Read Roman Urdu Geo 2-tawārīḳh 19 Bible Online

2-tawārīḳh 19 - Roman Urdu Geo bible

2-tawārīḳh 19

¹lekin yahūdāh kā bādshāh yahūsafat sahīh-salāmat yarūshalam aur apne mahal meṅ pahuṅchā.

²us waqt yāhū bin hanānī jo ġhaibbīn thā use milne ke lie niklā aur bādshāh se kahā, “kyā yih ṭhīk hai ki āp sharīr kī madad kareṅ? āp kyūṅ un ko pyār karte haiṅ jo rab se nafrat karte haiṅ? yih dekh kar rab kā ġhazab āp par nāzil huā hai.

³to bhī āp meṅ achchhī bāteṅ bhī pāī jātī haiṅ. āp ne yasīrat dewī ke khamboṅ ko mulk se dūr karke allāh ke tālib hone kā pakkā irādā kar rakhā hai.”

⁴is ke bād yahūsafat yarūshalam meṅ rahā. lekin ek din wuh dubārā niklā. is bār us ne junūb meṅ bair-sabā se le kar shimāl meṅ ifrāīm ke pahāṛī ilāqe tak pūre yahūdāh kā daurā kiyā. har jagah wuh logoṅ ko rab un ke bāpdādā ke ḳhudā ke pās wāpas lāyā.

⁵us ne yahūdāh ke tamām qilāband shahroṅ meṅ qāzī bhī muqarrar kie.

⁶unheṅ samjhāte hue us ne kahā, “apnī rawish par dhyān deṅ! yād rahe ki āp insān ke jawābdih nahīṅ haiṅ balki rab ke. wuhī āp ke sāth hogā jab āp faisle kareṅge.

⁷chunāṅche allāh kā ḳhauf mān kar ehtiyāt se logoṅ kā insāf kareṅ. kyūṅki jahāṅ rab hamārā ḳhudā hai wahāṅ be'insāfī, jānibdārī aur rishwatkhorī ho hī nahīṅ saktī.”

⁸yarūshalam meṅ yahūsafat ne kuchh lāwiyoṅ, imāmoṅ aur ḳhāndānī sarparastoṅ ko insāf karne kī zimmādārī dī. rab kī sharīat se mutālliq kisī muāmale yā yarūshalam ke bāshindoṅ ke darmiyān jhagaṛe kī sūrat meṅ unheṅ faislā karnā thā.

⁹yahūsafat ne unheṅ samjhāte hue kahā, “rab kā ḳhauf mān kar apnī ḳhidmat ko wafādārī aur pūre dil se saranjām deṅ.

¹⁰āp ke bhāī shahroṅ se ā kar āp ke sāmne apne jhagaṛe pesh kareṅge tāki āp un kā faislā kareṅ. āp ko qatl ke muqaddamoṅ kā faislā karnā paṛegā. aise muāmalāt bhī hoṅge jo rab kī sharīat, kisī hukm, hidāyat yā usūl se tālluq rakheṅge. jo bhī ho, lāzim hai ki āp unheṅ samjhāeṅ tāki wuh rab kā gunāh na kareṅ. warnā us kā ġhazab āp aur āp ke bhāiyoṅ par nāzil hogā. agar āp yih kareṅ to āp bequsūr raheṅge.

¹¹imām-e-āzam amariyāh rab kī sharīat se tālluq rakhne wāle muāmalāt kā hatmī faislā karegā. jo muqaddame bādshāh se tālluq rakhte haiṅ un kā hatmī faislā yahūdāh ke qabīle kā sarbarāh zabadiyāh bin ismāīl karegā. adālat kā intizām chalāne meṅ lāwī āp kī madad kareṅge. ab hauslā rakh kar apnī ḳhidmat saranjām deṅ. jo bhī sahīh kām karegā us ke sāth rab hogā.”