Read Roman Urdu Geo āstar 9 Bible Online

āstar 9 - Roman Urdu Geo bible

āstar 9

¹phir 12weṅ mahīne adār kā 13wāṅ din [10] ā gayā jab bādshāh ke farmān par amal karnā thā. dushmanoṅ ne us din yahūdiyoṅ par ġhālib āne kī ummīd rakhī thī, lekin ab is ke ulaṭ huā, yahūdī ḳhud un par ġhālib āe jo un se nafrat rakhte the.

²saltanat ke tamām sūboṅ meṅ wuh apne apne shahroṅ meṅ jamā hue tāki un par hamlā kareṅ jo unheṅ nuqsān pahuṅchānā chāhte the. koī un kā muqābalā na kar sakā, kyūṅki dīgar tamām qaumoṅ ke log un se ḍar gae the.

³sāth sāth sūboṅ ke shurafā, gawarnaroṅ, hākimoṅ aur dīgar shāhī afsaroṅ ne yahūdiyoṅ kī madad kī, kyūṅki mardakī kā ḳhauf un par tārī ho gayā thā,

⁴aur darbār meṅ us ke ūṅche uhde aur us ke baṛhte hue asar-o-rasūḳh kī ḳhabar tamām sūboṅ meṅ phail gaī thī.

⁵us din yahūdiyoṅ ne apne dushmanoṅ ko talwār se mār ḍālā aur halāk karke nest-o-nābūd kar diyā. jo bhī un se nafrat rakhtā thā us ke sāth unhoṅ ne jo jī chāhā sulūk kiyā.

⁶sosan ke qile meṅ unhoṅ ne 500 ādmiyoṅ ko mār ḍālā,

⁷nīz yahūdiyoṅ ke dushman hāmān ke 10 beṭoṅ ko bhī. un ke nām parshandātā, dalfūn, aspātā, porātā, adaliyāh, arīdātā, parmashtā, arīsī, aridī aur waizātā the. lekin yahūdiyoṅ ne un kā māl na lūṭā.

¹¹usī din bādshāh ko ittilā dī gaī ki sosan ke qile meṅ kitne afrād halāk hue the.

¹²tab us ne āstar malikā se kahā, “sirf yahāṅ sosan ke qile meṅ yahūdiyoṅ ne hāmān ke 10 beṭoṅ ke ilāwā 500 ādmiyoṅ ko maut ke ghāṭ utār diyā hai. to phir unhoṅ ne dīgar sūboṅ meṅ kyā kuchh na kiyā hogā! ab mujhe batāeṅ, āp mazīd kyā chāhtī haiṅ? wuh āp ko diyā jāegā. apnī darḳhwāst pesh kareṅ, kyūṅki wuh pūrī kī jāegī.”

¹³āstar ne jawāb diyā, “agar bādshāh ko manzūr ho to sosan ke yahūdiyoṅ ko ijāzat dī jāe ki wuh āj kī tarah kal bhī apne dushmanoṅ par hamlā kareṅ. aur hāmān ke 10 beṭoṅ kī lāsheṅ sūlī se laṭkāī jāeṅ.”

¹⁴bādshāh ne ijāzat dī to sosan meṅ is kā elān kiyā gayā. tab hāmān ke 10 beṭoṅ ko sūlī se laṭkā diyā gayā,

¹⁵aur agle din yānī mahīne ke 14weṅ din [11] shahr ke yahūdī dubārā jamā hue. is bār unhoṅ ne 300 ādmiyoṅ ko qatl kiyā. lekin unhoṅ ne kisī kā māl na lūṭā.

¹⁶saltanat ke sūboṅ ke bāqī yahūdī bhī mahīne ke 13weṅ din [12] apne difā ke lie jamā hue the. unhoṅ ne 75,000 dushmanoṅ ko qatl kiyā lekin kisī kā māl na lūṭā thā. ab wuh dubārā chain kā sāṅs le kar ārām se zindagī guzār sakte the. agle din unhoṅ ne ek dūsre kī ziyāfat karke ḳhushī kā baṛā jashn manāyā.

¹⁸sosan ke yahūdiyoṅ ne mahīne ke 13weṅ aur 14weṅ din jamā ho kar apne dushmanoṅ par hamlā kiyā thā, is lie unhoṅ ne 15weṅ din ḳhushī kā baṛā jashn manāyā.

¹⁹yihī wajah hai ki dehāt aur khule shahroṅ meṅ rahne wāle yahūdī āj tak 12weṅ mahīne ke 14weṅ din [13] jashn manāte hue ek dūsre kī ziyāfat karte aur ek dūsre ko tohfe dete haiṅ.

²⁰jo kuchh us waqt huā thā use mardakī ne qalamband kar diyā. sāth sāth us ne fārsī saltanat ke qarībī aur dūrdarāz ke tamām sūboṅ meṅ ābād yahūdiyoṅ ko ḳhat likh die

²¹jin meṅ us ne elān kiyā, “ab se sālānā adār mahīne ke 14weṅ aur 15weṅ din jashn manānā hai.

²²ḳhushī manāte hue ek dūsre kī ziyāfat karnā, ek dūsre ko tohfe denā aur ġharīboṅ meṅ ḳhairāt taqsīm karnā, kyūṅki in dinoṅ ke daurān āp ko apne dushmanoṅ se sukūn hāsil huā hai, āp kā dukh sukh meṅ aur āp kā mātam shādmānī meṅ badal gayā.”

²³mardakī kī in hidāyāt ke mutābiq in do dinoṅ kā jashn dastūr ban gayā.

²⁴īd kā nām ‘pūrīm’ paṛ gayā, kyūṅki jab yahūdiyoṅ kā dushman hāmān bin hammadātā ajājī un sab ko halāk karne kā mansūbā bāndh rahā thā to us ne yahūdiyoṅ ko mārne kā sab se mubārak din mālūm karne ke lie qur'ā banām pūr ḍāl diyā. jab aḳhaswerus ko sab kuchh mālūm huā to us ne hukm diyā ki hāmān ko wuh sazā dī jāe jis kī tayyāriyāṅ us ne yahūdiyoṅ ke lie kī thīṅ. tab use us ke beṭoṅ samet phāṅsī se laṭkāyā gayā. chūṅki yahūdī is tajribe se guzare the aur mardakī ne hidāyat dī thī

²⁷is lie wuh muttafiq hue ki ham sālānā isī waqt yih do din ain hidāyāt ke mutābiq manāeṅge. yih dastūr na sirf hamārā farz hai, balki hamārī aulād aur un ġhairyahūdiyoṅ kā bhī jo yahūdī mazhab meṅ sharīk ho jāeṅge.

²⁸lāzim hai ki jo kuchh huā hai har nasl aur har ḳhāndān use yād karke manātā rahe, ḳhwāh wuh kisī bhī sūbe yā shahr meṅ kyūṅ na ho. zarūrī hai ki yahūdī pūrīm kī īd manāne kā dastūr kabhī na bhūleṅ, ki us kī yād un kī aulād meṅ se kabhī bhī miṭ na jāe.

²⁹malikā āstar bint abīḳhail aur mardakī yahūdī ne pūre iḳhtiyār ke sāth pūrīm kī īd ke bāre meṅ ek aur ḳhat likh diyā tāki us kī tasdīq ho jāe.

³⁰yih ḳhat fārsī saltanat ke 127 sūboṅ meṅ ābād tamām yahūdiyoṅ ko bhejā gayā. salāmatī kī duā aur apnī wafādārī kā izhār karne ke bād

³¹malikā aur mardakī ne unheṅ dubārā hidāyat kī, “jis tarah ham ne farmāyā hai, yih īd lāziman muta'ayyin auqāt ke ain mutābiq manānī hai. ise manāne ke lie yūṅ muttafiq ho jāeṅ jis tarah āp ne apne aur apnī aulād ke lie rozā rakhne aur mātam karne ke din muqarrar kie haiṅ.”

³²apne is farmān se āstar ne pūrīm kī īd aur use manāne ke qawāid kī tasdīq kī, aur yih tārīḳhī kitāb meṅ darj kiyā gayā.