Read Roman Urdu Geo 2-tawārīḳh 9 Bible Online

2-tawārīḳh 9 - Roman Urdu Geo bible

2-tawārīḳh 9

¹sulaimān kī shohrat sabā kī malikā tak pahuṅch gaī. jab us ne us ke bāre meṅ sunā to wuh sulaimān se milne ke lie rawānā huī tāki use mushkil paheliyāṅ pesh karke us kī dānishmandī jāṅch le. wuh nihāyat baṛe qāfile ke sāth yarūshalam pahuṅchī jis ke ūṅṭ balsān, kasrat ke sone aur qīmtī jawāhir se lade hue the. malikā kī sulaimān se mulāqāt huī to us ne us se wuh tamām mushkil sawālāt pūchhe jo us ke zahan meṅ the.

²sulaimān us ke har sawāl kā jawāb de sakā. koī bhī bāt itnī pechīdā nahīṅ thī ki wuh us kā matlab malikā ko batā na saktā.

³sabā kī malikā sulaimān kī hikmat aur us ke nae mahal se bahut muta'assir huī.

⁴us ne bādshāh kī mezoṅ par ke muḳhtalif khāne dekhe aur yih ki us ke afsar kis tartīb se us par biṭhāe jāte the. us ne bairoṅ kī ḳhidmat, un kī shāndār wardiyoṅ aur sāqiyoṅ kī shāndār wardiyoṅ par bhī ġhaur kiyā. jab us ne in bātoṅ ke ilāwā bhasm hone wālī wuh qurbāniyāṅ bhī dekhīṅ jo sulaimān rab ke ghar meṅ chaṛhātā thā to malikā hakkā-bakkā rah gaī.

⁵wuh bol uṭhī, “wāqaī, jo kuchh maiṅ ne apne mulk meṅ āp ke shāhkāroṅ aur hikmat ke bāre meṅ sunā thā wuh durust hai.

⁶jab tak maiṅ ne ḳhud ā kar yih sab kuchh apnī āṅkhoṅ se na dekhā mujhe yaqīn nahīṅ ātā thā. lekin haqīqat meṅ mujhe āp kī zabardast hikmat ke bāre meṅ ādhā bhī nahīṅ batāyā gayā thā. wuh un riporṭoṅ se kahīṅ zyādā hai jo mujh tak pahuṅchī thīṅ.

⁷āp ke log kitne mubārak haiṅ! āp ke afsar kitne mubārak haiṅ jo musalsal āp ke sāmne khaṛe rahte aur āp kī dānish bharī bāteṅ sunte haiṅ!

⁸rab āp ke ḳhudā kī tamjīd ho jis ne āp ko pasand karke apne taḳht par biṭhāyā tāki rab apne ḳhudā kī ḳhātir hukūmat kareṅ. āp kā ḳhudā isrāīl se muhabbat rakhtā hai, aur wuh use abad tak qāim rakhnā chāhtā hai, isī lie us ne āp ko un kā bādshāh banā diyā hai tāki insāf aur rāstbāzī qāim rakheṅ.”

⁹phir malikā ne sulaimān ko taqrīban 4,000 kilogrām sonā, bahut zyādā balsān aur jawāhir de die. pahle kabhī bhī utnā balsān isrāīl meṅ nahīṅ lāyā gayā thā jitnā us waqt sabā kī malikā lāī.

¹⁰hīrām aur sulaimān ke ādmī ofīr se na sirf sonā lāe balki unhoṅ ne qīmtī lakaṛī aur jawāhir bhī isrāīl tak pahuṅchāe.

¹¹jitnī qīmtī lakaṛī un dinoṅ meṅ yahūdāh meṅ darāmad huī utnī pahle kabhī wahāṅ lāī nahīṅ gaī thī. is lakaṛī se bādshāh ne rab ke ghar aur apne mahal ke lie sīṛhiyāṅ banwāīṅ. yih mausīqāroṅ ke sarod aur sitār banāne ke lie bhī istemāl huī.

¹²sulaimān bādshāh ne apnī taraf se sabā kī malikā ko bahut se tohfe die. yih un chīzoṅ se zyādā the jo malikā apne mulk se us ke pās lāī thī. jo bhī malikā chāhtī thī yā us ne māṅgā wuh use diyā gayā. phir wuh apne naukar-chākaroṅ aur afsaroṅ ke hamrāh apne watan wāpas chalī gaī.

¹³jo sonā sulaimān ko sālānā miltā thā us kā wazn taqrīban 23,000 kilogrām thā.

¹⁴is meṅ wuh ṭaiks shāmil nahīṅ the jo use saudāgaroṅ, tājiroṅ, arab bādshāhoṅ aur zil'oṅ ke afsaroṅ se milte the. yih use sonā aur chāṅdī dete the.

¹⁵sulaimān bādshāh ne 200 baṛī aur 300 chhoṭī ḍhāleṅ banwāīṅ. un par sonā manḍhā gayā. har baṛī ḍhāl ke lie taqrīban 7 kilogrām sonā istemāl huā aur har chhoṭī ḍhāl ke lie sāṛhe 3 kilogrām. sulaimān ne unheṅ ‘lubnān kā jangal’ nāmī mahal meṅ mahfūz rakhā.

¹⁷in ke ilāwā bādshāh ne hāthīdāṅt se ārāstā ek baṛā taḳht banwāyā jis par ḳhālis sonā chaṛhāyā gayā.

¹⁸us ke har bāzū ke sāth sherbabar kā mujassamā thā. taḳht kuchh ūṅchā thā, aur bādshāh chhih pāe wālī sīṛhī par chaṛh kar us par baiṭhtā thā. dāīṅ aur bāīṅ taraf har pāe par sherbabar kā mujassamā thā. pāoṅ ke lie sone kī chaukī banāī gaī thī. is qism kā taḳht kisī aur saltanat meṅ nahīṅ pāyā jātā thā.

²⁰sulaimān ke tamām pyāle sone ke the, balki ‘lubnān kā jangal’ nāmī mahal meṅ tamām bartan ḳhālis sone ke the. koī bhī chīz chāṅdī kī nahīṅ thī, kyūṅki sulaimān ke zamāne meṅ chāṅdī kī koī qadar nahīṅ thī.

²¹bādshāh ke apne bahrī jahāz the jo hīrām ke bandoṅ ke sāth mil kar muḳhtalif jaghoṅ par jāte the. har tīn sāl ke bād wuh sone-chāṅdī, hāthīdāṅt, bandaroṅ aur moroṅ se lade hue wāpas āte the.

²²sulaimān kī daulat aur hikmat duniyā ke tamām bādshāhoṅ se kahīṅ zyādā thī.

²³duniyā ke tamām bādshāh us se milne kī koshish karte rahe tāki wuh hikmat sun leṅ jo allāh ne us ke dil meṅ ḍāl dī thī.

²⁴sāl-ba-sāl jo bhī sulaimān ke darbār meṅ ātā wuh koī na koī tohfā lātā. yūṅ use sone-chāṅdī ke bartan, qīmtī libās, hathiyār, balsān, ghoṛe aur ḳhachchar milte rahe.

²⁵ghoṛoṅ aur rathoṅ ko rakhne ke lie sulaimān ke 4,000 thān the. us ke 12,000 ghoṛe the. kuchh us ne rathoṅ ke lie maḳhsūs kie gae shahroṅ meṅ aur kuchh yarūshalam meṅ apne pās rakhe.

²⁶sulaimān un tamām bādshāhoṅ kā hukmrān thā jo daryā-e-furāt se le kar filistiyoṅ ke mulk kī misrī sarhad tak hukūmat karte the.

²⁷bādshāh kī sargarmiyoṅ ke bāis chāṅdī patthar jaisī ām ho gaī aur deodār kī qīmtī lakaṛī maġhrib ke nashebī pahāṛī ilāqe kī anjīr-tūt kī sastī lakaṛī jaisī ām ho gaī.

²⁸bādshāh ke ghoṛe misr aur dīgar kaī mulkoṅ se darāmad hote the.

²⁹sulaimān kī zindagī ke bāre meṅ mazīd bāteṅ shurū se le kar āḳhir tak ‘nātan nabī kī tārīḳh,’ sailā ke rahne wāle nabī aḳhiyāh kī kitāb ‘aḳhiyāh kī nabuwwat’ aur yarubiām bin nabāt se mutālliq kitāb ‘iddū ġhaibbīn kī royāeṅ’ meṅ darj haiṅ.

³⁰sulaimān 40 sāl ke daurān pūre isrāīl par hukūmat kartā rahā. us kā dār-ul-hukūmat yarūshalam thā.

³¹jab wuh mar kar apne bāpdādā se jā milā to use yarūshalam ke us hisse meṅ dafn kiyā gayā jo ‘dāūd kā shahr’ kahlātā hai. phir us kā beṭā rahubiām taḳhtnashīn huā.