Read Roman Urdu Geo ḳhurūj 1 Bible Online

ḳhurūj 1 - Roman Urdu Geo bible

ḳhurūj 1

¹zail meṅ un beṭoṅ ke nām haiṅ jo apne bāp yāqūb aur apne ḳhāndānoṅ samet misr meṅ āe the:

²rūbin, shamāūn, lāwī, yahūdāh,

³ishkār, zabūlūn, binyamīn,

⁴dān, naftālī, jad aur āshar.

⁵us waqt yāqūb kī aulād kī tādād 70 thī. yūsuf to pahle hī misr ā chukā thā.

⁶misr meṅ rahte hue bahut din guzar gae. itne meṅ yūsuf, us ke tamām bhāī aur us nasl ke tamām log mar gae.

⁷isrāīlī phale phūle aur tādād meṅ bahut baṛh gae. natīje meṅ wuh nihāyat hī tāqatwar ho gae. pūrā mulk un se bhar gayā.

⁸hote hote ek nayā bādshāh taḳhtnashīn huā jo yūsuf se nāwāqif thā.

⁹us ne apne logoṅ se kahā, “isrāīliyoṅ ko dekho. wuh tādād aur tāqat meṅ ham se baṛh gae haiṅ.

¹⁰āo, ham hikmat se kām leṅ, warnā wuh mazīd baṛh jāeṅge. aisā na ho ki wuh kisī jang ke mauqe par dushman kā sāth de kar ham se laṛeṅ aur mulk ko chhoṛ jāeṅ.”

¹¹chunāṅche misriyoṅ ne isrāīliyoṅ par nigarān muqarrar kie tāki begār meṅ un se kām karwā kar unheṅ dabāte raheṅ. us waqt unhoṅ ne pitom aur rāmsīs ke shahr tāmīr kie. in shahroṅ meṅ fir'aun bādshāh ke baṛe baṛe godām the.

¹²lekin jitnā isrāīliyoṅ ko dabāyā gayā utnā hī wuh tādād meṅ baṛhte aur phailte gae. āḳhirkār misrī un se dahshat khāne lage,

¹³aur wuh baṛī berahmī se un se kām karwāte rahe.

¹⁴isrāīliyoṅ kā guzārā nihāyat mushkil ho gayā. unheṅ gārā tayyār karke īṅṭeṅ banānā aur khetoṅ meṅ muḳhtalif qism ke kām karnā paṛe. is meṅ misrī un se baṛī berahmī se pesh āte rahe.

¹⁵isrāīliyoṅ kī do dāiyāṅ thīṅ jin ke nām sifrā aur fūā the. misr ke bādshāh ne un se kahā,

¹⁶“jab ibrānī aurateṅ tumheṅ madad ke lie bulāeṅ to ḳhabardār raho. agar laṛkā paidā ho to use jān se mār do, agar laṛkī ho to use jītā chhoṛ do.”

¹⁷lekin dāiyāṅ allāh kā ḳhauf māntī thīṅ. unhoṅ ne misr ke bādshāh kā hukm na mānā balki laṛkoṅ ko bhī jīne diyā.

¹⁸tab misr ke bādshāh ne unheṅ dubārā bulā kar pūchhā, “tum ne yih kyūṅ kiyā? tum laṛkoṅ ko kyūṅ jītā chhoṛ detī ho?”

¹⁹unhoṅ ne jawāb diyā, “ibrānī aurateṅ misrī auratoṅ se zyādā mazbūt haiṅ. bachche hamāre pahuṅchne se pahle hī paidā ho jāte haiṅ.”

²⁰chunāṅche allāh ne dāiyoṅ ko barkat dī, aur isrāīlī qaum tādād meṅ baṛh kar bahut tāqatwar ho gaī.

²¹aur chūṅki dāiyāṅ allāh kā ḳhauf māntī thīṅ is lie us ne unheṅ aulād de kar un ke ḳhāndānoṅ ko qāim rakhā.

²²āḳhirkār bādshāh ne apne tamām hamwatanoṅ se bāt kī, “jab bhī ibrāniyoṅ ke laṛke paidā hoṅ to unheṅ daryā-e-nīl meṅ phaiṅk denā. sirf laṛkiyoṅ ko zindā rahne do.”