Read Roman Urdu Geo ḳhurūj 12 Bible Online

ḳhurūj 12 - Roman Urdu Geo bible

ḳhurūj 12

¹phir rab ne misr meṅ mūsā aur hārūn se kahā,

²“ab se yih mahīnā tumhāre lie sāl kā pahlā mahīnā ho.”

³isrāīl kī pūrī jamā'at ko batānā ki is mahīne ke dasweṅ din har ḳhāndān kā sarparast apne gharāne ke lie lelā yānī bheṛ yā bakrī kā bachchā hāsil kare.

⁴agar gharāne ke afrād pūrā jānwar khāne ke lie kam hoṅ to wuh apne sab se qarībī paṛosī ke sāth mil kar lelā hāsil kareṅ. itne log us meṅ se khāeṅ ki sab ke lie kāfī ho aur pūrā jānwar khāyā jāe.

⁵is ke lie ek sāl kā nar bachchā chun lenā jis meṅ nuqs na ho. wuh bheṛ yā bakrī kā bachchā ho saktā hai.

⁶mahīne ke 14weṅ din tak us kī dekh-bhāl karo. us din tamām isrāīlī sūraj ke ġhurūb hote waqt apne lele zabah kareṅ.

⁷har ḳhāndān apne jānwar kā kuchh ḳhūn jamā karke use us ghar ke darwāze kī chaukhaṭ par lagāe jahāṅ lelā khāyā jāegā. yih ḳhūn chaukhaṭ ke ūpar wāle hisse aur dāeṅ bāeṅ ke bāzū'oṅ par lagāyā jāe.

⁸lāzim hai ki log jānwar ko bhūn kar usī rāt khāeṅ. sāth hī wuh kaṛwā sāg-pāt aur beḳhamīrī roṭiyāṅ bhī khāeṅ.

⁹lele kā gosht kachchā na khānā, na use pānī meṅ ubālnā balki pūre jānwar ko sar, pairoṅ aur andarūnī hissoṅ samet āg par bhūnanā.

¹⁰lāzim hai ki pūrā gosht usī rāt khāyā jāe. agar kuchh subh tak bach jāe to use jalānā hai.

¹¹khānā khāte waqt aisā libās pahnanā jaise tum safar par jā rahe ho. apne jūte pahne rakhnā aur hāth meṅ safar ke lie lāṭhī lie hue tum use jaldī jaldī khānā. rab ke fasah kī īd yūṅ manānā.

¹²maiṅ āj rāt misr meṅ se guzarūṅga aur har pahlauṭhe ko jān se mār dūṅgā, ḳhwāh insān kā ho yā haiwān kā. yūṅ maiṅ jo rab hūṅ misr ke tamām dewatāoṅ kī adālat karūṅga.

¹³lekin tumhāre gharoṅ par lagā huā ḳhūn tumhārā ḳhās nishān hogā. jis jis ghar ke darwāze par maiṅ wuh ḳhūn dekhūṅgā use chhoṛtā jāūṅgā. jab maiṅ misr par hamlā karūṅga to mohlak wabā tum tak nahīṅ pahuṅchegī.

¹⁴āj kī rāt ko hameshā yād rakhnā. ise nasl-dar-nasl aur har sāl rab kī ḳhās īd ke taur par manānā.

¹⁵sāt din tak beḳhamīrī roṭī khānā hai. pahle din apne gharoṅ se tamām ḳhamīr nikāl denā. agar koī in sāt dinoṅ ke daurān ḳhamīr khāe to use qaum meṅ se miṭāyā jāe.

¹⁶is īd ke pahle aur āḳhirī din muqaddas ijtimā mun'aqid karnā. in tamām dinoṅ ke daurān kām na karnā. sirf ek kām kī ijāzat hai aur wuh hai apnā khānā tayyār karnā.

¹⁷beḳhamīrī roṭī kī īd manānā lāzim hai, kyūṅki us din maiṅ tumhāre muta'addid ḳhāndānoṅ ko misr se nikāl lāyā. is lie yih din nasl-dar-nasl har sāl yād rakhnā.

¹⁸pahle mahīne ke 14weṅ din kī shām se le kar 21weṅ din kī shām tak sirf beḳhamīrī roṭī khānā.

¹⁹sāt din tak tumhāre gharoṅ meṅ ḳhamīr na pāyā jāe. jo bhī is daurān ḳhamīr khāe use isrāīl kī jamā'at meṅ se miṭāyā jāe, ḳhwāh wuh isrāīlī shahrī ho yā ajnabī.

²⁰ġharz, is īd ke daurān ḳhamīr na khānā. jahāṅ bhī tum rahte ho wahāṅ beḳhamīrī roṭī hī khānā hai.

²¹phir mūsā ne tamām isrāīlī buzurgoṅ ko bulā kar un se kahā, “jāo, apne ḳhāndānoṅ ke lie bheṛ yā bakrī ke bachche chun kar unheṅ fasah kī īd ke lie zabah karo.

²²zūfe kā guchchhā le kar use ḳhūn se bhare hue bāsan meṅ ḍubo denā. phir use le kar ḳhūn ko chaukhaṭ ke ūpar wāle hisse aur dāeṅ bāeṅ ke bāzū'oṅ par lagā denā. subh tak koī apne ghar se na nikle.

²³jab rab misriyoṅ ko mār ḍālne ke lie mulk meṅ se guzaregā to wuh chaukhaṭ ke ūpar wāle hisse aur dāeṅ bāeṅ ke bāzū'oṅ par lagā huā ḳhūn dekh kar un gharoṅ ko chhoṛ degā. wuh halāk karne wāle farishte ko ijāzat nahīṅ degā ki wuh tumhāre gharoṅ meṅ jā kar tumheṅ halāk kare.

²⁴tum apnī aulād samet hameshā in hidāyāt par amal karnā.

²⁵yih rasm us waqt bhī adā karnā jab tum us mulk meṅ pahuṅchoge jo rab tumheṅ degā.

²⁶aur jab tumhāre bachche tum se pūchheṅ ki ham yih īd kyūṅ manāte haiṅ

²⁷to un se kaho, ‘yih fasah kī qurbānī hai jo ham rab ko pesh karte haiṅ. kyūṅki jab rab misriyoṅ ko halāk kar rahā thā to us ne hamāre gharoṅ ko chhoṛ diyā thā’.” yih sun kar isrāīliyoṅ ne allāh ko sijdā kiyā.

²⁸phir unhoṅ ne sab kuchh waisā hī kiyā jaisā rab ne mūsā aur hārūn ko batāyā thā.

²⁹ādhī rāt ko rab ne bādshāh ke pahlauṭhe se le kar jel ke qaidī ke pahlauṭhe tak misriyoṅ ke tamām pahlauṭhoṅ ko jān se mār diyā. chaupāiyoṅ ke pahlauṭhe bhī mar gae.

³⁰us rāt misr ke har ghar meṅ koī na koī mar gayā. fir'aun, us ke uhdedār aur misr ke tamām log jāg uṭhe aur zor zor se rone aur chīḳhne lage.

³¹abhī rāt thī ki fir'aun ne mūsā aur hārūn ko bulā kar kahā, “ab tum aur bāqī isrāīlī merī qaum meṅ se nikal jāo. apnī darḳhwāst ke mutābiq rab kī ibādat karo.

³²jis tarah tum chāhte ho apnī bheṛ-bakriyoṅ ko bhī apne sāth le jāo. aur mujhe bhī barkat denā.”

³³bāqī misriyoṅ ne bhī isrāīliyoṅ par zor de kar kahā, “jaldī jaldī mulk se nikal jāo, warnā ham sab mar jāeṅge.”

³⁴isrāīliyoṅ ke gūṅdhe hue āṭe meṅ ḳhamīr nahīṅ thā. unhoṅ ne use gūṅdhne ke bartanoṅ meṅ rakh kar apne kapṛoṅ meṅ lapeṭ liyā aur safar karte waqt apne kandhoṅ par rakh liyā.

³⁵isrāīlī mūsā kī hidāyat par amal karke apne misrī paṛosiyoṅ ke pās gae aur un se kapṛe aur sone-chāṅdī kī chīzeṅ māṅgīṅ.

³⁶rab ne misriyoṅ ke diloṅ ko isrāīliyoṅ kī taraf māil kar diyā thā, is lie unhoṅ ne un kī har darḳhwāst pūrī kī. yūṅ isrāīliyoṅ ne misriyoṅ ko lūṭ liyā.

³⁷isrāīlī rāmsīs se rawānā ho kar sukkāt pahuṅch gae. auratoṅ aur bachchoṅ ko chhoṛ kar un ke 6 lākh mard the.

³⁸wuh apne bheṛ-bakriyoṅ aur gāy-bailoṅ ke baṛe baṛe rewaṛ bhī sāth le gae. bahut se aise log bhī un ke sāth nikle jo isrāīlī nahīṅ the.

³⁹rāste meṅ unhoṅ ne us beḳhamīrī āṭe se roṭiyāṅ banāīṅ jo wuh sāth le kar nikle the. āṭe meṅ is lie ḳhamīr nahīṅ thā ki unheṅ itnī jaldī se misr se nikāl diyā gayā thā ki khānā tayyār karne kā waqt hī na milā thā.

⁴⁰isrāīlī 430 sāl tak misr meṅ rahe the.

⁴¹430 sāl ke ain bād, usī din rab ke yih tamām ḳhāndān misr se nikle.

⁴²us ḳhās rāt rab ne ḳhud pahrā diyā tāki isrāīlī misr se nikal sakeṅ. is lie tamām isrāīliyoṅ ke lie lāzim hai ki wuh nasl-dar-nasl is rāt rab kī tāzīm meṅ jāgte raheṅ, wuh bhī aur un ke bād kī aulād bhī.

⁴³rab ne mūsā aur hārūn se kahā, “fasah kī īd ke yih usūl haiṅ: kisī bhī pardesī ko fasah kī īd kā khānā khāne kī ijāzat nahīṅ hai.

⁴⁴agar tum ne kisī ġhulām ko ḳharīd kar us kā ḳhatnā kiyā hai to wuh fasah kā khānā khā saktā hai.

⁴⁵lekin ġhairshahrī yā mazdūr ko fasah kā khānā khāne kī ijāzat nahīṅ hai.

⁴⁶yih khānā ek hī ghar ke andar khānā hai. na gosht ghar se bāhar le jānā, na lele kī kisī haḍḍī ko toṛnā.

⁴⁷lāzim hai ki isrāīl kī pūrī jamā'at yih īd manāe.

⁴⁸agar koī pardesī tumhāre sāth rahtā hai jo fasah kī īd meṅ shirkat karnā chāhe to lāzim hai ki pahle us ke gharāne ke har mard kā ḳhatnā kiyā jāe. tab wuh isrāīlī kī tarah khāne meṅ sharīk ho saktā hai. lekin jis kā ḳhatnā na huā use fasah kā khānā khāne kī ijāzat nahīṅ hai.

⁴⁹yihī usūl har ek par lāgū hogā, ḳhwāh wuh isrāīlī ho yā pardesī.”

⁵⁰tamām isrāīliyoṅ ne waisā hī kiyā jaisā rab ne mūsā aur hārūn se kahā thā.

⁵¹usī din rab tamām isrāīliyoṅ ko ḳhāndānoṅ kī tartīb ke mutābiq misr se nikāl lāyā.