Read Roman Urdu Geo nahmiyāh 6 Bible Online

nahmiyāh 6 - Roman Urdu Geo bible

nahmiyāh 6

¹sanballat, tūbiyāh, jasham arabī aur hamāre bāqī dushmanoṅ ko patā chalā ki maiṅ ne fasīl ko takmīl tak pahuṅchāyā hai aur dīwār meṅ kahīṅ bhī ḳhālī jagah nazar nahīṅ ātī. sirf darwāzoṅ ke kiwāṛ ab tak lagāe nahīṅ gae the.

²tab sanballat aur jasham ne mujhe paiġhām bhejā, “ham wādī-e-onūs ke shahr kafīrīm meṅ āp se milnā chāhte haiṅ.” lekin mujhe mālūm thā ki wuh mujhe nuqsān pahuṅchānā chāhte haiṅ.

³is lie maiṅ ne qāsidoṅ ke hāth jawāb bhejā, “maiṅ is waqt ek baṛā kām takmīl tak pahuṅchā rahā hūṅ, is lie maiṅ ā nahīṅ saktā. agar maiṅ āp se milne āūṅ to pūrā kām ruk jāegā.”

⁴chār dafā unhoṅ ne mujhe yihī paiġhām bhejā aur har bār maiṅ ne wuhī jawāb diyā.

⁵pāṅchweṅ martabā jab sanballat ne apne mulāzim ko mere pās bhejā to us ke hāth meṅ ek khulā ḳhat thā.

⁶ḳhat meṅ likhā thā, “paṛosī mamālik meṅ afwāh phail gaī hai ki āp aur bāqī yahūdī baġhāwat kī tayyāriyāṅ kar rahe haiṅ. jasham ne is bāt kī tasdīq kī hai. log kahte haiṅ ki isī wajah se āp fasīl banā rahe haiṅ. in riporṭoṅ ke mutābiq āp un ke bādshāh baneṅge.

⁷kahā jātā hai ki āp ne nabiyoṅ ko muqarrar kiyā hai jo yarūshalam meṅ elān kareṅ ki āp yahūdāh ke bādshāh haiṅ. beshak aisī afwāheṅ shahanshāh tak bhī pahuṅcheṅgī. is lie āeṅ, ham mil kar ek dūsre se mashwarā kareṅ ki kyā karnā chāhie.”

⁸maiṅ ne use jawāb bhejā, “jo kuchh āp kah rahe haiṅ wuh jhūṭ hī jhūṭ hai. kuchh nahīṅ ho rahā, balki āp ne farzī kahānī ghaṛ lī hai!”

⁹asal meṅ dushman hameṅ ḍarānā chāhte the. unhoṅ ne sochā, “agar ham aisī bāteṅ kaheṅ to wuh himmat hār kar kām se bāz āeṅge.” lekin ab maiṅ ne zyādā azm ke sāth kām jārī rakhā.

¹⁰ek din maiṅ samāyāh bin dilāyāh bin mahetab-el se milne gayā jo tālā lagā kar ghar meṅ baiṭhā thā. us ne mujh se kahā, “āeṅ, ham allāh ke ghar meṅ jamā ho jāeṅ aur darwāzoṅ ko apne pīchhe band karke kunḍī lagāeṅ. kyūṅki log isī rāt āp ko qatl karne ke lie āeṅge.”

¹¹maiṅ ne etirāz kiyā, “kyā yih ṭhīk hai ki mujh jaisā ādmī bhāg jāe? yā kyā mujh jaisā shaḳhs jo imām nahīṅ hai rab ke ghar meṅ dāḳhil ho kar zindā rah saktā hai? hargiz nahīṅ! maiṅ aisā nahīṅ karūṅga!”

¹²maiṅ ne jān liyā ki samāyāh kī yih bāt allāh kī taraf se nahīṅ hai. sanballat aur tūbiyāh ne use rishwat dī thī, isī lie us ne mere bāre meṅ aisī peshgoī kī thī.

¹³is se wuh mujhe ḍarā kar gunāh karne par uksānā chāhte the tāki wuh merī badnāmī karke mujhe mazāq kā nishānā banā sakeṅ.

¹⁴ai mere ḳhudā, tūbiyāh aur sanballat kī yih burī harkateṅ mat bhūlnā! nauadiyāh nabiyā aur bāqī un nabiyoṅ ko yād rakh jinhoṅ ne mujhe ḍarāne kī koshish kī hai.

¹⁵fasīl ilūl ke mahīne ke 25weṅ din [1] yānī 52 dinoṅ meṅ mukammal huī.

¹⁶jab hamāre dushmanoṅ ko yih ḳhabar milī to paṛosī mamālik saham gae. aur wuh ehsās-e-kamtarī kā shikār ho gae. unhoṅ ne jān liyā ki allāh ne ḳhud yih kām takmīl tak pahuṅchāyā hai.

¹⁷un 52 dinoṅ ke daurān yahūdāh ke shurafā tūbiyāh ko ḳhat bhejte rahe aur us se jawāb milte rahe the.

¹⁸asal meṅ yahūdāh ke bahut se logoṅ ne qasam khā kar us kī madad karne kā wādā kiyā thā. wajah yih thī ki wuh sakaniyāh bin araḳh kā dāmād thā, aur us ke beṭe yūhanān kī shādī masullām bin barakiyāh kī beṭī se huī thī.

¹⁹tūbiyāh ke yih madadgār mere sāmne us ke nek kāmoṅ kī tārīf karte rahe aur sāth sāth merī har bāt use batāte rahe. phir tūbiyāh mujhe ḳhat bhejtā tāki maiṅ ḍar kar kām se bāz āūṅ.