Read Roman Urdu Geo 2-tawārīḳh 14 Bible Online

2-tawārīḳh 14 - Roman Urdu Geo bible

2-tawārīḳh 14

¹jab abiyāh mar kar apne bāpdādā se jā milā to use yarūshalam ke us hisse meṅ dafnāyā gayā jo ‘dāūd kā shahr’ kahlātā hai. phir us kā beṭā āsā taḳhtnashīn huā. āsā kī hukūmat ke taht mulk meṅ 10 sāl tak amn-o-amān qāim rahā.

²āsā wuh kuchh kartā rahā jo rab us ke ḳhudā ke nazdīk achchhā aur ṭhīk thā.

³us ne ajnabī mābūdoṅ kī qurbāngāhoṅ ko ūṅchī jaghoṅ ke mandiroṅ samet girā kar dewatāoṅ ke lie maḳhsūs kie gae satūnoṅ ko ṭukṛe ṭukṛe kar diyā aur yasīrat dewī ke khambe kāṭ ḍāle.

⁴sāth sāth us ne yahūdāh ke bāshindoṅ ko hidāyat dī ki wuh rab apne bāpdādā ke ḳhudā ke tālib hoṅ aur us ke ahkām ke tābe raheṅ.

⁵yahūdāh ke tamām shahroṅ se us ne baḳhūr kī qurbāngāheṅ aur ūṅchī jaghoṅ ke mandir dūr kar die. chunāṅche us kī hukūmat ke daurān bādshāhī meṅ sukūn rahā.

⁶amn-o-amān ke in sāloṅ ke daurān āsā yahūdāh meṅ kaī shahroṅ kī qilābandī kar sakā. jang kā ḳhatrā nahīṅ thā, kyūṅki rab ne use sukūn muhayyā kiyā.

⁷bādshāh ne yahūdāh ke bāshindoṅ se kahā, “āeṅ, ham in shahroṅ kī qilābandī kareṅ! ham in ke irdgird fasīleṅ banā kar unheṅ burjoṅ, darwāzoṅ aur kunḍoṅ se mazbūt kareṅ. kyūṅki ab tak mulk hamāre hāth meṅ hai. chūṅki ham rab apne ḳhudā ke tālib rahe haiṅ is lie us ne hameṅ chāroṅ taraf sulah-salāmatī muhayyā kī hai.” chunāṅche qilābandī kā kām shurū huā balki takmīl tak pahuṅch sakā.

⁸āsā kī fauj meṅ baṛī ḍhāloṅ aur nezoṅ se les yahūdāh ke 3,00,000 afrād the. is ke ilāwā chhoṭī ḍhāloṅ aur kamānoṅ se musallah binyamīn ke 2,80,000 afrād the. sab tajribākār faujī the.

⁹ek din ethūpiyā ke bādshāh zārah ne yahūdāh par hamlā kiyā. us ke beshumār faujī aur 300 rath the. baṛhte baṛhte wuh maresā tak pahuṅch gayā.

¹⁰āsā us kā muqābalā karne ke lie niklā. wādī-e-safātā meṅ donoṅ faujeṅ laṛne ke lie safārā huīṅ.

¹¹āsā ne rab apne ḳhudā se iltimās kī, “ai rab, sirf tū hī bebasoṅ ko tāqatwaroṅ ke hamloṅ se mahfūz rakh saktā hai. ai rab hamāre ḳhudā, hamārī madad kar! kyūṅki ham tujh par bharosā rakhte haiṅ. terā hī nām le kar ham is baṛī fauj kā muqābalā karne ke lie nikle haiṅ. ai rab, tū hī hamārā ḳhudā hai. aisā na hone de ki insān terī marzī kī ḳhilāfwarzī karne meṅ kāmyāb ho jāe.”

¹²tab rab ne āsā aur yahūdāh ke deḳhte deḳhte dushman ko shikast dī. ethūpiyā ke faujī farār hue,

¹³aur āsā ne apne faujiyoṅ ke sāth jirār tak un kā tāqqub kiyā. dushman ke itne afrād halāk hue ki us kī fauj bād meṅ bahāl na ho sakī. rab ḳhud aur us kī fauj ne dushman ko tabāh kar diyā thā. yahūdāh ke mardoṅ ne bahut sā māl lūṭ liyā.

¹⁴wuh jirār ke irdgird ke shahroṅ par bhī qabzā karne meṅ kāmyāb hue, kyūṅki maqāmī logoṅ meṅ rab kī dahshat phail gaī thī. natīje meṅ in shahroṅ se bhī bahut sā māl chhīn liyā gayā.

¹⁵is muhimm ke daurān unhoṅ ne gallābānoṅ kī ḳhaimāgāhoṅ par bhī hamlā kiyā aur un se kasrat kī bheṛ-bakriyāṅ aur ūṅṭ lūṭ kar apne sāth yarūshalam le āe.