Read Roman Urdu Geo āstar 3 Bible Online

āstar 3 - Roman Urdu Geo bible

āstar 3

¹kuchh der ke bād bādshāh ne hāmān bin hammadātā ajājī ko sarfarāz karke darbār meṅ sab se ālā uhdā diyā.

²jab kabhī hāmān ā maujūd hotā to shāhī sahan ke darwāze ke tamām shāhī afsar muṅh ke bal jhuk jāte, kyūṅki bādshāh ne aisā karne kā hukm diyā thā. lekin mardakī aisā nahīṅ kartā thā.

³yih dekh kar dīgar shāhī mulāzimoṅ ne us se pūchhā, “āp bādshāh ke hukm kī ḳhilāfwarzī kyūṅ kar rahe haiṅ?”

⁴us ne jawāb diyā, “maiṅ to yahūdī hūṅ.” roz-ba-roz dūsre use samjhāte rahe, lekin wuh na mānā. āḳhirkār unhoṅ ne hāmān ko ittilā dī, kyūṅki wuh deḳhnā chāhte the ki kyā wuh mardakī kā jawāb qabūl karegā yā nahīṅ.

⁵jab hāmān ne ḳhud dekhā ki mardakī mere sāmne muṅh ke bal nahīṅ jhuktā to wuh āg-bagūlā ho gayā.

⁶wuh fauran mardakī ko qatl karne ke mansūbe banāne lagā. lekin yih us ke lie kāfī nahīṅ thā. chūṅki use batāyā gayā thā ki mardakī yahūdī hai is lie wuh fārsī saltanat meṅ rahne wāle tamām yahūdiyoṅ ko halāk karne kā rāstā ḍhūṅḍne lagā.

⁷chunāṅche aḳhaswerus bādshāh kī hukūmat ke 12weṅ sāl ke pahle mahīne nīsān [4] meṅ hāmān kī maujūdagī meṅ qur'ā ḍālā gayā. qur'ā ḍālne se hāmān yahūdiyoṅ ko qatl karne kī sab se mubārak tārīḳh mālūm karnā chāhtā thā. (qur'ā ke lie ‘pūr’ kahā jātā thā.) is tarīqe se 12weṅ mahīne adār kā 13wāṅ din [5] niklā.

⁸tab hāmān ne bādshāh se bāt kī, “āp kī saltanat ke tamām sūboṅ meṅ ek qaum bikhrī huī hai jo apne āp ko dīgar qaumoṅ se alag rakhtī hai. us ke qawānīn dūsrī tamām qaumoṅ se muḳhtalif haiṅ, aur us ke afrād bādshāh ke qawānīn ko nahīṅ mānte. munāsib nahīṅ ki bādshāh unheṅ bardāsht kareṅ!

⁹agar bādshāh ko manzūr ho to elān kareṅ ki is qaum ko halāk kar diyā jāe. tab maiṅ shāhī ḳhazānoṅ meṅ 3,35,000 kilogrām chāṅdī jamā karā dūṅgā.”

¹⁰bādshāh ne apnī unglī se wuh angūṭhī utārī jo shāhī muhr lagāne ke lie istemāl hotī thī aur use yahūdiyoṅ ke dushman hāmān bin hammadātā ajājī ko de kar

¹¹kahā, “chāṅdī aur qaum āp hī kī haiṅ, us ke sāth wuh kuchh kareṅ jo āp ko achchhā lage.”

¹²pahle mahīne ke 13weṅ din [6] hāmān ne shāhī muharriroṅ ko bulāyā tāki wuh us kī tamām hidāyāt ke mutābiq ḳhat likh kar bādshāh ke gawarnaroṅ, sūboṅ ke dīgar hākimoṅ aur tamām qaumoṅ ke buzurgoṅ ko bhejeṅ. yih ḳhat har qaum ke apne tarz-e-tahrīr aur apnī zabān meṅ qalamband hue. unheṅ bādshāh kā nām le kar likhā gayā, phir shāhī angūṭhī kī muhr un par lagāī gaī. un meṅ zail kā elān kiyā gayā.

¹³“ek hī din meṅ tamām yahūdiyoṅ ko halāk aur pūre taur par tabāh karnā hai, ḳhwāh chhoṭe hoṅ yā baṛe, bachche hoṅ yā aurateṅ. sāth sāth un kī milkiyat bhī zabt kar lī jāe.” is ke lie 12weṅ mahīne adār kā 13wāṅ din [7] muqarrar kiyā gayā. yih elān tezrau qāsidoṅ ke zarī'e saltanat ke tamām sūboṅ meṅ pahuṅchāyā gayā

¹⁴tāki us kī tasdīq qānūnī taur par kī jāe aur tamām qaumeṅ muqarrarā din ke lie tayyār hoṅ.

¹⁵bādshāh ke hukm par qāsid chal nikle. yih elān sosan ke qile meṅ bhī kiyā gayā. phir bādshāh aur hāmān khāne-pīne ke lie baiṭh gae. lekin pūre shahr meṅ halchal mach gaī.