Read Roman Urdu Geo nahmiyāh 4 Bible Online

nahmiyāh 4 - Roman Urdu Geo bible

nahmiyāh 4

¹jab sanballat ko patā chalā ki ham fasīl ko dubārā tāmīr kar rahe haiṅ to wuh āg-bagūlā ho gayā. hamārā mazāq uṛā uṛā kar

²us ne apne hamḳhidmat afsaroṅ aur sāmariyya ke faujiyoṅ kī maujūdagī meṅ kahā, “yih zaīf yahūdī kyā kar rahe haiṅ? kyā yih wāqaī yarūshalam kī qilābandī karnā chāhte haiṅ? kyā yih samajhte haiṅ ki chand ek qurbāniyāṅ pesh karke ham fasīl ko āj hī khaṛā kareṅge? wuh in jale hue pattharoṅ aur malbe ke is ḍher se kis tarah naī dīwār banā sakte haiṅ?”

³ammonī afsar tūbiyāh us ke sāth khaṛā thā. wuh bolā, “unheṅ karne do! dīwār itnī kamzor hogī ki agar lomṛī bhī us par chhalāṅg lagāe to gir jāegī.”

⁴ai hamāre ḳhudā, hamārī sun, kyūṅki log hameṅ haqīr jānte haiṅ. jin bātoṅ se unhoṅ ne hameṅ zalīl kiyā hai wuh un kī zillat kā bāis ban jāeṅ. baḳhsh de ki log unheṅ lūṭ leṅ aur unheṅ qaid karke jilāwatan kar deṅ.

⁵un kā qusūr nazarandāz na kar balki un ke gunāh tujhe yād raheṅ. kyūṅki unhoṅ ne fasīl ko tāmīr karne wāloṅ ko zalīl karne se tujhe taish dilāyā hai.

⁶muḳhālafat ke bāwujūd ham fasīl kī marammat karte rahe, aur hote hote pūrī dīwār kī ādhī ūṅchāī khaṛī huī, kyūṅki log pūrī lagan se kām kar rahe the.

⁷jab sanballat, tūbiyāh, araboṅ, ammoniyoṅ aur ashdūd ke bāshindoṅ ko ittilā milī ki yarūshalam kī fasīl kī tāmīr meṅ taraqqī ho rahī hai balki jo hisse ab tak khaṛe na ho sake the wuh bhī band hone lage haiṅ to wuh baṛe ġhusse meṅ ā gae.

⁸sab muttahid ho kar yarūshalam par hamlā karne aur us meṅ gaṛbaṛ paidā karne kī sāzisheṅ karne lage.

⁹lekin ham ne apne ḳhudā se iltimās karke pahredār lagāe jo hameṅ din rāt un se bachāe rakheṅ.

¹⁰us waqt yahūdāh ke log karāhne lage, “mazdūroṅ kī tāqat ḳhatm ho rahī hai, aur abhī tak malbe ke baṛe ḍher bāqī haiṅ. fasīl ko banānā hamāre bas kī bāt nahīṅ hai.”

¹¹dūsrī taraf dushman kah rahe the, “ham achānak un par ṭūṭ paṛeṅge. un ko us waqt patā chalegā jab ham un ke bīch meṅ hoṅge. tab ham unheṅ mār deṅge aur kām ruk jāegā.”

¹²jo yahūdī un ke qarīb rahte the wuh bār bār hamāre pās ā kar hameṅ ittilā dete rahe, “dushman chāroṅ taraf se āp par hamlā karne ke lie tayyār khaṛā hai.”

¹³tab maiṅ ne logoṅ ko fasīl ke pīchhe ek jagah khaṛā kar diyā jahāṅ dīwār sab se nīchī thī, aur wuh talwāroṅ, nezoṅ aur kamānoṅ se les apne ḳhāndānoṅ ke mutābiq khule maidān meṅ khaṛe ho gae.

¹⁴logoṅ kā jāizā le kar maiṅ khaṛā huā aur kahne lagā, “un se mat ḍareṅ! rab ko yād kareṅ jo azīm aur mahīb hai. zahan meṅ rakheṅ ki ham apne bhāiyoṅ, beṭoṅ beṭiyoṅ, bīwiyoṅ aur gharoṅ ke lie laṛ rahe haiṅ.”

¹⁵jab hamāre dushmanoṅ ko mālūm huā ki un kī sāzishoṅ kī ḳhabar ham tak pahuṅch gaī hai aur ki allāh ne un ke mansūbe ko nākām hone diyā to ham sab apnī apnī jagah par dubārā tāmīr ke kām meṅ lag gae.

¹⁶lekin us din se mere jawānoṅ kā sirf ādhā hissā tāmīrī kām meṅ lagā rahā. bāqī log nezoṅ, ḍhāloṅ, kamānoṅ aur zirābaktar se les pahrā dete rahe. afsar yahūdāh ke un tamām logoṅ ke pīchhe khaṛe rahe

¹⁷jo dīwār ko tāmīr kar rahe the. sāmān uṭhāne wāle ek hāth se hathiyār pakaṛe kām karte the.

¹⁸aur jo bhī dīwār ko khaṛā kar rahā thā us kī talwār kamr meṅ bandhī rahtī thī. jis ādmī ko turam bajā kar ḳhatre kā elān karnā thā wuh hameshā mere sāth rahā.

¹⁹maiṅ ne shurafā, buzurgoṅ aur bāqī logoṅ se kahā, “yih kām bahut hī baṛā aur wasī hai, is lie ham ek dūsre se dūr aur bikhre hue kām kar rahe haiṅ.

²⁰jūṅ hī āp ko turam kī āwāz sunāī de to bhāg kar āwāz kī taraf chale āeṅ. hamārā ḳhudā hamāre lie laṛegā!”

²¹ham pau phaṭne se le kar us waqt tak kām meṅ masrūf rahte jab tak sitāre nazar na āte, aur har waqt ādmiyoṅ kā ādhā hissā neze pakaṛe pahrā detā thā.

²²us waqt maiṅ ne sab ko yih hukm bhī diyā, “har ādmī apne madadgāroṅ ke sāth rāt kā waqt yarūshalam meṅ guzāre. phir āp rāt ke waqt pahrādārī meṅ bhī madad kareṅge aur din ke waqt tāmīrī kām meṅ bhī.”

²³un tamām dinoṅ ke daurān na maiṅ, na mere bhāiyoṅ, na mere jawānoṅ aur na mere pahredāroṅ ne kabhī apne kapṛe utāre. nīz, har ek apnā hathiyār pakaṛe rahā.