Read Roman Urdu Geo 2-tawārīḳh 6 Bible Online

2-tawārīḳh 6 - Roman Urdu Geo bible

2-tawārīḳh 6

¹yih dekh kar sulaimān ne duā kī, “rab ne farmāyā hai ki maiṅ ghane bādal ke andhere meṅ rahūṅgā.

²maiṅ ne tere lie azīm sukūnatgāh banāī hai, ek maqām jo terī abadī sukūnat ke lāiq hai.”

³phir bādshāh ne muṛ kar rab ke ghar ke sāmne khaṛī isrāīl kī pūrī jamā'at kī taraf ruḳh kiyā. us ne unheṅ barkat de kar kahā,

⁴“rab isrāīl ke ḳhudā kī tārīf ho jis ne wuh wādā pūrā kiyā hai jo us ne mere bāp dāūd se kiyā thā. kyūṅki us ne farmāyā,

⁵‘jis din maiṅ apnī qaum ko misr se nikāl lāyā us din se le kar āj tak maiṅ ne na kabhī farmāyā ki isrāīlī qabīloṅ ke kisī shahr meṅ mere nām kī tāzīm meṅ ghar banāyā jāe, na kisī ko merī qaum isrāīl par hukūmat karne ke lie muqarrar kiyā.

⁶lekin ab maiṅ ne yarūshalam ko apne nām kī sukūnatgāh aur dāūd ko apnī qaum isrāīl kā bādshāh banāyā hai.’

⁷mere bāp dāūd kī baṛī ḳhwāhish thī ki rab isrāīl ke ḳhudā ke nām kī tāzīm meṅ ghar banāe.

⁸lekin rab ne etirāz kiyā, ‘maiṅ ḳhush hūṅ ki tū mere nām kī tāzīm meṅ ghar tāmīr karnā chāhtā hai,

⁹lekin tū nahīṅ balki terā beṭā hī use banāegā.’

¹⁰aur wāqaī, rab ne apnā wādā pūrā kiyā hai. maiṅ rab ke wāde ke ain mutābiq apne bāp dāūd kī jagah isrāīl kā bādshāh ban kar taḳht par baiṭh gayā hūṅ. aur ab maiṅ ne rab isrāīl ke ḳhudā ke nām kī tāzīm meṅ ghar bhī banāyā hai.

¹¹us meṅ maiṅ ne wuh sandūq rakh diyā hai jis meṅ sharīat kī taḳhtiyāṅ paṛī haiṅ, us ahd kī taḳhtiyāṅ jo rab ne isrāīliyoṅ se bāndhā thā.”

¹²phir sulaimān ne isrāīl kī pūrī jamā'at ke deḳhte deḳhte rab kī qurbāngāh ke sāmne khaṛe ho kar apne hāth āsmān kī taraf uṭhāe.

¹³us ne is mauqe ke lie pītal kā ek chabūtarā banwā kar use bairūnī sahan ke bīch meṅ rakhwā diyā thā. chabūtarā sāṛhe 7 fuṭ lamb, sāṛhe 7 fuṭ chauṛā aur sāṛhe 4 fuṭ ūṅchā thā. ab sulaimān us par chaṛh kar pūrī jamā'at ke deḳhte deḳhte jhuk gayā. apne hāthoṅ ko āsmān kī taraf uṭhā kar

¹⁴us ne duā kī, “ai rab isrāīl ke ḳhudā, tujh jaisā koī ḳhudā nahīṅ hai, na āsmān aur na zamīn par. tū apnā wuh ahd qāim rakhtā hai jise tū ne apnī qaum ke sāth bāndhā hai aur apnī mehrbānī un sab par zāhir kartā hai jo pūre dil se terī rāh par chalte haiṅ.

¹⁵tū ne apne ḳhādim dāūd se kiyā huā wādā pūrā kiyā hai. jo bāt tū ne apne muṅh se mere bāp se kī wuh tū ne apne hāth se āj hī pūrī kī hai.

¹⁶ai rab isrāīl ke ḳhudā, ab apnī dūsrī bāt bhī pūrī kar jo tū ne apne ḳhādim dāūd se kī thī. kyūṅki tū ne mere bāp se wādā kiyā thā, ‘agar terī aulād terī tarah apne chāl-chalan par dhyān de kar merī sharīat ke mutābiq mere huzūr chaltī rahe to isrāīl par us kī hukūmat hameshā tak qāim rahegī.’

¹⁷ai rab isrāīl ke ḳhudā, ab barāh-e-karm apnā yih wādā pūrā kar jo tū ne apne ḳhādim dāūd se kiyā hai.

¹⁸lekin kyā allāh wāqaī zamīn par insān ke darmiyān sukūnat karegā? nahīṅ, tū to bulandtarīn āsmān meṅ bhī samā nahīṅ saktā! to phir yih makān jo maiṅ ne banāyā hai kis tarah terī sukūnatgāh ban saktā hai?

¹⁹ai rab mere ḳhudā, to bhī apne ḳhādim kī duā aur iltijā sun jab maiṅ tere huzūr pukārte hue iltimās kartā hūṅ

²⁰ki barāh-e-karm din rāt is imārat kī nigarānī kar! kyūṅki yih wuh jagah hai jis ke bāre meṅ tū ne ḳhud farmāyā, ‘yahāṅ merā nām sukūnat karegā.’ chunāṅche apne ḳhādim kī guzārish sun jo maiṅ is maqām kī taraf ruḳh kie hue kartā hūṅ.

²¹jab ham is maqām kī taraf ruḳh karke duā kareṅ to apne ḳhādim aur apnī qaum kī iltijāeṅ sun. āsmān par apne taḳht se hamārī sun. aur jab sunegā to hamāre gunāhoṅ ko muāf kar!

²²agar kisī par ilzām lagāyā jāe aur use yahāṅ terī qurbāngāh ke sāmne lāyā jāe tāki half uṭhā kar wādā kare ki maiṅ bequsūr hūṅ

²³to barāh-e-karm āsmān par se sun kar apne ḳhādimoṅ kā insāf kar. qusūrwār ko sazā de kar us ke apne sar par wuh kuchh āne de jo us se sarzad huā hai, aur bequsūr ko be'ilzām qarār de aur us kī rāstbāzī kā badlā de.

²⁴ho saktā hai kisī waqt terī qaum isrāīl terā gunāh kare aur natīje meṅ dushman ke sāmne shikast khāe. agar isrāīlī āḳhirkār tere pās lauṭ āeṅ aur tere nām kī tamjīd karke yahāṅ is ghar meṅ tere huzūr duā aur iltimās kareṅ

²⁵to āsmān par se un kī faryād sun lenā. apnī qaum isrāīl kā gunāh muāf karke unheṅ dubārā us mulk meṅ wāpas lānā jo tū ne unheṅ aur un ke bāpdādā ko de diyā thā.

²⁶ho saktā hai isrāīlī terā itnā sangīn gunāh kareṅ ki kāl paṛe aur baṛī der tak bārish na barse. agar wuh āḳhirkār is ghar kī taraf ruḳh karke tere nām kī tamjīd kareṅ aur terī sazā ke bāis apnā gunāh chhoṛ kar lauṭ āeṅ

²⁷to āsmān par se un kī faryād sun lenā. apne ḳhādimoṅ aur apnī qaum isrāīl ko muāf kar, kyūṅki tū hī unheṅ achchhī rāh kī tālīm detā hai. tab us mulk par dubārā bārish barsā de jo tū ne apnī qaum ko mīrās meṅ de diyā hai.

²⁸ho saktā hai isrāīl meṅ kāl paṛ jāe, anāj kī fasal kisī bīmārī, phaphūṅdī, ṭiḍḍiyoṅ yā kīṛoṅ se muta'assir ho jāe, yā dushman kisī shahr kā muhāsarā kare. jo bhī musībat yā bīmārī ho,

²⁹agar koī isrāīlī yā terī pūrī qaum us kā sabab jān kar apne hāthoṅ ko is ghar kī taraf baṛhāe aur tujh se iltimās kare

³⁰to āsmān par apne taḳht se un kī faryād sun lenā. unheṅ muāf karke har ek ko us kī tamām harkatoṅ kā badlā de, kyūṅki sirf tū hī har insān ke dil ko jāntā hai.

³¹phir jitnī der wuh us mulk meṅ zindagī guzāreṅge jo tū ne hamāre bāpdādā ko diyā thā utnī der wuh terā ḳhauf mān kar terī rāhoṅ par chalte raheṅge.

³²āindā pardesī bhī tere azīm nām, terī baṛī qudrat aur tere zabardast kāmoṅ ke sabab se āeṅge aur is ghar kī taraf ruḳh karke duā kareṅge. agarche wuh terī qaum isrāīl ke nahīṅ hoṅge

³³to bhī āsmān par se un kī faryād sun lenā. jo bhī darḳhwāst wuh pesh kareṅ wuh pūrī karnā tāki duniyā kī tamām aqwām terā nām jān kar terī qaum isrāīl kī tarah hī terā ḳhauf māneṅ aur jān leṅ ki jo imārat maiṅ ne tāmīr kī hai us par tere hī nām kā ṭhappā lagā hai.

³⁴ho saktā hai terī qaum ke mard terī hidāyat ke mutābiq apne dushman se laṛne ke lie nikleṅ. agar wuh tere chune hue shahr aur us imārat kī taraf ruḳh karke duā kareṅ jo maiṅ ne tere nām ke lie tāmīr kī hai

³⁵to āsmān par se un kī duā aur iltimās sun kar un ke haq meṅ insāf qāim rakhnā.

³⁶ho saktā hai wuh terā gunāh kareṅ, aisī harkateṅ to ham sab se sarzad hotī rahtī haiṅ, aur natīje meṅ tū nārāz ho kar unheṅ dushman ke hawāle kar de jo unheṅ qaid karke kisī dūrdarāz yā qarībī mulk meṅ le jāe.

³⁷shāyad wuh jilāwatanī meṅ taubā karke dubārā terī taraf rujū kareṅ aur tujh se iltimās kareṅ, ‘ham ne gunāh kiyā hai, ham se ġhaltī huī hai, ham ne bedīn harkateṅ kī haiṅ.’

³⁸agar wuh aisā karke apnī qaid ke mulk meṅ apne pūre dil-o-jān se dubārā terī taraf rujū kareṅ aur terī taraf se bāpdādā ko die gae mulk, tere chune hue shahr aur us imārat kī taraf ruḳh karke duā kareṅ jo maiṅ ne tere nām ke lie tāmīr kī hai

³⁹to āsmān par apne taḳht se un kī duā aur iltimās sun lenā. un ke haq meṅ insāf qāim karnā, aur apnī qaum ke gunāhoṅ ko muāf kar denā.

⁴⁰ai mere ḳhudā, terī āṅkheṅ aur tere kān un duāoṅ ke lie khule raheṅ jo is jagah par kī jātī haiṅ.

⁴¹ai rab ḳhudā, uṭh kar apnī ārāmgāh ke pās ā, tū aur ahd kā sandūq jo terī qudrat kā izhār hai. ai rab ḳhudā, tere imām najāt se mulabbas ho jāeṅ, aur tere īmāndār terī bhalāī kī ḳhushī manāeṅ.

⁴²ai rab ḳhudā, apne masah kie hue ḳhādim ko radd na kar balki us shafqat ko yād kar jo tū ne apne ḳhādim dāūd par kī hai.”