Read Roman Urdu Geo 2-tawārīḳh 24 Bible Online

2-tawārīḳh 24 - Roman Urdu Geo bible

2-tawārīḳh 24

¹yūās 7 sāl kī umr meṅ bādshāh banā, aur yarūshalam meṅ us kī hukūmat kā daurāniyā 40 sāl thā. us kī māṅ zibiyāh bair-sabā kī rahne wālī thī.

²yahoyadā ke jīte jī yūās wuh kuchh kartā rahā jo rab ko pasand thā.

³yahoyadā ne us kī shādī do ḳhawātīn se karāī jin ke beṭe-beṭiyāṅ paidā hue.

⁴kuchh der ke bād yūās ne rab ke ghar kī marammat karāne kā faislā kiyā.

⁵imāmoṅ aur lāwiyoṅ ko apne pās bulā kar us ne unheṅ hukm diyā, “yahūdāh ke shahroṅ meṅ se guzar kar tamām logoṅ se paise jamā kareṅ tāki āp sāl-ba-sāl apne ḳhudā ke ghar kī marammat karwāeṅ. ab jā kar jaldī kareṅ.” lekin lāwiyoṅ ne baṛī der lagāī.

⁶tab bādshāh ne imām-e-āzam yahoyadā ko bulā kar pūchhā, “āp ne lāwiyoṅ se mutālabā kyūṅ nahīṅ kiyā ki wuh yahūdāh ke shahroṅ aur yarūshalam se rab ke ghar kī marammat ke paise jamā kareṅ? yih to koī naī bāt nahīṅ hai, kyūṅki rab kā ḳhādim mūsā bhī mulāqāt kā ḳhaimā ṭhīk rakhne ke lie isrāīlī jamā'at se ṭaiks letā rahā.

⁷āp ko ḳhud mālūm hai ki us bedīn aurat ataliyāh ne apne pairokāroṅ ke sāth rab ke ghar meṅ naqb lagā kar rab ke lie maḳhsūs hadie chhīn lie aur bāl ke apne butoṅ kī ḳhidmat ke lie istemāl kie the.”

⁸bādshāh ke hukm par ek sandūq banwāyā gayā jo bāhar, rab ke ghar ke sahan ke darwāze par rakhā gayā.

⁹pūre yahūdāh aur yarūshalam meṅ elān kiyā gayā ki rab ke lie wuh ṭaiks adā kiyā jāe jis kā ḳhudā ke ḳhādim mūsā ne registān meṅ isrāīliyoṅ se mutālabā kiyā thā.

¹⁰yih sun kar tamām rāhnumā balki pūrī qaum ḳhush huī. apne hadie rab ke ghar ke pās lā kar wuh unheṅ sandūq meṅ ḍālte rahe. jab kabhī wuh bhar jātā

¹¹to lāwī use uṭhā kar bādshāh ke afsaroṅ ke pās le jāte. agar us meṅ wāqaī bahut paise hote to bādshāh kā mīrmunshī aur imām-e-āzam kā ek afsar ā kar use ḳhālī kar dete. phir lāwī use us kī jagah wāpas rakh dete the. yih silsilā rozānā jārī rahā, aur āḳhirkār bahut baṛī raqm ikaṭṭhī ho gaī.

¹²bādshāh aur yahoyadā yih paise un ṭhekedāroṅ ko diyā karte the jo rab ke ghar kī marammat karwāte the. yih paise patthar tarāshne wāloṅ, baṛha'iyoṅ aur un kārīgaroṅ kī ujrat ke lie sarf hue jo lohe aur pītal kā kām karte the.

¹³rab ke ghar kī marammat ke nigarānoṅ ne mehnat se kām kiyā, aur un ke zer-e-nigarānī taraqqī hotī gaī. āḳhir meṅ rab ke ghar kī hālat pahle kī sī ho gaī thī balki unhoṅ ne use mazīd mazbūt banā diyā.

¹⁴kām ke iḳhtitām par ṭhekedār bāqī paise yūās bādshāh aur yahoyadā ke pās lāe. in se unhoṅ ne rab ke ghar kī ḳhidmat ke lie darkār pyāle, sone aur chāṅdī ke bartan aur dīgar kaī chīzeṅ jo qurbāniyāṅ chaṛhāne ke lie istemāl hotī thīṅ banwāīṅ. yahoyadā ke jīte jī rab ke ghar meṅ bāqāidagī se bhasm hone wālī qurbāniyāṅ pesh kī jātī rahīṅ.

¹⁵yahoyadā nihāyat būṛhā ho gayā. 130 sāl kī umr meṅ wuh faut huā.

¹⁶use yarūshalam ke us hisse meṅ shāhī qabristān meṅ dafnāyā gayā jo ‘dāūd kā shahr’ kahlātā hai, kyūṅki us ne isrāīl meṅ allāh aur us ke ghar kī achchhī ḳhidmat kī thī.

¹⁷yahoyadā kī maut ke bād yahūdāh ke buzurg yūās ke pās ā kar muṅh ke bal jhuk gae. us waqt se wuh un ke mashwaroṅ par amal karne lagā.

¹⁸is kā ek natījā yih niklā ki wuh un ke sāth mil kar rab apne bāp ke ḳhudā ke ghar ko chhoṛ kar yasīrat dewī ke khamboṅ aur butoṅ kī pūjā karne lagā. is gunāh kī wajah se allāh kā ġhazab yahūdāh aur yarūshalam par nāzil huā.

¹⁹us ne apne nabiyoṅ ko logoṅ ke pās bhejā tāki wuh unheṅ samjhā kar rab ke pās wāpas lāeṅ. lekin koī bhī un kī bāt sunane ke lie tayyār na huā.

²⁰phir allāh kā rūh yahoyadā imām ke beṭe zakariyāh par nāzil huā, aur us ne qaum ke sāmne khaṛe ho kar kahā, “allāh farmātā hai, ‘tum rab ke ahkām kī ḳhilāfwarzī kyūṅ karte ho? tumheṅ kāmyābī hāsil nahīṅ hogī. chūṅki tum ne rab ko tark kar diyā hai is lie us ne tumheṅ tark kar diyā hai’!”

²¹jawāb meṅ logoṅ ne zakariyāh ke ḳhilāf sāzish karke use bādshāh ke hukm par rab ke ghar ke sahan meṅ sangsār kar diyā.

²²yūṅ yūās bādshāh ne us mehrbānī kā ḳhayāl na kiyā jo yahoyadā ne us par kī thī balki use nazarandāz karke us ke beṭe ko qatl kiyā. marte waqt zakariyāh bolā, “rab dhyān de kar merā badlā le!”

²³agle sāl ke āġhāz meṅ shām kī fauj yūās se laṛne āī. yahūdāh meṅ ghus kar unhoṅ ne yarūshalam par fath pāī aur qaum ke tamām buzurgoṅ ko mār ḍālā. sārā lūṭā huā māl damishq ko bhejā gayā jahāṅ bādshāh thā.

²⁴agarche shām kī fauj yahūdāh kī fauj kī nisbat bahut chhoṭī thī to bhī rab ne use fath baḳhshī. chūṅki yahūdāh ne rab apne bāpdādā ke ḳhudā ko tark kar diyā thā is lie yūās ko shām ke hāthoṅ sazā milī.

²⁵jang ke daurān yahūdāh kā bādshāh shadīd zaḳhmī huā. jab dushman ne mulk ko chhoṛ diyā to yūās ke afsaroṅ ne us ke ḳhilāf sāzish kī. yahoyadā imām ke beṭe ke qatl kā intiqām le kar unhoṅ ne use mār ḍālā jab wuh bīmār hālat meṅ bistar par paṛā thā. bādshāh ko yarūshalam ke us hisse meṅ dafn kiyā gayā jo ‘dāūd kā shahr’ kahlātā hai. lekin shāhī qabristān meṅ nahīṅ dafnāyā gayā.

²⁶sāzish karne wāloṅ ke nām zabad aur yahūzabad the. pahle kī māṅ sim'āt ammonī thī jabki dūsre kī māṅ simrīt moābī thī.

²⁷yūās ke beṭoṅ, us ke ḳhilāf nabiyoṅ ke farmānoṅ aur allāh ke ghar kī marammat ke bāre meṅ mazīd mālūmāt ‘shāhān kī kitāb’ meṅ darj haiṅ. yūās ke bād us kā beṭā amasiyāh taḳhtnashīn huā.