre tak phail gae jo daryā-e-furāt se shurū hotā hai. kyūṅki jiliād meṅ un ke rewaṛoṅ kī tādād bahut baṛh gaī thī.

¹⁰sāūl ke ayyām meṅ unhoṅ ne hājiriyoṅ se laṛ kar unheṅ halāk kar diyā aur ḳhud un kī ābādiyoṅ meṅ rahne lage. yūṅ jiliād ke mashriq kā pūrā ilāqā rūbin ke qabīle kī milkiyat meṅ ā gayā.

¹¹jad kā qabīlā rūbin ke qabīle ke paṛosī mulk basan meṅ salkā tak ābād thā.

¹²us kā sarbarāh yoel thā, phir sāfam, yānī aur sāfat. wuh sab basan meṅ ābād the.

¹³un ke bhāī un ke ḳhāndānoṅ samet mīkāel, masullām, sabā, yūrī, yākān, zīa aur ibar the.

¹⁴yih sāt ādmī abīḳhail bin hūrī bin yārūh bin jiliād bin mīkāel bin yasīsī bin yahdū bin būz ke beṭe the.

¹⁵aḳhī bin abdī'el bin jūnī in ḳhāndānoṅ kā sarparast thā.

¹⁶jad kā qabīlā jiliād aur basan ke ilāqoṅ kī ābādiyoṅ meṅ ābād thā. shārūn se le kar sarhad tak kī pūrī charāgāheṅ bhī un ke qabze meṅ thīṅ.

¹⁷yih tamām ḳhāndān yahūdāh ke bādshāh yūtām aur isrāīl ke bādshāh yarubiām ke zamāne meṅ nasabnāme meṅ darj kie gae.

¹⁸rūbin, jad aur manassī ke ādhe qabīle ke 44,760 faujī the. sab laṛne ke qābil aur tajribākār ādmī the, aise log jo tīr chalā sakte aur ḍhāl aur talwār se les the.

¹⁹unhoṅ ne hājiriyoṅ, yatūr, nafīs aur nodab se jang kī.

²⁰laṛte waqt unhoṅ ne allāh se madad ke lie faryād kī, to us ne un kī sun kar hājiriyoṅ ko un ke ittihādiyoṅ samet un ke hawāle kar diyā.

²¹unhoṅ ne un se bahut kuchh lūṭ liyā: 50,000 ūṅṭ, 2,50,000 bheṛ-bakriyāṅ aur 2,000 gadhe. sāth sāth unhoṅ ne 1,00,000 logoṅ ko qaid bhī kar liyā.

²²maidān-e-jang meṅ beshumār dushman māre gae. kyūṅki jang allāh kī thī. jab tak isrāīliyoṅ ko asūr meṅ jilāwatan na kar diyā gayā wuh is ilāqe meṅ ābād rahe.

²³manassī kā ādhā qabīlā bahut baṛā thā. us ke log basan se le kar bāl-harmūn aur sanīr yānī harmūn ke pahāṛī silsile tak phail gae.

²⁴un ke ḳhāndānī sarparast ifar, yisaī, ilī'el, azrī'el, yarmiyāh, hūdāwiyāh aur yahdī'el the. sab māhir faujī, mashhūr ādmī aur ḳhāndānī sarbarāh the.

²⁵lekin yih mashriqī qabīle apne bāpdādā ke ḳhudā se bewafā ho gae. wuh zinā karke mulk ke un aqwām ke dewatāoṅ ke pīchhe lag gae jin ko allāh ne un ke āge se miṭā diyā thā.

²⁶yih dekh kar isrāīl ke ḳhudā ne asūr ke bādshāh tiglat-pilesar ko un ke ḳhilāf barpā kiyā jis ne rūbin, jad aur manassī ke ādhe qabīle ko jilāwatan kar diyā. wuh unheṅ ḳhalah, daryā-e-ḳhābūr, hārā aur daryā-e-jauzān ko le gayā jahāṅ wuh āj tak ābād haiṅ.