Read Roman Urdu Geo azrā 7 Bible Online

azrā 7 - Roman Urdu Geo bible

azrā 7

¹in wāqiāt ke kāfī arse bād ek ādmī banām azrā bābal ko chhoṛ kar yarūshalam āyā. us waqt fāras ke bādshāh artaḳhshastā kī hukūmat thī. ādmī kā pūrā nām azrā bin sirāyāh bin azariyāh bin ḳhilqiyāh

²bin sallūm bin sadoq bin aḳhītūb

³bin amariyāh bin azariyāh bin mirāyot

⁴bin zaraḳhiyāh bin uzzī bin buqqī

⁵bin abīsūa bin fīnhās bin ilīazar bin hārūn thā. (hārūn imām-e-āzam thā).

⁶azrā pāk nawishtoṅ kā ustād aur us sharīat kā ālim thā jo rab isrāīl ke ḳhudā ne mūsā kī mārifat dī thī. jab azrā bābal se yarūshalam ke lie rawānā huā to shahanshāh ne us kī har ḳhwāhish pūrī kī, kyūṅki rab us ke ḳhudā kā shafīq hāth us par thā.

⁷kaī isrāīlī us ke sāth gae. imām, lāwī, gulūkār aur rab ke ghar ke darbān aur ḳhidmatgār bhī un meṅ shāmil the. yih artaḳhshastā bādshāh kī hukūmat ke sātweṅ sāl meṅ huā.

⁸qāfilā pahle mahīne ke pahle din [3] bābal se rawānā huā aur pāṅchweṅ mahīne ke pahle din [4] sahīh-salāmat yarūshalam pahuṅchā, kyūṅki allāh kā shafīq hāth azrā par thā.

¹⁰wajah yih thī ki azrā ne apne āp ko rab kī sharīat kī taftīsh karne, us ke mutābiq zindagī guzārne aur isrāīliyoṅ ko us ke ahkām aur hidāyāt kī tālīm dene ke lie waqf kiyā thā.

¹¹artaḳhshastā bādshāh ne azrā imām ko zail kā muḳhtārnāmā de diyā, usī azrā ko jo pāk nawishtoṅ kā ustād aur un ahkām aur hidāyāt kā ālim thā jo rab ne isrāīl ko dī thīṅ. muḳhtārnāme meṅ likhā thā,

¹²“az: shahanshāh artaḳhshastā azrā imām ko jo āsmān ke ḳhudā kī sharīat kā ālim hai, salām!

¹³maiṅ hukm detā hūṅ ki agar merī saltanat meṅ maujūd koī bhī isrāīlī āp ke sāth yarūshalam jā kar wahāṅ rahnā chāhe to wuh jā saktā hai. is meṅ imām aur lāwī bhī shāmil haiṅ,

¹⁴shahanshāh aur us ke sāt mushīr āp ko yahūdāh aur yarūshalam bhej rahe haiṅ tāki āp allāh kī us sharīat kī raushnī meṅ jo āp ke hāth meṅ hai yahūdāh aur yarūshalam kā hāl jāṅch leṅ.

¹⁵jo sonā-chāṅdī shahanshāh aur us ke mushīroṅ ne apnī ḳhushī se yarūshalam meṅ sukūnat karne wāle isrāīl ke ḳhudā ke lie qurbān kī hai use apne sāth le jāeṅ.

¹⁶nīz, jitnī bhī sonā-chāṅdī āp ko sūbā bābal se mil jāegī aur jitne bhī hadie qaum aur imām apnī ḳhushī se apne ḳhudā ke ghar ke lie jamā kareṅ unheṅ apne sāth le jāeṅ.

¹⁷un paisoṅ se bail, menḍhe, bheṛ ke bachche aur un kī qurbāniyoṅ ke lie darkār ġhallā aur mai kī nazareṅ ḳharīd leṅ, aur unheṅ yarūshalam meṅ apne ḳhudā ke ghar kī qurbāngāh par qurbān kareṅ.

¹⁸jo paise bach jāeṅ un ko āp aur āp ke bhāī waise ḳharch kar sakte haiṅ jaise āp ko munāsib lage. shart yih hai ki āp ke ḳhudā kī marzī ke mutābiq ho.

¹⁹yarūshalam meṅ apne ḳhudā ko wuh tamām chīzeṅ pahuṅchāeṅ jo āp ko rab ke ghar meṅ ḳhidmat ke lie dī jāeṅgī.

²⁰bāqī jo kuchh bhī āp ko apne ḳhudā ke ghar ke lie ḳharīdnā paṛe us ke paise shāhī ḳhazānā adā karegā.

²¹maiṅ, artaḳhshastā bādshāh daryā-e-furāt ke maġhrib meṅ rahne wāle tamām ḳhazānchiyoṅ ko hukm detā hūṅ ki har tarah se azrā imām kī mālī madad kareṅ. jo bhī āsmān ke ḳhudā kī sharīat kā yih ustād māṅge wuh use diyā jāe.

²²use 3,400 kilogrām chāṅdī, 16,000 kilogrām gandum, 2,200 liṭar mai aur 2,200 liṭar zaitūn kā tel tak denā. namak use utnā mile jitnā wuh chāhe.

²³dhyān se sab kuchh muhayyā kareṅ jo āsmān kā ḳhudā apne ghar ke lie māṅge. aisā na ho ki shahanshāh aur us ke beṭoṅ kī saltanat us ke ġhazab kā nishānā ban jāe.

²⁴nīz, āp ko ilm ho ki āp ko allāh ke is ghar meṅ ḳhidmat karne wāle kisī shaḳhs se bhī ḳharāj yā kisī qism kā ṭaiks lene kī ijāzat nahīṅ hai, ḳhwāh wuh imām, lāwī, gulūkār, rab ke ghar kā darbān yā us kā ḳhidmatgār ho.

²⁵ai azrā, jo hikmat āp ke ḳhudā ne āp ko atā kī hai us ke mutābiq majisṭreṭ aur qāzī muqarrar kareṅ jo āp kī qaum ke un logoṅ kā insāf kareṅ jo daryā-e-furāt ke maġhrib meṅ rahte haiṅ. jitne bhī āp ke ḳhudā ke ahkām jānte haiṅ wuh is meṅ shāmil haiṅ. aur jitne in ahkām se wāqif nahīṅ haiṅ unheṅ āp ko tālīm denī hai.

²⁶jo bhī āp ke ḳhudā kī sharīat aur shahanshāh ke qānūn kī ḳhilāfwarzī kare use saḳhtī se sazā dī jāe. jurm kī sanjīdagī kā lihāz karke use yā to sazā-e-maut dī jāe yā jilāwatan kiyā jāe, us kī milkiyat zabt kī jāe yā use jel meṅ ḍālā jāe.”

²⁷rab hamāre bāpdādā ke ḳhudā kī tamjīd ho jis ne shahanshāh ke dil ko yarūshalam meṅ rab ke ghar ko shāndār banāne kī tahrīk dī hai.

²⁸usī ne shahanshāh, us ke mushīroṅ aur tamām asar-o-rasūḳh rakhne wāle afsaroṅ ke diloṅ ko merī taraf māil kar diyā hai. chūṅki rab mere ḳhudā kā shafīq hāth mujh par thā is lie merā hauslā baṛh gayā, aur maiṅ ne isrāīl ke ḳhāndānī sarparastoṅ ko apne sāth isrāīl wāpas jāne ke lie jamā kiyā.