Read Roman Urdu Geo 2-tawārīḳh 18 Bible Online

2-tawārīḳh 18 - Roman Urdu Geo bible

2-tawārīḳh 18

¹ġharz yahūsafat ko baṛī daulat aur izzat hāsil huī. us ne apne pahlauṭhe kī shādī isrāīl ke bādshāh aḳhiyab kī beṭī se karāī.

²kuchh sāl ke bād wuh aḳhiyab se milne ke lie sāmariyya gayā. isrāīl ke bādshāh ne yahūsafat aur us ke sāthiyoṅ ke lie bahut sī bheṛ-bakriyāṅ aur gāy-bail zabah kie. phir us ne yahūsafat ko apne sāth rāmāt-jiliād se jang karne par uksāyā.

³aḳhiyab ne yahūsafat se sawāl kiyā, “kyā āp mere sāth rāmāt-jiliād jāeṅge tāki us par qabzā kareṅ?” us ne jawāb diyā, “jī zarūr, ham to bhāī haiṅ, merī qaum ko apnī qaum samjheṅ! ham āp ke sāth mil kar laṛne ke lie nikleṅge.

⁴lekin mehrbānī karke pahle rab kī marzī mālūm kar leṅ.”

⁵isrāīl ke bādshāh ne 400 nabiyoṅ ko bulā kar un se pūchhā, “kyā ham rāmāt-jiliād par hamlā kareṅ yā maiṅ is irāde se bāz rahūṅ?” nabiyoṅ ne jawāb diyā, “jī, kareṅ, kyūṅki allāh use bādshāh ke hawāle kar degā.”

⁶lekin yahūsafat mutma'in na huā. us ne pūchhā, “kyā yahāṅ rab kā koī nabī nahīṅ jis se ham daryāft kar sakeṅ?”

⁷isrāīl kā bādshāh bolā, “hāṅ, ek to hai jis ke zarī'e ham rab kī marzī mālūm kar sakte haiṅ. lekin maiṅ us se nafrat kartā hūṅ, kyūṅki wuh mere bāre meṅ kabhī bhī achchhī peshgoī nahīṅ kartā. wuh hameshā burī peshgoiyāṅ sunātā hai. us kā nām mīkāyāh bin imlā hai.” yahūsafat ne etirāz kiyā, “bādshāh aisī bāt na kahe!”

⁸tab isrāīl ke bādshāh ne kisī mulāzim ko bulā kar hukm diyā, “mīkāyāh bin imlā ko fauran hamāre pās pahuṅchā denā!”

⁹aḳhiyab aur yahūsafat apne shāhī libās pahne hue sāmariyya ke darwāze ke qarīb apne apne taḳht par baiṭhe the. yih aisī khulī jagah thī jahāṅ anāj gāhā jātā thā. tamām 400 nabī wahāṅ un ke sāmne apnī peshgoiyāṅ pesh kar rahe the.

¹⁰ek nabī banām sidqiyāh bin kan'ānā ne apne lie lohe ke sīṅg banā kar elān kiyā, “rab farmātā hai ki in sīṅgoṅ se tū shām ke faujiyoṅ ko mār mār kar halāk kar degā.”

¹¹dūsre nabī bhī is qism kī peshgoiyāṅ kar rahe the, “rāmāt-jiliād par hamlā kareṅ, kyūṅki āp zarūr kāmyāb ho jāeṅge. rab shahr ko āp ke hawāle kar degā.”

¹²jis mulāzim ko mīkāyāh ko bulāne ke lie bhejā gayā thā us ne rāste meṅ use samjhāyā, “dekheṅ, bāqī tamām nabī mil kar kah rahe haiṅ ki bādshāh ko kāmyābī hāsil hogī. āp bhī aisī hī bāteṅ kareṅ, āp bhī fath kī peshgoī kareṅ!”

¹³lekin mīkāyāh ne etirāz kiyā, “rab kī hayāt kī qasam, maiṅ bādshāh ko sirf wuhī kuchh batāūṅgā jo merā ḳhudā farmāegā.”

¹⁴jab mīkāyāh aḳhiyab ke sāmne khaṛā huā to bādshāh ne pūchhā, “mīkāyāh, kyā ham rāmāt-jiliād par hamlā kareṅ yā maiṅ is irāde se bāz rahūṅ?” mīkāyāh ne jawāb diyā, “us par hamlā kareṅ, kyūṅki unheṅ āp ke hawāle kar diyā jāegā, aur āp ko kāmyābī hāsil hogī.”

¹⁵bādshāh nārāz huā, “mujhe kitnī dafā āp ko samjhānā paṛegā ki āp qasam khā kar mujhe rab ke nām meṅ sirf wuh kuchh sunāeṅ jo haqīqat hai.”

¹⁶tab mīkāyāh ne jawāb meṅ kahā, “mujhe tamām isrāīl gallābān se mahrūm bheṛ-bakriyoṅ kī tarah pahāṛoṅ par bikhrā huā nazar āyā. phir rab mujh se hamkalām huā, ‘in kā koī mālik nahīṅ hai. har ek salāmatī se apne ghar wāpas chalā jāe’.”

¹⁷isrāīl ke bādshāh ne yahūsafat se kahā, “lo, kyā maiṅ ne āp ko nahīṅ batāyā thā ki yih shaḳhs hameshā mere bāre meṅ burī peshgoiyāṅ kartā hai?”

¹⁸lekin mīkāyāh ne apnī bāt jārī rakhī, “rab kā farmān suneṅ! maiṅ ne rab ko us ke taḳht par baiṭhe dekhā. āsmān kī pūrī fauj us ke dāeṅ aur bāeṅ hāth khaṛī thī.

¹⁹rab ne pūchhā, ‘kaun isrāīl ke bādshāh aḳhiyab ko rāmāt-jiliād par hamlā karne par uksāegā tāki wuh wahāṅ jā kar mar jāe?’ ek ne yih mashwarā diyā, dūsre ne wuh.

²⁰āḳhirkār ek rūh rab ke sāmne khaṛī huī aur kahne lagī, ‘maiṅ use uksāūṅgī’. rab ne sawāl kiyā, ‘kis tarah?’

²¹rūh ne jawāb diyā, ‘maiṅ nikal kar us ke tamām nabiyoṅ par yūṅ qābū pāūṅgī ki wuh jhūṭ hī boleṅge.’ rab ne farmāyā, ‘tū kāmyāb hogī. jā aur yūṅ hī kar!’

²²ai bādshāh, rab ne āp par āfat lāne kā faislā kar liyā hai, is lie us ne jhūṭī rūh ko āp ke in tamām nabiyoṅ ke muṅh meṅ ḍāl diyā hai.”

²³tab sidqiyāh bin kan'ānā ne āge baṛh kar mīkāyāh ke muṅh par thappaṛ mārā aur bolā, “rab kā rūh kis tarah mujh se nikal gayā tāki tujh se bāt kare?”

²⁴mīkāyāh ne jawāb diyā, “jis din āp kabhī is kamre meṅ, kabhī us meṅ khisak kar chhupne kī koshish kareṅge us din āp ko patā chalegā.”

²⁵tab aḳhiyab bādshāh ne hukm diyā, “mīkāyāh ko shahr par muqarrar afsar amūn aur mere beṭe yūās ke pās wāpas bhej do!

²⁶unheṅ batā denā, ‘is ādmī ko jel meṅ ḍāl kar mere sahīh-salāmat wāpas āne tak kam se kam roṭī aur pānī diyā kareṅ’.”

²⁷mīkāyāh bolā, “agar āp sahīh-salāmat wāpas āeṅ to matlab hogā ki rab ne merī mārifat bāt nahīṅ kī.” phir wuh sāth khaṛe logoṅ se muḳhātib huā, “tamām log dhyān deṅ!”

²⁸is ke bād isrāīl kā bādshāh aḳhiyab aur yahūdāh kā bādshāh yahūsafat mil kar rāmāt-jiliād par hamlā karne ke lie rawānā hue.

²⁹jang se pahle aḳhiyab ne yahūsafat se kahā, “maiṅ apnā bhes badal kar maidān-e-jang meṅ jāūṅgā. lekin āp apnā shāhī libās na utāreṅ.” chunāṅche isrāīl kā bādshāh apnā bhes badal kar maidān-e-jang meṅ āyā.

³⁰shām ke bādshāh ne rathoṅ par muqarrar apne afsaroṅ ko hukm diyā thā, “sirf aur sirf bādshāh par hamlā kareṅ. kisī aur se mat laṛnā, ḳhwāh wuh chhoṭā ho yā baṛā.”

³¹jab laṛāī chhiṛ gaī to rathoṅ ke afsar yahūsafat par ṭūṭ paṛe, kyūṅki unhoṅ ne kahā, “yihī isrāīl kā bādshāh hai!” lekin jab yahūsafat madad ke lie chillā uṭhā to rab ne us kī sunī. us ne un kā dhyān yahūsafat se khaiṅch liyā,

³²kyūṅki jab dushmanoṅ ko mālūm huā ki yih aḳhiyab bādshāh nahīṅ hai to wuh us kā tāqqub karne se bāz āe.

³³lekin kisī ne ḳhās nishānā bāndhe baġhair apnā tīr chalāyā to wuh aḳhiyab ko aisī jagah jā lagā jahāṅ zirābaktar kā joṛ thā. bādshāh ne apne rathbān ko hukm diyā, “rath ko moṛ kar mujhe maidān-e-jang se bāhar le jāo! mujhe choṭ lag gaī hai.”

³⁴lekin chūṅki us pūre din shadīd qism kī laṛāī jārī rahī, is lie bādshāh apne rath meṅ ṭek lagā kar dushman ke muqābil khaṛā rahā. jab sūraj ġhurūb hone lagā to wuh mar gayā.