Read Roman Urdu Geo nahmiyāh 13 Bible Online

nahmiyāh 13 - Roman Urdu Geo bible

nahmiyāh 13

¹us din qaum ke sāmne mūsā kī sharīat kī tilāwat kī gaī. paṛhte paṛhte mālūm huā ki ammoniyoṅ aur moābiyoṅ ko kabhī bhī allāh kī qaum meṅ sharīk hone kī ijāzat nahīṅ.

²wajah yih hai ki in qaumoṅ ne misr se nikalte waqt isrāīliyoṅ ko khānā khilāne aur pānī pilāne se inkār kiyā thā. na sirf yih balki unhoṅ ne bal'ām ko paise die the tāki wuh isrāīlī qaum par lānat bheje, agarche hamāre ḳhudā ne lānat ko barkat meṅ tabdīl kiyā.

³jab hāzirīn ne yih hukm sunā to unhoṅ ne tamām ġhairyahūdiyoṅ ko jamā'at se ḳhārij kar diyā.

⁴is wākie se pahle rab ke ghar ke godāmoṅ par muqarrar imām iliyāsib ne apne rishtedār tūbiyāh

⁵ke lie ek baṛā kamrā ḳhālī kar diyā thā jis meṅ pahle ġhallā kī nazareṅ, baḳhūr aur kuchh ālāt rakhe jāte the. nīz, ġhallā, naī mai aur zaitūn ke tel kā jo daswāṅ hissā lāwiyoṅ, gulūkāroṅ aur darbānoṅ ke lie muqarrar thā wuh bhī us kamre meṅ rakhā jātā thā aur sāth sāth imāmoṅ ke lie muqarrar hissā bhī.

⁶us waqt maiṅ yarūshalam meṅ nahīṅ thā, kyūṅki bābal ke bādshāh artaḳhshastā kī hukūmat ke 32weṅ sāl meṅ maiṅ us ke darbār meṅ wāpas ā gayā thā. kuchh der bād maiṅ shahanshāh se ijāzat le kar dubārā yarūshalam ke lie rawānā huā.

⁷wahāṅ pahuṅch kar mujhe patā chalā ki iliyāsib ne kitnī burī harkat kī hai, ki us ne apne rishtedār tūbiyāh ke lie rab ke ghar ke sahan meṅ kamrā ḳhālī kar diyā hai.

⁸yih bāt mujhe nihāyat hī burī lagī, aur maiṅ ne tūbiyāh kā sārā sāmān kamre se nikāl kar phaiṅk diyā.

⁹phir maiṅ ne hukm diyā ki kamre nae sire se pāk-sāf kar die jāeṅ. jab aisā huā to maiṅ ne rab ke ghar kā sāmān, ġhallā kī nazareṅ aur baḳhūr dubārā wahāṅ rakh diyā.

¹⁰mujhe yih bhī mālūm huā ki lāwī aur gulūkār rab ke ghar meṅ apnī ḳhidmat ko chhoṛ kar apne khetoṅ meṅ kām kar rahe haiṅ. wajah yih thī ki unheṅ wuh hissā nahīṅ mil rahā thā jo un kā haq thā.

¹¹tab maiṅ ne zimmādār afsaroṅ ko jhiṛak kar kahā, “āp allāh ke ghar kā intizām itnī beparwāī se kyūṅ chalā rahe haiṅ?” maiṅ ne lāwiyoṅ aur gulūkāroṅ ko wāpas bulā kar dubārā un kī zimmādāriyoṅ par lagāyā.

¹²yih dekh kar tamām yahūdāh ġhallā, naī mai aur zaitūn ke tel kā daswāṅ hissā godāmoṅ meṅ lāne lagā.

¹³godāmoṅ kī nigarānī maiṅ ne salamiyāh imām, sadoq munshī aur fidāyāh lāwī ke sapurd karke hanān bin zakkūr bin mattaniyāh ko un kā madadgār muqarrar kiyā, kyūṅki chāroṅ ko qābil-e-etimād samjhā jātā thā. un hī ko imāmoṅ aur lāwiyoṅ meṅ un ke muqarrarā hisse taqsīm karne kī zimmādārī dī gaī.

¹⁴ai mere ḳhudā, is kām ke bāis mujhe yād kar! wuh sab kuchh na bhūl jo maiṅ ne wafādārī se apne ḳhudā ke ghar aur us ke intizām ke lie kiyā hai.

¹⁵us waqt maiṅ ne yahūdāh meṅ kuchh logoṅ ko dekhā jo sabat ke din angūr kā ras nichoṛ kar mai banā rahe the. dūsre ġhallā lā kar mai, angūr, anjīr aur dīgar muḳhtalif qism kī paidāwār ke sāth gadhoṅ par lād rahe aur yarūshalam pahuṅchā rahe the. yih sab kuchh sabat ke din ho rahā thā. maiṅ ne unheṅ tambīh kī ki sabat ke din ḳhurāk faroḳht na karnā.

¹⁶sūr ke kuchh ādmī bhī jo yarūshalam meṅ rahte the sabat ke din machhlī aur dīgar kaī chīzeṅ yarūshalam meṅ lā kar yahūdāh ke logoṅ ko bechte the.

¹⁷yih dekh kar maiṅ ne yahūdāh ke shurafā ko ḍāṅṭ kar kahā, “yih kitnī burī bāt hai! āp to sabat ke din kī behurmatī kar rahe haiṅ.

¹⁸jab āp ke bāpdādā ne aisā kiyā to allāh yih sārī āfat ham par aur is shahr par lāyā. ab āp sabat ke din kī behurmatī karne se allāh kā isrāīl par ġhazab mazīd baṛhā rahe haiṅ.”

¹⁹maiṅ ne hukm diyā ki jum'e ko yarūshalam ke darwāze shām ke us waqt band kie jāeṅ jab darwāze sāyoṅ meṅ ḍūb jāeṅ, aur ki wuh sabat ke pūre din band raheṅ. sabat ke iḳhtitām tak unheṅ kholne kī ijāzat nahīṅ thī. maiṅ ne apne kuchh logoṅ ko darwāzoṅ par khaṛā bhī kiyā tāki koī bhī apnā sāmān sabat ke din shahr meṅ na lāe.

²⁰yih dekh kar tājiroṅ aur bechne wāloṅ ne kaī martabā sabat kī rāt shahr se bāhar guzārī aur wahāṅ apnā māl bechne kī koshish kī.

²¹tab maiṅ ne unheṅ tambīh kī, “āp sabat kī rāt kyūṅ fasīl ke pās guzārte haiṅ? agar āp dubārā aisā kareṅ to āp ko hawālā-e-pulis kiyā jāegā.” us waqt se wuh sabat ke din āne se bāz āe.

²²lāwiyoṅ ko maiṅ ne hukm diyā ki apne āp ko pāk-sāf karke shahr ke darwāzoṅ kī pahrādārī kareṅ tāki ab se sabat kā din maḳhsūs-o-muqaddas rahe. ai mere ḳhudā, mujhe is nekī ke bāis yād karke apnī azīm shafqat ke mutābiq mujh par mehrbānī kar.

²³us waqt mujhe yih bhī mālūm huā ki bahut se yahūdī mardoṅ kī shādī ashdūd, ammon aur moāb kī auratoṅ se huī hai.

²⁴un ke ādhe bachche sirf ashdūd kī zabān yā koī aur ġhairmulkī zabān bol lete the. hamārī zabān se wuh nāwāqif hī the.

²⁵tab maiṅ ne unheṅ jhiṛkā aur un par lānat bhejī. bāz ek ke bāl noch noch kar maiṅ ne un kī piṭāī kī. maiṅ ne unheṅ allāh kī qasam khilāne par majbūr kiyā ki ham apne beṭe-beṭiyoṅ kī shādī ġhairmulkiyoṅ se nahīṅ karāeṅge.

²⁶maiṅ ne kahā, “isrāīl ke bādshāh sulaimān ko yād kareṅ. aisī hī shādiyoṅ ne use gunāh karne par uksāyā. us waqt us ke barābar koī bādshāh nahīṅ thā. allāh use pyār kartā thā aur use pūre isrāīl kā bādshāh banāyā. lekin use bhī ġhairmulkī bīwiyoṅ kī taraf se gunāh karne par uksāyā gayā.

²⁷ab āp ke bāre meṅ bhī yihī kuchh sunanā paṛtā hai! āp se bhī yihī baṛā gunāh sarzad ho rahā hai. ġhairmulkī auratoṅ se shādī karne se āp hamāre ḳhudā se bewafā ho gae haiṅ!”

²⁸imām-e-āzam iliyāsib ke beṭe yoyadā ke ek beṭe kī shādī sanballat haurūnī kī beṭī se huī thī, is lie maiṅ ne beṭe ko yarūshalam se bhagā diyā.

²⁹ai mere ḳhudā, unheṅ yād kar, kyūṅki unhoṅ ne imām ke uhde aur imāmoṅ aur lāwiyoṅ ke ahd kī behurmatī kī hai.

³⁰chunāṅche maiṅ ne imāmoṅ aur lāwiyoṅ ko har ġhairmulkī chīz se pāk-sāf karke unheṅ un kī ḳhidmat aur muḳhtalif zimmādāriyoṅ ke lie hidāyāt dīṅ.

³¹nīz, maiṅ ne dhyān diyā ki fasal kī pahlī paidāwār aur qurbāniyoṅ ko jalāne kī lakaṛī waqt par rab ke ghar meṅ pahuṅchāī jāe. ai mere ḳhudā, mujhe yād karke mujh par mehrbānī kar!.