Read Roman Urdu Geo ḳhurūj 10 Bible Online

ḳhurūj 10 - Roman Urdu Geo bible

ḳhurūj 10

¹phir rab ne mūsā se kahā, “fir'aun ke pās jā, kyūṅki maiṅ ne us kā aur us ke darbāriyoṅ kā dil saḳht kar diyā hai tāki un ke darmiyān apne mojizoṅ aur apnī qudrat kā izhār kar sakūṅ

²aur tum apne beṭe-beṭiyoṅ aur pote-potiyoṅ ko sunā sako ki maiṅ ne misriyoṅ ke sāth kyā sulūk kiyā hai aur un ke darmiyān kis tarah ke mojize karke apnī qudrat kā izhār kiyā hai. yūṅ tum jān loge ki maiṅ rab hūṅ.”

³mūsā aur hārūn fir'aun ke pās gae. unhoṅ ne us se kahā, “rab ibrāniyoṅ ke ḳhudā kā farmān hai, ‘tū kab tak mere sāmne hathiyār ḍālne se inkār karegā? merī qaum ko merī ibādat karne ke lie jāne de,

⁴warnā maiṅ kal tere mulk meṅ ṭiḍḍiyāṅ lāūṅgā.

⁵un ke ġhol zamīn par yūṅ chhā jāeṅge ki zamīn nazar hī nahīṅ āegī. jo kuchh oloṅ ne tabāh nahīṅ kiyā use wuh chaṭ kar jāeṅgī. bache hue daraḳhtoṅ ke patte bhī ḳhatm ho jāeṅge.

⁶tere mahal, tere uhdedāroṅ aur bāqī logoṅ ke ghar un se bhar jāeṅge. jab se misrī is mulk meṅ ābād hue haiṅ tum ne kabhī ṭiḍḍiyoṅ kā aisā saḳht hamlā nahīṅ dekhā hogā’.” yih kah kar mūsā palaṭ kar wahāṅ se chalā gayā.

⁷is par darbāriyoṅ ne fir'aun se bāt kī, “ham kab tak is mard ke jāl meṅ phaṅse raheṅ? isrāīliyoṅ ko rab apne ḳhudā kī ibādat karne ke lie jāne deṅ. kyā āp ko abhī tak mālūm nahīṅ ki misr barbād ho gayā hai?”

⁸tab mūsā aur hārūn ko fir'aun ke pās bulāyā gayā. us ne un se kahā, “jāo, apne ḳhudā kī ibādat karo. lekin yih batāo ki kaun kaun sāth jāegā?”

⁹mūsā ne jawāb diyā, “hamāre jawān aur būṛhe sāth jāeṅge. ham apne beṭe-beṭiyoṅ, bheṛ-bakriyoṅ aur gāy-bailoṅ ko bhī sāth le kar jāeṅge. ham sab ke sab jāeṅge, kyūṅki hameṅ rab kī īd manānī hai.”

¹⁰fir'aun ne tanzan kahā, “ṭhīk hai, jāo aur rab tumhāre sāth ho. nahīṅ, maiṅ kis tarah tum sab ko bāl-bachchoṅ samet jāne de saktā hūṅ? tum ne koī burā mansūbā banāyā hai.

¹¹nahīṅ, sirf mard jā kar rab kī ibādat kar sakte haiṅ. tum ne to yihī darḳhwāst kī thī.” tab mūsā aur hārūn ko fir'aun ke sāmne se nikāl diyā gayā.

¹²phir rab ne mūsā se kahā, “misr par apnā hāth uṭhā tāki ṭiḍḍiyāṅ ā kar misr kī sarzamīn par phail jāeṅ. jo kuchh bhī khetoṅ meṅ oloṅ se bach gayā hai use wuh khā jāeṅgī.”

¹³mūsā ne apnī lāṭhī misr par uṭhāī to rab ne mashriq se āṅdhī chalāī jo sārā din aur sārī rāt chaltī rahī aur aglī subh tak misr meṅ ṭiḍḍiyāṅ pahuṅchāīṅ.

¹⁴beshumār ṭiḍḍiyāṅ pūre mulk par hamlā karke har jagah baiṭh gaīṅ. is se pahle yā bād meṅ kabhī bhī ṭiḍḍiyoṅ kā itnā saḳht hamlā na huā thā.

¹⁵unhoṅ ne zamīn ko yūṅ ḍhāṅk liyā ki wuh kālī nazar āne lagī. jo kuchh bhī oloṅ se bach gayā thā chāhe khetoṅ ke paude yā daraḳhtoṅ ke phal the unhoṅ ne khā liyā. misr meṅ ek bhī daraḳht yā paudā na rahā jis ke patte bach gae hoṅ.

¹⁶tab fir'aun ne mūsā aur hārūn ko jaldī se bulwāyā. us ne kahā, “maiṅ ne tumhāre ḳhudā kā aur tumhārā gunāh kiyā hai.

¹⁷ab ek aur martabā merā gunāh muāf karo aur rab apne ḳhudā se duā karo tāki maut kī yih hālat mujh se dūr ho jāe.”

¹⁸mūsā ne mahal se nikal kar rab se duā kī.

¹⁹jawāb meṅ rab ne hawā kā ruḳh badal diyā. us ne maġhrib se tez āṅdhī chalāī jis ne ṭiḍḍiyoṅ ko uṛā kar bahr-e-qulzum meṅ ḍāl diyā. misr meṅ ek bhī ṭiḍḍī na rahī.

²⁰lekin rab ne hone diyā ki fir'aun phir aṛ gayā. us ne isrāīliyoṅ ko jāne na diyā.

²¹is ke bād rab ne mūsā se kahā, “apnā hāth āsmān kī taraf uṭhā to misr par andherā chhā jāegā. itnā andherā hogā ki bandā use chhū sakegā.”

²²mūsā ne apnā hāth āsmān kī taraf uṭhāyā to tīn din tak misr par gahrā andherā chhāyā rahā.

²³tīn din tak log na ek dūsre ko dekh sake, na kahīṅ jā sake. lekin jahāṅ isrāīlī rahte the wahāṅ raushnī thī.

²⁴tab fir'aun ne mūsā ko phir bulwāyā aur kahā, “jāo, rab kī ibādat karo! tum apne sāth bāl-bachchoṅ ko bhī le jā sakte ho. sirf apnī bheṛ-bakriyāṅ aur gāy-bail pīchhe chhoṛ denā.”

²⁵mūsā ne jawāb diyā, “kyā āp hī hameṅ qurbāniyoṅ ke lie jānwar deṅge tāki unheṅ rab apne ḳhudā ko pesh kareṅ?

²⁶yaqīnan nahīṅ. is lie lāzim hai ki ham apne jānwaroṅ ko sāth le kar jāeṅ. ek khur bhī pīchhe nahīṅ chhoṛā jāegā, kyūṅki abhī tak hameṅ mālūm nahīṅ ki rab kī ibādat ke lie kin kin jānwaroṅ kī zarūrat hogī. yih us waqt hī patā chalegā jab ham manzil-e-maqsūd par pahuṅcheṅge. is lie zarūrī hai ki ham sab ko apne sāth le kar jāeṅ.”

²⁷lekin rab kī marzī ke mutābiq fir'aun aṛ gayā. us ne unheṅ jāne na diyā.

²⁸us ne mūsā se kahā, “dafā ho jā. ḳhabardār! phir kabhī apnī shakl na dikhānā, warnā tujhe maut ke hawāle kar diyā jāegā.”

²⁹mūsā ne kahā, “ṭhīk hai, āp kī marzī. maiṅ phir kabhī āp ke sāmne nahīṅ āūṅgā.”