Read Roman Urdu Geo ḳhurūj 11 Bible Online

ḳhurūj 11 - Roman Urdu Geo bible

ḳhurūj 11

¹tab rab ne mūsā se kahā, “ab maiṅ fir'aun aur misr par āḳhirī āfat lāne ko hūṅ. is ke bād wuh tumheṅ jāne degā balki tumheṅ zabardastī nikāl degā.

²isrāīliyoṅ ko batā denā ki har mard apne paṛosī aur har aurat apnī paṛosan se sone-chāṅdī kī chīzeṅ māṅg le.”

³(rab ne misriyoṅ ke dil isrāīliyoṅ kī taraf māil kar die the. wuh fir'aun ke uhdedāroṅ samet ḳhāskar mūsā kī baṛī izzat karte the).

⁴mūsā ne kahā, “rab farmātā hai, ‘āj ādhī rāt ke waqt maiṅ misr meṅ se guzarūṅga.

⁵tab bādshāh ke pahlauṭhe se le kar chakkī pīsne wālī naukarānī ke pahlauṭhe tak misriyoṅ kā har pahlauṭhā mar jāegā. chaupāiyoṅ ke pahlauṭhe bhī mar jāeṅge.

⁶misr kī sarzamīn par aisā ronā pīṭnā hogā ki na māzī meṅ kabhī huā, na mustaqbil meṅ kabhī hogā.

⁷lekin isrāīlī aur un ke jānwar bache raheṅge. kuttā bhī un par nahīṅ bhaunkegā. is tarah tum jān loge ki rab isrāīliyoṅ kī nisbat misriyoṅ se farq sulūk kartā hai’.”

⁸mūsā ne yih kuchh fir'aun ko batāyā phir kahā, “us waqt āp ke tamām uhdedār ā kar mere sāmne jhuk jāeṅge aur minnat kareṅge, ‘apne pairokāroṅ ke sāth chale jāeṅ.’ tab maiṅ chalā hī jāūṅgā.” yih kah kar mūsā fir'aun ke pās se chalā gayā. wuh baṛe ġhusse meṅ thā.

⁹rab ne mūsā se kahā thā, “fir'aun tumhārī nahīṅ sunegā. kyūṅki lāzim hai ki maiṅ misr meṅ apnī qudrat kā mazīd izhār karūṅ.”

¹⁰go mūsā aur hārūn ne fir'aun ke sāmne yih tamām mojize dikhāe, lekin rab ne fir'aun ko ziddī banāe rakhā, is lie us ne isrāīliyoṅ ko mulk chhoṛne na diyā.