Read Roman Urdu Geo ḳhurūj 15 Bible Online

ḳhurūj 15 - Roman Urdu Geo bible

ḳhurūj 15

¹tab mūsā aur isrāīliyoṅ ne rab ke lie yih gīt gāyā, “maiṅ rab kī tamjīd meṅ gīt gāūṅgā, kyūṅki wuh nihāyat azīm hai. ghoṛe aur us ke sawār ko us ne samundar meṅ paṭaḳh diyā hai.

²rab merī quwwat aur merā gīt hai, wuh merī najāt ban gayā hai. wuhī merā ḳhudā hai, aur maiṅ us kī tārīf karūṅga. wuhī mere bāp kā ḳhudā hai, aur maiṅ us kī tāzīm karūṅga.

³rab sūrmā hai, rab us kā nām hai.

⁴fir'aun ke rathoṅ aur fauj ko us ne samundar meṅ paṭaḳh diyā to bādshāh ke behtarīn afsarān bahr-e-qulzum meṅ ḍūb gae.

⁵gahre pānī ne unheṅ ḍhāṅk liyā, aur wuh patthar kī tarah samundar kī tah tak utar gae.

⁶ai rab, tere dahne hāth kā jalāl baṛī qudrat se zāhir hotā hai. ai rab, terā dahnā hāth dushman ko chaknāchūr kar detā hai.

⁷jo tere ḳhilāf uṭh khaṛe hote haiṅ unheṅ tū apnī azmat kā izhār karke zamīn par paṭaḳh detā hai. terā ġhazab un par ān paṛtā hai to wuh āg meṅ bhūse kī tarah jal jāte haiṅ.

⁸tū ne ġhusse meṅ ā kar phūṅk mārī to pānī ḍher kī sūrat meṅ jamā ho gayā. bahtā pānī ṭhos dīwār ban gayā, samundar gahrāī tak jam gayā.

⁹dushman ne ḍīṅg mār kar kahā, ‘maiṅ un kā pīchhā karke unheṅ pakaṛ lūṅgā, maiṅ un kā lūṭā huā māl taqsīm karūṅga. merī lālchī jān un se ser ho jāegī, maiṅ apnī talwār khaiṅch kar unheṅ halāk karūṅga.’

¹⁰lekin tū ne un par phūṅk mārī to samundar ne unheṅ ḍhāṅk liyā, aur wuh sīse kī tarah zordār maujoṅ meṅ ḍūb gae.

¹¹ai rab, kaun sā mābūd terī mānind hai? kaun terī tarah jalālī aur quddūs hai? kaun terī tarah hairatangez kām kartā aur azīm mojize dikhātā hai? koī bhī nahīṅ.

¹²tū ne apnā dahnā hāth uṭhāyā to zamīn hamāre dushmanoṅ ko nigal gaī.

¹³apnī shafqat se tū ne iwazānā de kar apnī qaum ko chhuṭkārā diyā aur us kī rāhnumāī kī hai, apnī qudrat se tū ne use apnī muqaddas sukūnatgāh tak pahuṅchāyā hai.

¹⁴yih sun kar dīgar qaumeṅ kāṅp uṭhīṅ, filistī ḍar ke māre pech-o-tāb khāne lage.

¹⁵adom ke raīs saham gae. moāb ke rāhnumāoṅ par kapkapī tārī ho gaī, aur kan'ān ke tamām bāshinde himmat hār gae.

¹⁶dahshat aur ḳhauf un par chhā gayā. terī azīm qudrat ke bāis wuh patthar kī tarah jam gae. ai rab, wuh na hile jab tak terī qaum guzar na gaī. wuh behiss-o-harkat rahe jab tak terī ḳharīdī huī qaum guzar na gaī.

¹⁷ai rab, tū apne logoṅ ko le kar paudoṅ kī tarah apne maurūsī pahāṛ par lagāegā, us jagah par jo tū ne apnī sukūnat ke lie chun lī hai, jahāṅ tū ne apne hāthoṅ se apnā maqdis tayyār kiyā hai.

¹⁸rab abad tak bādshāh hai!”

¹⁹jab fir'aun ke ghoṛe, rath aur ghuṛsawār samundar meṅ chale gae to rab ne unheṅ samundar ke pānī se ḍhāṅk liyā. lekin isrāīlī ḳhushk zamīn par samundar meṅ se guzar gae.

²⁰tab hārūn kī bahan mariyam jo nabiyā thī ne daf liyā, aur bāqī tamām aurateṅ bhī daf le kar us ke pīchhe ho līṅ. sab gāne aur nāchne lagīṅ. mariyam ne yih gā kar un kī rāhnumāī kī,

²¹“rab kī tamjīd meṅ gīt gāo, kyūṅki wuh nihāyat azīm hai. ghoṛe aur us ke sawār ko us ne samundar meṅ paṭaḳh diyā hai.”

²²mūsā ke kahne par isrāīlī bahr-e-qulzum se rawānā ho kar dasht-e-shūr meṅ chale gae. wahāṅ wuh tīn din tak safar karte rahe. is daurān unheṅ pānī na milā.

²³āḳhirkār wuh mārā pahuṅche jahāṅ pānī dastyāb thā. lekin wuh kaṛwā thā, is lie maqām kā nām mārā yānī kaṛwāhaṭ paṛ gayā.

²⁴yih dekh kar log mūsā ke ḳhilāf buṛbuṛā kar kahne lage, “ham kyā pieṅ?”

²⁵mūsā ne madad ke lie rab se iltijā kī to us ne use lakaṛī kā ek ṭukṛā dikhāyā. jab mūsā ne yih lakaṛī pānī meṅ ḍālī to pānī kī kaṛwāhaṭ ḳhatm ho gaī. mārā meṅ rab ne apnī qaum ko qawānīn die. wahāṅ us ne unheṅ āzmāyā bhī.

²⁶us ne kahā, “ġhaur se rab apne ḳhudā kī āwāz suno! jo kuchh us kī nazar meṅ durust hai wuhī karo. us ke ahkām par dhyān do aur us kī tamām hidāyāt par amal karo. phir maiṅ tum par wuh bīmāriyāṅ nahīṅ lāūṅgā jo misriyoṅ par lāyā thā, kyūṅki maiṅ rab hūṅ jo tujhe shifā detā hūṅ.”

²⁷phir isrāīlī rawānā ho kar elīm pahuṅche jahāṅ 12 chashme aur khajūr ke 70 daraḳht the. wahāṅ unhoṅ ne pānī ke qarīb apne ḳhaime lagāe.