Read Roman Urdu Geo 2-tawārīḳh 3 Bible Online

2-tawārīḳh 3 - Roman Urdu Geo bible

2-tawārīḳh 3

¹sulaimān ne rab ke ghar ko yarūshalam kī pahāṛī moriyāh par tāmīr kiyā. us kā bāp dāūd yih maqām muqarrar kar chukā thā. yihīṅ jahāṅ pahle urnān yānī araunāh yabūsī apnā anāj gāhtā thā rab dāūd par zāhir huā thā.

²tāmīr kā yih kām sulaimān kī hukūmat ke chauthe sāl ke dūsre māh aur us ke dūsre din shurū huā.

³makān kī lambāī 90 fuṭ aur chauṛāī 30 fuṭ thī.

⁴sāmne ek barāmdā banāyā gayā jo imārat jitnā chauṛā yānī 30 fuṭ aur 30 fuṭ ūṅchā thā. us kī andarūnī dīwāroṅ par us ne ḳhālis sonā chaṛhāyā.

⁵baṛe hāl kī dīwāroṅ par us ne ūpar se le kar nīche tak jūnīpar kī lakaṛī ke taḳhte lagāe, phir taḳhtoṅ par ḳhālis sonā manḍhwā kar unheṅ khajūr ke daraḳhtoṅ aur zanjīroṅ kī taswīroṅ se ārāstā kiyā.

⁶sulaimān ne rab ke ghar ko jawāhir se bhī sajāyā. jo sonā istemāl huā wuh parwāim se mangwāyā gayā thā.

⁷sonā makān, tamām shahtīroṅ, dahlīzoṅ, dīwāroṅ aur darwāzoṅ par manḍhā gayā. dīwāroṅ par karūbī farishtoṅ kī taswīreṅ bhī kandā kī gaīṅ.

⁸imārat kā sab se andarūnī kamrā banām muqaddastarīn kamrā imārat jaisā chauṛā yānī 30 fuṭ thā. us kī lambāī bhī 30 fuṭ thī. is kamre kī tamām dīwāroṅ par 20,000 kilogrām se zāid sonā manḍhā gayā.

⁹sone kī kīloṅ kā wazn taqrīban 600 grām thā. bālāḳhānoṅ kī dīwāroṅ par bhī sonā manḍhā gayā.

¹⁰phir sulaimān ne karūbī farishtoṅ ke do mujassame banwāe jinheṅ muqaddastarīn kamre meṅ rakhā gayā. un par bhī sonā chaṛhāyā gayā.

¹¹jab donoṅ farishtoṅ ko ek dūsre ke sāth muqaddastarīn kamre meṅ khaṛā kiyā gayā to un ke chār paroṅ kī mil kar lambāī 30 fuṭ thī. har ek ke do par the, aur har par kī lambāī sāṛhe sāt sāt fuṭ thī. unheṅ muqaddastarīn kamre meṅ yūṅ ek dūsre ke sāth khaṛā kiyā gayā ki har farishte kā ek par dūsre ke par se lagtā jabki dāīṅ aur bāīṅ taraf har ek kā dūsrā par dīwār ke sāth lagtā thā. wuh apne pāoṅ par khaṛe baṛe hāl kī taraf deḳhte the.

¹⁴muqaddastarīn kamre ke darwāze par sulaimān ne bārīk katān se bunā huā pardā lagwāyā. wuh nīle, arġhawānī aur qirmizī rang ke dhāge se sajā huā thā, aur us par karūbī farishtoṅ kī taswīreṅ thīṅ.

¹⁵sulaimān ne do satūn ḍhalwā kar rab ke ghar ke darwāze ke sāmne khaṛe kie. har ek 27 fuṭ lambā thā, aur har ek par ek bālāī hissā rakhā gayā jis kī ūṅchāī sāṛhe 7 fuṭ thī.

¹⁶in bālāī hissoṅ ko zanjīroṅ se sajāyā gayā jin se sau anār laṭke hue the.

¹⁷donoṅ satūnoṅ ko sulaimān ne rab ke ghar ke darwāze ke dāīṅ aur bāīṅ taraf khaṛā kiyā. dahne hāth ke satūn kā nām us ne ‘yakīn’ aur bāeṅ hāth ke satūn kā nām ‘boaz’ rakhā.