Read Roman Urdu Geo 2-tawārīḳh 30 Bible Online

2-tawārīḳh 30 - Roman Urdu Geo bible

2-tawārīḳh 30

¹hizqiyāh ne isrāīl aur yahūdāh kī har jagah apne qāsidoṅ ko bhej kar logoṅ ko rab ke ghar meṅ āne kī dāwat dī, kyūṅki wuh un ke sāth rab isrāīl ke ḳhudā kī tāzīm meṅ fasah kī īd manānā chāhtā thā. us ne ifrāīm aur manassī ke qabīloṅ ko bhī dāwatanāme bheje.

²bādshāh ne apne afsaroṅ aur yarūshalam kī pūrī jamā'at ke sāth mil kar faislā kiyā ki ham yih īd dūsre mahīne meṅ manāeṅge.

³ām taur par yih pahle mahīne meṅ manāī jātī thī, lekin us waqt tak ḳhidmat ke lie tayyār imām kāfī nahīṅ the. kyūṅki ab tak sab apne āp ko pāk-sāf na kar sake. dūsrī bāt yih thī ki log itnī jaldī se yarūshalam meṅ jamā na ho sake.

⁴in bātoṅ ke pesh-e-nazar bādshāh aur tamām hāzirīn is par muttafiq hue ki fasah kī īd multawī kī jāe.

⁵unhoṅ ne faislā kiyā ki ham tamām isrāīliyoṅ ko junūb meṅ bair-sabā se le kar shimāl meṅ dān tak dāwat deṅge. sab yarūshalam āeṅ tāki ham mil kar rab isrāīl ke ḳhudā kī tāzīm meṅ fasah kī īd manāeṅ. asal meṅ yih īd baṛī der se hidāyāt ke mutābiq nahīṅ manāī gaī thī.

⁶bādshāh ke hukm par qāsid isrāīl aur yahūdāh meṅ se guzare. har jagah unhoṅ ne logoṅ ko bādshāh aur us ke afsaroṅ ke ḳhat pahuṅchā die. ḳhat meṅ likhā thā, “ai isrāīliyo, rab ibrāhīm, is'hāq aur isrāīl ke ḳhudā ke pās wāpas āeṅ! phir wuh bhī āp ke pās jo asūrī bādshāhoṅ ke hāth se bach nikle haiṅ wāpas āegā.

⁷apne bāpdādā aur bhāiyoṅ kī tarah na baneṅ jo rab apne bāpdādā ke ḳhudā se bewafā ho gae the. yihī wajah hai ki us ne unheṅ aisī hālat meṅ chhoṛ diyā ki jis ne bhī unheṅ dekhā us ke roṅgṭe khaṛe ho gae. āp ḳhud is ke gawāh haiṅ.

⁸un kī tarah aṛe na raheṅ balki rab ke tābe ho jāeṅ. us ke maqdis meṅ āeṅ, jo us ne hameshā ke lie maḳhsūs-o-muqaddas kar diyā hai. rab apne ḳhudā kī ḳhidmat kareṅ tāki āp us ke saḳht ġhazab kā nishānā na raheṅ.

⁹agar āp rab ke pās lauṭ āeṅ to jinhoṅ ne āp ke bhāiyoṅ aur un ke bāl-bachchoṅ ko qaid kar liyā hai wuh un par rahm karke unheṅ is mulk meṅ wāpas āne deṅge. kyūṅki rab āp kā ḳhudā mehrbān aur rahīm hai. agar āp us ke pās wāpas āeṅ to wuh apnā muṅh āp se nahīṅ pheregā.”

¹⁰qāsid ifrāīm aur manassī ke pūre qabāilī ilāqe meṅ se guzare aur har shahr ko yih paiġhām pahuṅchāyā. phir chalte chalte wuh zabūlūn tak pahuṅch gae. lekin aksar log un kī bāt sun kar haṅs paṛe aur un kā mazāq uṛāne lage.

¹¹sirf āshar, manassī aur zabūlūn ke chand ek ādmī farotanī kā izhār karke mān gae aur yarūshalam āe.

¹²yahūdāh meṅ allāh ne logoṅ ko tahrīk dī ki unhoṅ ne yakdilī se us hukm par amal kiyā jo bādshāh aur buzurgoṅ ne rab ke farmān ke mutābiq diyā thā.

¹³dūsre mahīne meṅ bahut zyādā log beḳhamīrī roṭī kī īd manāne ke lie yarūshalam pahuṅche.

¹⁴pahle unhoṅ ne shahr se butoṅ kī tamām qurbāngāhoṅ ko dūr kar diyā. baḳhūr jalāne kī chhoṭī qurbāngāhoṅ ko bhī unhoṅ ne uṭhā kar wādī-e-qidron meṅ phaiṅk diyā.

¹⁵dūsre mahīne ke 14weṅ din fasah ke leloṅ ko zabah kiyā gayā. imāmoṅ aur lāwiyoṅ ne sharmindā ho kar apne āp ko ḳhidmat ke lie pāk-sāf kar rakhā thā, aur ab unhoṅ ne bhasm hone wālī qurbāniyoṅ ko rab ke ghar meṅ pesh kiyā.

¹⁶wuh ḳhidmat ke lie yūṅ khaṛe ho gae jis tarah mard-e-ḳhudā mūsā kī sharīat meṅ farmāyā gayā hai. lāwī qurbāniyoṅ kā ḳhūn imāmoṅ ke pās lāe jinhoṅ ne use qurbāngāh par chhiṛkā.

¹⁷lekin hāzirīn meṅ se bahut se logoṅ ne apne āp ko sahīh taur par pāk-sāf nahīṅ kiyā thā. un ke lie lāwiyoṅ ne fasah ke leloṅ ko zabah kiyā tāki un kī qurbāniyoṅ ko bhī rab ke lie maḳhsūs kiyā jā sake.

¹⁸ḳhāskar ifrāīm, manassī, zabūlūn aur ishkār ke aksar logoṅ ne apne āp ko sahīh taur par pāk-sāf nahīṅ kiyā thā. chunāṅche wuh fasah ke khāne meṅ us hālat meṅ sharīk na hue jis kā taqāzā sharīat kartī hai. lekin hizqiyāh ne un kī shafā'at karke duā kī, “rab jo mehrbān hai har ek ko muāf kare

¹⁹jo pūre dil se rab apne bāpdādā ke ḳhudā kā tālib rahne kā irādā rakhtā hai, ḳhwāh use maqdis ke lie darkār pākīzagī hāsil na bhī ho.”

²⁰rab ne hizqiyāh kī duā sun kar logoṅ ko bahāl kar diyā.

²¹yarūshalam meṅ jamāshudā isrāīliyoṅ ne baṛī ḳhushī se sāt din tak beḳhamīrī roṭī kī īd manāī. har din lāwī aur imām apne sāz bajā kar buland āwāz se rab kī satāish karte rahe.

²²lāwiyoṅ ne rab kī ḳhidmat karte waqt baṛī samajhdārī dikhāī, aur hizqiyāh ne is meṅ un kī hauslā-afzāī kī. pūre hafte ke daurān isrāīlī rab ko salāmatī kī qurbāniyāṅ pesh karke qurbānī kā apnā hissā khāte aur rab apne bāpdādā ke ḳhudā kī tamjīd karte rahe.

²³is hafte ke bād pūrī jamā'at ne faislā kiyā ki īd ko mazīd sāt din manāyā jāe. chunāṅche unhoṅ ne ḳhushī se ek aur hafte ke daurān īd manāī.

²⁴tab yahūdāh ke bādshāh hizqiyāh ne jamā'at ke lie 1,000 bail aur 7,000 bheṛ-bakriyāṅ pesh kīṅ jabki buzurgoṅ ne jamā'at ke lie 1,000 bail aur 10,000 bheṛ-bakriyāṅ chaṛhāīṅ. itne meṅ mazīd bahut se imāmoṅ ne apne āp ko rab kī ḳhidmat ke lie maḳhsūs-o-muqaddas kar liyā thā.

²⁵jitne bhī āe the ḳhushī manā rahe the, ḳhwāh wuh yahūdāh ke bāshinde the, ḳhwāh imām, lāwī, isrāīlī yā isrāīl aur yahūdāh meṅ rahne wāle pardesī mehmān.

²⁶yarūshalam meṅ baṛī shādmānī thī, kyūṅki aisī īd dāūd bādshāh ke beṭe sulaimān ke zamāne se le kar us waqt tak yarūshalam meṅ manāī nahīṅ gaī thī.

²⁷īd ke iḳhtitām par imāmoṅ aur lāwiyoṅ ne khaṛe ho kar qaum ko barkat dī. aur allāh ne un kī sunī, un kī duā āsmān par us kī muqaddas sukūnatgāh tak pahuṅchī.