Read Roman Urdu Geo āstar 7 Bible Online

āstar 7 - Roman Urdu Geo bible

āstar 7

¹chunāṅche bādshāh aur hāmān āstar malikā kī ziyāfat meṅ sharīk hue.

²mai pīte waqt bādshāh ne pahle din kī tarah ab bhī pūchhā, “āstar malikā, ab batāeṅ, āp kyā chāhtī haiṅ? wuh āp ko diyā jāegā. apnī darḳhwāst pesh kareṅ, kyūṅki maiṅ saltanat ke ādhe hisse tak āp ko dene ke lie tayyār hūṅ.”

³malikā ne jawāb diyā, “agar bādshāh mujh se ḳhush hoṅ aur unheṅ merī bāt manzūr ho to merī guzārish pūrī kareṅ ki merī aur merī qaum kī jān bachī rahe.

⁴kyūṅki mujhe aur merī qaum ko un ke hāth bech ḍālā gayā hai jo hameṅ tabāh aur halāk karke nest-o-nābūd karnā chāhte haiṅ. agar ham bik kar ġhulām aur launḍiyāṅ ban jāte to maiṅ ḳhāmosh rahtī. aisī koī musībat bādshāh ko tang karne ke lie kāfī na hotī.”

⁵yih sun kar aḳhaswerus ne āstar se sawāl kiyā, “kaun aisī harkat karne kī jur'at kartā hai? wuh kahāṅ hai?”

⁶āstar ne jawāb diyā, “hamārā dushman aur muḳhālif yih sharīr ādmī hāmān hai!” tab hāmān bādshāh aur malikā se dahshat khāne lagā.

⁷bādshāh āg-bagūlā ho kar khaṛā ho gayā aur mai ko chhoṛ kar mahal ke bāġh meṅ ṭahalne lagā. hāmān pīchhe rah kar āstar se iltijā karne lagā, “merī jān bachāeṅ” kyūṅki use andāzā ho gayā thā ki bādshāh ne mujhe sazā-e-maut dene kā faislā kar liyā hai.

⁸jab bādshāh wāpas āyā to kyā deḳhtā hai ki hāmān us sofe par gir gayā hai jis par āstar ṭek lagāe baiṭhī hai. bādshāh garjā, “kyā yih ādmī yihīṅ mahal meṅ mere huzūr malikā kī ismatdarī karnā chāhtā hai?” jūṅ hī bādshāh ne yih alfāz kahe mulāzimoṅ ne hāmān ke muṅh par kapṛā ḍāl diyā.

⁹bādshāh kā ḳhwājāsarā ḳharbūnāh bol uṭhā, “hāmān ne apne ghar ke qarīb sūlī tayyār karwāī hai jis kī ūṅchāī 75 fuṭ hai. wuh mardakī ke lie banwāī gaī hai, us shaḳhs ke lie jis ne bādshāh kī jān bachāī.” bādshāh ne hukm diyā, “hāmān ko us se laṭkā do.”

¹⁰chunāṅche hāmān ko usī sūlī se laṭkā diyā gayā jo us ne mardakī ke lie banwāī thī. tab bādshāh kā ġhussā ṭhanḍā ho gayā.