Read Roman Urdu Geo 2-tawārīḳh 25 Bible Online

2-tawārīḳh 25 - Roman Urdu Geo bible

2-tawārīḳh 25

¹amasiyāh 25 sāl kī umr meṅ bādshāh banā aur yarūshalam meṅ us kī hukūmat kā daurāniyā 29 sāl thā. us kī māṅ yahūaddān yarūshalam kī rahne wālī thī.

²jo kuchh amasiyāh ne kiyā wuh rab ko pasand thā, lekin wuh pūre dil se rab kī pairawī nahīṅ kartā thā.

³jūṅ hī us ke pāoṅ mazbūtī se jam gae us ne un afsaroṅ ko sazā-e-maut dī jinhoṅ ne bāp ko qatl kar diyā thā.

⁴lekin un ke beṭoṅ ko us ne zindā rahne diyā aur yūṅ mūswī sharīat ke tābe rahā jis meṅ rab farmātā hai, “wālidain ko un ke bachchoṅ ke jarāim ke sabab se sazā-e-maut na dī jāe, na bachchoṅ ko un ke wālidain ke jarāim ke sabab se. agar kisī ko sazā-e-maut denī ho to us gunāh ke sabab se jo us ne ḳhud kiyā hai.”

⁵amasiyāh ne yahūdāh aur binyamīn ke qabīloṅ ke tamām mardoṅ ko bulā kar unheṅ ḳhāndānoṅ ke mutābiq tartīb diyā. us ne hazār hazār aur sau sau faujiyoṅ par afsar muqarrar kie. jitne bhī mard 20 yā is se zāid sāl ke the un sab kī bhartī huī. is tarah 3,00,000 faujī jamā hue. sab baṛī ḍhāloṅ aur nezoṅ se les the.

⁶is ke ilāwā amasiyāh ne isrāīl ke 1,00,000 tajribākār faujiyoṅ ko ujrat par bhartī kiyā tāki wuh jang meṅ madad kareṅ. unheṅ us ne chāṅdī ke taqrīban 3,400 kilogrām die.

⁷lekin ek mard-e-ḳhudā ne amasiyāh ke pās ā kar use samjhāyā, “bādshāh salāmat, lāzim hai ki yih isrāīlī faujī āp ke sāth mil kar laṛne ke lie na nikleṅ. kyūṅki rab un ke sāth nahīṅ hai, wuh ifrāīm ke kisī bhī rahne wāle ke sāth nahīṅ hai.

⁸agar āp un ke sāth mil kar nikleṅ tāki mazbūtī se dushman se laṛeṅ to allāh āp ko dushman ke sāmne girā degā. kyūṅki allāh ko āp kī madad karne aur āp ko girāne kī qudrat hāsil hai.”

⁹amasiyāh ne etirāz kiyā, “lekin maiṅ isrāīliyoṅ ko chāṅdī ke 3,400 kilogrām adā kar chukā hūṅ. in paisoṅ kā kyā banegā?” mard-e-ḳhudā ne jawāb diyā, “rab āp ko is se kahīṅ zyādā atā kar saktā hai.”

¹⁰chunāṅche amasiyāh ne ifrāīm se āe hue tamām faujiyoṅ ko fāriġh karke wāpas bhej diyā, aur wuh yahūdāh se bahut nārāz hue. har ek baṛe taish meṅ apne apne ghar chalā gayā.

¹¹to bhī amasiyāh jur'at karke jang ke lie niklā. apnī fauj ko namak kī wādī meṅ le jā kar us ne adomiyoṅ par fath pāī. un ke 10,000 mard maidān-e-jang meṅ māre gae.

¹²dushman ke mazīd 10,000 ādmiyoṅ ko giriftār kar liyā gayā. yahūdāh ke faujiyoṅ ne qaidiyoṅ ko ek ūṅchī chaṭān kī choṭī par le jā kar nīche girā diyā. is tarah sab pāsh pāsh ho kar halāk hue.

¹³itne meṅ fāriġh kie gae isrāīlī faujiyoṅ ne sāmariyya aur bait-haurūn ke bīch meṅ wāqe yahūdāh ke shahroṅ par hamlā kiyā thā. laṛte laṛte unhoṅ ne 3,000 mardoṅ ko maut ke ghāṭ utār diyā aur bahut sā māl lūṭ liyā thā.

¹⁴adomiyoṅ ko shikast dene ke bād amasiyāh saīr ke bāshindoṅ ke butoṅ ko lūṭ kar apne ghar wāpas lāyā. wahāṅ us ne unheṅ khaṛā kiyā aur un ke sāmne aundhe muṅh jhuk kar unheṅ qurbāniyāṅ pesh kīṅ.

¹⁵yih dekh kar rab us se bahut nārāz huā. us ne ek nabī ko us ke pās bhejā jis ne kahā, “tū in dewatāoṅ kī taraf kyūṅ rujū kar rahā hai? yih to apnī qaum ko tujh se najāt na dilā sake.”

¹⁶amasiyāh ne nabī kī bāt kāṭ kar kahā, “ham ne kab se tujhe bādshāh kā mushīr banā diyā hai? ḳhāmosh, warnā tujhe mār diyā jāegā.” nabī ne ḳhāmosh ho kar itnā hī kahā, “mujhe mālūm hai ki allāh ne āp ko āp kī in harkatoṅ kī wajah se aur is lie ki āp ne merā mashwarā qabūl nahīṅ kiyā tabāh karne kā faislā kar liyā hai.”

¹⁷ek din yahūdāh ke bādshāh amasiyāh ne apne mushīroṅ se mashwarā karne ke bād yūās bin yahūāḳhaz bin yāhū ko paiġhām bhejā, “āeṅ, ham ek dūsre kā muqābalā kareṅ!”

¹⁸lekin isrāīl ke bādshāh yūās ne jawāb diyā, “lubnān meṅ ek kāṅṭedār jhāṛī ne deodār ke ek daraḳht se bāt kī, ‘mere beṭe ke sāth apnī beṭī kā rishtā bāndho.’ lekin usī waqt lubnān ke janglī jānwaroṅ ne us ke ūpar se guzar kar use pāoṅ tale kuchal ḍālā.

¹⁹adom par fath pāne ke sabab se āp kā dil maġhrūr ho kar mazīd shohrat hāsil karnā chāhtā hai. lekin merā mashwarā hai ki āp apne ghar meṅ raheṅ. āp aisī musībat ko kyūṅ dāwat dete haiṅ jo āp aur yahūdāh kī tabāhī kā bāis ban jāe?”

²⁰lekin amasiyāh mānane ke lie tayyār nahīṅ thā. allāh use aur us kī qaum ko isrāīliyoṅ ke hawāle karnā chāhtā thā, kyūṅki unhoṅ ne adomiyoṅ ke dewatāoṅ kī taraf rujū kiyā thā.

²¹tab isrāīl kā bādshāh yūās apnī fauj le kar yahūdāh par chaṛh āyā. bait-shams ke pās us kā yahūdāh ke bādshāh amasiyāh ke sāth muqābalā huā.

²²isrāīlī fauj ne yahūdāh kī fauj ko shikast dī, aur har ek apne apne ghar bhāg gayā.

²³isrāīl ke bādshāh yūās ne yahūdāh ke bādshāh amasiyāh bin yūās bin aḳhaziyāh ko wahīṅ bait-shams meṅ giriftār kar liyā. phir wuh use yarūshalam lāyā aur shahr kī fasīl ifrāīm nāmī darwāze se le kar kone ke darwāze tak girā dī. is hisse kī lambāī taqrīban 600 fuṭ thī.

²⁴jitnā bhī sonā, chāṅdī aur qīmtī sāmān rab ke ghar aur shāhī mahal ke ḳhazānoṅ meṅ thā use us ne pūre kā pūrā chhīn liyā. us waqt obed-adom rab ke ghar ke ḳhazāne saṅbhāltā thā. yūās lūṭā huā māl aur bāz yarġhamāloṅ ko le kar sāmariyya wāpas chalā gayā.

²⁵isrāīl ke bādshāh yūās bin yahūāḳhaz kī maut ke bād yahūdāh kā bādshāh amasiyāh bin yūās mazīd 15 sāl jītā rahā.

²⁶bāqī jo kuchh amasiyāh kī hukūmat ke daurān huā wuh shurū se le kar āḳhir tak ‘shāhān-e-isrāīl-o-yahūdāh’ kī kitāb meṅ darj hai.

²⁷jab se wuh rab kī pairawī karne se bāz āyā us waqt se log yarūshalam meṅ us ke ḳhilāf sāzish karne lage. āḳhirkār us ne farār ho kar lakīs meṅ panāh lī, lekin sāzish karne wāloṅ ne apne logoṅ ko us ke pīchhe bhejā, aur wuh wahāṅ use qatl karne meṅ kāmyāb ho gae.

²⁸us kī lāsh ghoṛe par uṭhā kar yahūdāh ke shahr yarūshalam lāī gaī jahāṅ use ḳhāndānī qabr meṅ dafnāyā gayā.