Read Roman Urdu Geo azrā 5 Bible Online

azrā 5 - Roman Urdu Geo bible

azrā 5

¹ek din do nabī banām hajjī aur zakariyāh bin iddū uṭh kar isrāīl ke ḳhudā ke nām meṅ jo un ke ūpar thā yahūdāh aur yarūshalam ke yahūdiyoṅ ke sāmne nabuwwat karne lage.

²un ke hauslā-afzā alfāz sun kar zarubbābal bin siyāltī'el aur yashūa bin yūsadaq ne faislā kiyā ki ham dubārā yarūshalam meṅ allāh ke ghar kī tāmīr shurū kareṅge. donoṅ nabī is meṅ un ke sāth the aur un kī madad karte rahe.

³lekin jūṅ hī kām shurū huā to daryā-e-furāt ke maġhribī ilāqe ke gawarnar tattanī aur shatar-boznī apne hamḳhidmat afsaroṅ samet yarūshalam pahuṅche. unhoṅ ne pūchhā, “kis ne āp ko yih ghar banāne aur is kā ḍhāṅchā takmīl tak pahuṅchāne kī ijāzat dī?

⁴is kām ke lie zimmādār ādmiyoṅ ke nām hameṅ batāeṅ!”

⁵lekin un kā ḳhudā yahūdāh ke buzurgoṅ kī nigarānī kar rahā thā, is lie unheṅ rokā na gayā. kyūṅki logoṅ ne sochā ki pahle dārā bādshāh ko ittilā dī jāe. jab tak wuh faislā na kare us waqt tak kām rokā na jāe.

⁶phir daryā-e-furāt ke maġhribī ilāqe ke gawarnar tattanī, shatar-boznī aur un ke hamḳhidmat afsaroṅ ne dārā bādshāh ko zail kā ḳhat bhejā,

⁷“dārā bādshāh ko dil kī gahrāiyoṅ se salām kahte haiṅ!

⁸shahanshāh ko ilm ho ki sūbā yahūdāh meṅ jā kar ham ne dekhā ki wahāṅ azīm ḳhudā kā ghar banāyā jā rahā hai. us ke lie baṛe tarāshe hue patthar istemāl ho rahe haiṅ aur dīwāroṅ meṅ shahtīr lagāe jā rahe haiṅ. log baṛī jāṅfishānī se kām kar rahe haiṅ, aur makān un kī mehnat ke bāis tezī se ban rahā hai.

⁹ham ne buzurgoṅ se pūchhā, ‘kis ne āp ko yih ghar banāne aur is kā ḍhāṅchā takmīl tak pahuṅchāne kī ijāzat dī hai?’

¹⁰ham ne un ke nām bhī mālūm kie tāki likh kar āp ko bhej sakeṅ.

¹¹unhoṅ ne hameṅ jawāb diyā, ‘ham āsmān-o-zamīn ke ḳhudā ke ḳhādim haiṅ, aur ham us ghar ko az sar-e-nau tāmīr kar rahe haiṅ jo bahut sāl pahle yahāṅ qāim thā. isrāīl ke ek azīm bādshāh ne use qadīm zamāne meṅ banā kar takmīl tak pahuṅchāyā thā.

¹²lekin hamāre bāpdādā ne āsmān ke ḳhudā ko taish dilāyā, aur natīje meṅ us ne unheṅ bābal ke bādshāh nabūkadnazzar ke hawāle kar diyā jis ne rab ke ghar ko tabāh kar diyā aur qaum ko qaid karke bābal meṅ basā diyā.

¹³lekin bād meṅ jab ḳhoras bādshāh ban gayā to us ne apnī hukūmat ke pahle sāl meṅ hukm diyā ki allāh ke is ghar ko dubārā tāmīr kiyā jāe.

¹⁴sāth sāth us ne sone-chāṅdī kī wuh chīzeṅ wāpas kar dīṅ jo nabūkadnazzar ne yarūshalam meṅ allāh ke ghar se lūṭ kar bābal ke mandir meṅ rakh dī thīṅ. ḳhoras ne yih chīzeṅ ek ādmī ke sapurd kar dīṅ jis kā nām shesbazzar thā aur jise us ne yahūdāh kā gawarnar muqarrar kiyā thā.

¹⁵us ne use hukm diyā ki sāmān ko yarūshalam le jāo aur rab ke ghar ko purānī jagah par az sar-e-nau tāmīr karke yih chīzeṅ us meṅ mahfūz rakho.

¹⁶tab shesbazzar ne yarūshalam ā kar allāh ke ghar kī bunyād rakhī. usī waqt se yih imārat zer-e-tāmīr hai, agarche yih āj tak mukammal nahīṅ huī.’

¹⁷chunāṅche agar shahanshāh ko manzūr ho to wuh taftīsh kareṅ ki kyā bābal ke shāhī daftar meṅ koī aisī dastāwez maujūd hai jo is bāt kī tasdīq kare ki ḳhoras bādshāh ne yarūshalam meṅ rab ke ghar ko az sar-e-nau tāmīr karne kā hukm diyā. guzārish hai ki shahanshāh hameṅ apnā faislā pahuṅchā deṅ.”