Read Roman Urdu Geo azrā 3 Bible Online

azrā 3 - Roman Urdu Geo bible

azrā 3

¹sātweṅ mahīne kī ibtidā meṅ pūrī qaum yarūshalam meṅ jamā huī. us waqt isrāīlī apnī ābādiyoṅ meṅ dubārā ābād ho gae the.

²jamā hone kā maqsad isrāīl ke ḳhudā kī qurbāngāh ko nae sire se tāmīr karnā thā tāki mard-e-ḳhudā mūsā kī sharīat ke mutābiq us par bhasm hone wālī qurbāniyāṅ pesh kī jā sakeṅ. chunāṅche yashūa bin yūsadaq aur zarubbābal bin siyāltī'el kām meṅ lag gae. yashūa ke imām bhāiyoṅ aur zarubbābal ke bhāiyoṅ ne un kī madad kī.

³go wuh mulk meṅ rahne wālī dīgar qaumoṅ se sahme hue the tāham unhoṅ ne qurbāngāh ko us kī purānī bunyād par tāmīr kiyā aur subhshām us par rab ko bhasm hone wālī qurbāniyāṅ pesh karne lage.

⁴jhoṅpṛiyoṅ kī īd unhoṅ ne sharīat kī hidāyat ke mutābiq manāī. us hafte ke har din unhoṅ ne bhasm hone wālī utnī qurbāniyāṅ chaṛhāīṅ jitnī zarūrī thīṅ.

⁵us waqt se imām bhasm hone wālī tamām darkār qurbāniyāṅ bāqāidagī se pesh karne lage, nīz nae chāṅd kī īdoṅ aur rab kī bāqī maḳhsūs-o-muqaddas īdoṅ kī qurbāniyāṅ. qaum apnī ḳhushī se bhī rab ko qurbāniyāṅ pesh kartī thī.

⁶go rab ke ghar kī bunyād abhī ḍālī nahīṅ gaī thī to bhī isrāīlī sātweṅ mahīne ke pahle din se rab ko bhasm hone wālī qurbāniyāṅ pesh karne lage.

⁷phir unhoṅ ne rājoṅ aur kārīgaroṅ ko paise de kar kām par lagāyā aur sūr aur saidā ke bāshindoṅ se deodār kī lakaṛī mangwāī. yih lakaṛī lubnān ke pahāṛī ilāqe se samundar tak lāī gaī aur wahāṅ se samundar ke rāste yāfā pahuṅchāī gaī. isrāīliyoṅ ne muāwaze meṅ khāne-pīne kī chīzeṅ aur zaitūn kā tel de diyā. fāras ke bādshāh ḳhoras ne unheṅ yih karwāne kī ijāzat dī thī.

⁸jilāwatanī se wāpas āne ke dūsre sāl ke dūsre mahīne meṅ rab ke ghar kī nae sire se tāmīr shurū huī. is kām meṅ zarubbābal bin siyāltī'el, yashūa bin yūsadaq, dīgar imām aur lāwī aur watan meṅ wāpas āe hue bāqī tamām isrāīlī sharīk hue. tāmīrī kām kī nigarānī un lāwiyoṅ ke zimme lagā dī gaī jin kī umr 20 sāl yā is se zāid thī.

⁹zail ke log mil kar rab kā ghar banāne wāloṅ kī nigarānī karte the: yashūa apne beṭoṅ aur bhāiyoṅ samet, qadmī'el aur us ke beṭe jo hūdāwiyāh kī aulād the aur hanadād ke ḳhāndān ke lāwī.

¹⁰rab ke ghar kī bunyād rakhte waqt imām apne muqaddas libās pahne hue sāth khaṛe ho gae aur turam bajāne lage. āsaf ke ḳhāndān ke lāwī sāth sāth jhāṅjh bajāne aur rab kī satāish karne lage. sab kuchh isrāīl ke bādshāh dāūd kī hidāyāt ke mutābiq huā.

¹¹wuh hamd-o-sanā ke gīt se rab kī tārīf karne lage, “wuh bhalā hai, aur isrāīl par us kī shafqat abadī hai!” jab hāzirīn ne dekhā ki rab ke ghar kī bunyād rakhī jā rahī hai to sab rab kī ḳhushī meṅ zordār nāre lagāne lage.

¹²lekin bahut se imām, lāwī aur ḳhāndānī sarparast hāzir the jinhoṅ ne rab kā pahlā ghar dekhā huā thā. jab un ke deḳhte deḳhte rab ke nae ghar kī bunyād rakhī gaī to wuh buland āwāz se rone lage jabki bāqī bahut sāre log ḳhushī ke nāre lagā rahe the.

¹³itnā shor thā ki ḳhushī ke nāroṅ aur rone kī āwāzoṅ meṅ imtiyāz na kiyā jā sakā. shor dūr dūr tak sunāī diyā.