Read Roman Urdu Geo 2-tawārīḳh 12 Bible Online

2-tawārīḳh 12 - Roman Urdu Geo bible

2-tawārīḳh 12

¹jab rahubiām kī saltanat zor pakaṛ kar mazbūt ho gaī to us ne tamām isrāīl samet rab kī sharīat ko tark kar diyā.

²un kī rab se bewafāī kā natījā yih niklā ki rahubiām kī hukūmat ke pāṅchweṅ sāl meṅ misr ke bādshāh sīsaq ne yarūshalam par hamlā kiyā.

³us kī fauj bahut baṛī thī. 1,200 rathoṅ ke ilāwā 60,000 ghuṛsawār aur libiyā, sukkiyoṅ ke mulk aur ethūpiyā ke beshumār piyādā sipāhī the.

⁴yake bād dīgare yahūdāh ke qilāband shahroṅ par qabzā karte karte misrī bādshāh yarūshalam tak pahuṅch gayā.

⁵tab samāyāh nabī rahubiām aur yahūdāh ke un buzurgoṅ ke pās āyā jinhoṅ ne sīsaq ke āge āge bhāg kar yarūshalam meṅ panāh lī thī. us ne un se kahā, “rab farmātā hai, ‘tum ne mujhe tark kar diyā hai, is lie ab maiṅ tumheṅ tark karke sīsaq ke hawāle kar dūṅgā’.”

⁶yih paiġhām sun kar rahubiām aur yahūdāh ke buzurgoṅ ne baṛī inkisārī ke sāth taslīm kiyā ki rab hī ādil hai.

⁷un kī yih ājizī dekh kar rab ne samāyāh se kahā, “chūṅki unhoṅ ne baṛī ḳhāksārī se apnā ġhalat rawayyā taslīm kar liyā hai is lie maiṅ unheṅ tabāh nahīṅ karūṅga balki jald hī unheṅ rihā karūṅga. merā ġhazab sīsaq ke zarī'e yarūshalam par nāzil nahīṅ hogā.

⁸lekin wuh is qaum ko zarūr apne tābe kar rakhegā. tab wuh samajh leṅge ki merī ḳhidmat karne aur dīgar mamālik ke bādshāhoṅ kī ḳhidmat karne meṅ kyā farq hai.”

⁹misr ke bādshāh sīsaq ne yarūshalam par hamlā karte waqt rab ke ghar aur shāhī mahal ke tamām ḳhazāne lūṭ lie. sone kī wuh ḍhāleṅ bhī chhīn lī gaīṅ jo sulaimān ne banwāī thīṅ.

¹⁰in kī jagah rahubiām ne pītal kī ḍhāleṅ banwāīṅ aur unheṅ un muhāfizoṅ ke afsaroṅ ke sapurd kiyā jo shāhī mahal ke darwāze kī pahrādārī karte the.

¹¹jab bhī bādshāh rab ke ghar meṅ jātā tab muhāfiz yih ḍhāleṅ uṭhā kar sāth le jāte. is ke bād wuh unheṅ pahredāroṅ ke kamre meṅ wāpas le jāte the.

¹²chūṅki rahubiām ne baṛī inkisārī se apnā ġhalat rawayyā taslīm kiyā is lie rab kā us par ġhazab ṭhanḍā ho gayā, aur wuh pūre taur par tabāh na huā. darhaqīqat yahūdāh meṅ ab tak kuchh na kuchh pāyā jātā thā jo achchhā thā.

¹³rahubiām kī saltanat ne dubārā taqwiyat pāī, aur yarūshalam meṅ rah kar wuh apnī hukūmat jārī rakh sakā. 41 sāl kī umr meṅ wuh taḳhtnashīn huā thā, aur wuh 17 sāl bādshāh rahā. us kā dār-ul-hukūmat yarūshalam thā, wuh shahr jise rab ne tamām isrāīlī qabīloṅ meṅ se chun liyā tāki us meṅ apnā nām qāim kare. us kī māṅ nāmā ammonī thī.

¹⁴rahubiām ne achchhī zindagī na guzārī, kyūṅki wuh pūre dil se rab kā tālib na rahā thā.

¹⁵bāqī jo kuchh rahubiām kī hukūmat ke daurān shurū se le kar āḳhir tak huā us kā samāyāh nabī aur ġhaibbīn iddū kī tārīḳhī kitāb meṅ bayān hai. wahāṅ us ke nasabnāme kā zikr bhī hai. donoṅ bādshāhoṅ rahubiām aur yarubiām ke jīte jī un ke darmiyān jang jārī rahī.

¹⁶jab rahubiām mar kar apne bāpdādā se jā milā to use yarūshalam ke us hisse meṅ dafnāyā gayā jo ‘dāūd kā shahr’ kahlātā hai. phir us kā beṭā abiyāh taḳhtnashīn huā.