Read Roman Urdu Geo 2-tawārīḳh 16 Bible Online

2-tawārīḳh 16 - Roman Urdu Geo bible

2-tawārīḳh 16

¹āsā kī hukūmat ke 36weṅ sāl meṅ isrāīl ke bādshāh bāshā ne yahūdāh par hamlā karke rāmā shahr kī qilābandī kī. maqsad yih thā ki na koī yahūdāh ke mulk meṅ dāḳhil ho sake, na koī wahāṅ se nikal sake.

²jawāb meṅ āsā ne shām ke bādshāh bin-hasad ke pās wafd bhejā jis kā dār-ul-hukūmat damishq thā. us ne rab ke ghar aur shāhī mahal ke ḳhazānoṅ kī sonā-chāṅdī wafd ke sapurd karke damishq ke bādshāh ko paiġhām bhejā,

³“merā āp ke sāth ahd hai jis tarah mere bāp kā āp ke bāp ke sāth ahd thā. guzārish hai ki āp sone-chāṅdī kā yih tohfā qabūl karke isrāīl ke bādshāh bāshā ke sāth apnā ahd mansūḳh kar deṅ tāki wuh mere mulk se nikal jāe.”

⁴bin-hasad muttafiq huā. us ne apne faujī afsaroṅ ko isrāīl ke shahroṅ par hamlā karne ke lie bhej diyā to unhoṅ ne aiyyūn, dān, abīl-māim aur naftālī ke un tamām shahroṅ par qabzā kar liyā jin meṅ shāhī godām the.

⁵jab bāshā ko is kī ḳhabar milī to us ne rāmā kī qilābandī karne se bāz ā kar apnī yih muhimm chhoṛ dī.

⁶phir āsā bādshāh ne yahūdāh ke tamām mardoṅ kī bhartī karke unheṅ rāmā bhej diyā tāki wuh un tamām pattharoṅ aur shahtīroṅ ko uṭhā kar le jāeṅ jin se bāshā bādshāh rāmā kī qilābandī karnā chāhtā thā. is sāmān se āsā ne jibā aur misfāh shahroṅ kī qilābandī kī.

⁷us waqt hanānī ġhaibbīn yahūdāh ke bādshāh āsā ko milne āyā. us ne kahā, “afsos ki āp ne rab apne ḳhudā par etimād na kiyā balki arām ke bādshāh par, kyūṅki is kā burā natījā niklā hai. rab shām ke bādshāh kī fauj ko āp ke hawāle karne ke lie tayyār thā, lekin ab yih mauqā jātā rahā hai.

⁸kyā āp bhūl gae haiṅ ki ethūpiyā aur libiyā kī kitnī baṛī fauj āp se laṛne āī thī? un ke sāth kasrat ke rath aur ghuṛsawār bhī the. lekin us waqt āp ne rab par etimād kiyā, aur jawāb meṅ us ne unheṅ āp ke hawāle kar diyā.

⁹rab to apnī nazar pūrī rū-e-zamīn par dauṛātā rahtā hai tāki un kī taqwiyat kare jo pūrī wafādārī se us se lipṭe rahte haiṅ. āp kī ahmaqānā harkat kī wajah se āp ko ab se mutawātir jangeṅ tang kartī raheṅgī.”

¹⁰yih sun kar āsā ġhusse se lāl-pīlā ho gayā. āpe se bāhar ho kar us ne hukm diyā ki nabī ko giriftār karke us ke pāoṅ kāṭh meṅ ṭhoṅko. us waqt se āsā apnī qaum ke kaī logoṅ par zulm karne lagā.

¹¹bāqī jo kuchh shurū se le kar āḳhir tak āsā kī hukūmat ke daurān huā wuh ‘shāhān-e-yahūdāh-o-isrāīl kī tārīḳh’ kī kitāb meṅ bayān kiyā gayā hai.

¹²hukūmat ke 39weṅ sāl meṅ us ke pāoṅ ko bīmārī lag gaī. go us kī burī hālat thī to bhī us ne rab ko talāsh na kiyā balki sirf ḍākṭaroṅ ke pīchhe paṛ gayā.

¹³hukūmat ke 41weṅ sāl meṅ āsā mar kar apne bāpdādā se jā milā.

¹⁴us ne yarūshalam ke us hisse meṅ jo ‘dāūd kā shahr’ kahlātā hai apne lie chaṭān meṅ qabr tarāshī thī. ab use is meṅ dafn kiyā gayā. janāze ke waqt logoṅ ne lāsh ko ek palang par liṭā diyā jo balsān ke tel aur muḳhtalif qism ke ḳhushbūdār marhamoṅ se ḍhāṅpā gayā thā. phir us ke ehtirām meṅ lakaṛī kā zabardast ḍher jalāyā gayā.