Read Roman Urdu Geo 2-tawārīḳh 11 Bible Online

2-tawārīḳh 11 - Roman Urdu Geo bible

2-tawārīḳh 11

¹jab rahubiām yarūshalam pahuṅchā to us ne yahūdāh aur binyamīn ke qabīloṅ ke chīdā chīdā faujiyoṅ ko isrāīl se jang karne ke lie bulāyā. 1,80,000 mard jamā hue tāki rahubiām ke lie isrāīl par dubārā qābū pāeṅ.

²lekin ain us waqt mard-e-ḳhudā samāyāh ko rab kī taraf se paiġhām milā,

³“yahūdāh ke bādshāh rahubiām bin sulaimān aur yahūdāh aur binyamīn ke tamām afrād ko ittilā de,

⁴‘rab farmātā hai ki apne bhāiyoṅ se jang mat karnā. har ek apne apne ghar wāpas chalā jāe, kyūṅki jo kuchh huā hai wuh mere hukm par huā hai’.” tab wuh rab kī sun kar yarubiām se laṛne se bāz āe.

⁵rahubiām kā dār-ul-hukūmat yarūshalam rahā. yahūdāh meṅ us ne zail ke shahroṅ kī qilābandī kī:

⁶bait-laham, aitām, taqūa,

⁷bait-sūr, sokā, adullām,

⁸jāt, maresā, zīf,

⁹adūrāīm, lakīs, azīqā,

¹⁰sur'ā, ayyālon aur habrūn. yahūdāh aur binyamīn ke in qilāband shahroṅ ko

¹¹mazbūt karke rahubiām ne har shahr par afsar muqarrar kie. un meṅ us ne ḳhurāk, zaitūn ke tel aur mai kā zaḳhīrā kar liyā

¹²aur sāth sāth un meṅ ḍhāleṅ aur neze bhī rakhe. is tarah us ne unheṅ bahut mazbūt banā kar yahūdāh aur binyamīn par apnī hukūmat mahfūz kar lī.

¹³go imām aur lāwī tamām isrāīl meṅ bikhre rahte the to bhī unhoṅ ne rahubiām kā sāth diyā.

¹⁴apnī charāgāhoṅ aur milkiyat ko chhoṛ kar wuh yahūdāh aur yarūshalam meṅ ābād hue, kyūṅki yarubiām aur us ke beṭoṅ ne unheṅ imām kī haisiyat se rab kī ḳhidmat karne se rok diyā thā.

¹⁵un kī jagah us ne apne zātī imām muqarrar kie jo ūṅchī jaghoṅ par ke mandiroṅ ko saṅbhālte hue bakre ke dewatāoṅ aur bachhṛe ke butoṅ kī ḳhidmat karte the.

¹⁶lāwiyoṅ kī tarah tamām qabīloṅ ke bahut se aise log yahūdāh meṅ muntaqil hue jo pūre dil se rab isrāīl ke ḳhudā ke tālib rahe the. wuh yarūshalam āe tāki rab apne bāpdādā ke ḳhudā ko qurbāniyāṅ pesh kar sakeṅ.

¹⁷yahūdāh kī saltanat ne aise logoṅ se taqwiyat pāī. wuh rahubiām bin sulaimān ke lie tīn sāl tak mazbūtī kā sabab the, kyūṅki tīn sāl tak yahūdāh dāūd aur sulaimān ke achchhe namūne par chaltā rahā.

¹⁸rahubiām kī shādī mahalat se huī jo yarīmot aur abīḳhail kī beṭī thī. yarīmot dāūd kā beṭā aur abīḳhail iliyāb bin yassī kī beṭī thī.

¹⁹mahalat ke tīn beṭe yaūs, samariyāh aur zaham paidā hue.

²⁰bād meṅ rahubiām kī mākā bint abīsalūm se shādī huī. is rishte se chār beṭe abiyāh, attī, zīzā aur salūmīt paidā hue.

²¹rahubiām kī 18 bīwiyāṅ aur 60 dāshtāeṅ thīṅ. in ke kul 28 beṭe aur 60 beṭiyāṅ paidā huīṅ. lekin mākā bint abīsalūm rahubiām ko sab se zyādā pyārī thī.

²²us ne mākā ke pahlauṭhe abiyāh ko us ke bhāiyoṅ kā sarbarāh banā diyā aur muqarrar kiyā ki yih beṭā mere bād bādshāh banegā.

²³rahubiām ne apne beṭoṅ se baṛī samajhdārī ke sāth sulūk kiyā, kyūṅki us ne unheṅ alag alag karke yahūdāh aur binyamīn ke pūre qabāilī ilāqe aur tamām qilāband shahroṅ meṅ basā diyā. sāth sāth wuh unheṅ kasrat kī ḳhurāk aur bīwiyāṅ muhayyā kartā rahā.