Read Roman Urdu Geo ḳhurūj 16 Bible Online

ḳhurūj 16 - Roman Urdu Geo bible

ḳhurūj 16

¹is ke bād isrāīl kī pūrī jamā'at elīm se safar karke sīn ke registān meṅ pahuṅchī jo elīm aur sīnā ke darmiyān hai. wuh misr se nikalne ke bād dūsre mahīne ke 15weṅ din pahuṅche.

²registān meṅ tamām log phir mūsā aur hārūn ke ḳhilāf buṛbuṛāne lage.

³unhoṅ ne kahā, “kāsh rab hameṅ misr meṅ hī mār ḍāltā! wahāṅ ham kam az kam jī bhar kar gosht aur roṭī to khā sakte the. āp hameṅ sirf is lie registān meṅ le āe haiṅ ki ham sab bhūke mar jāeṅ.”

⁴tab rab ne mūsā se kahā, “maiṅ āsmān se tumhāre lie roṭī barsāūṅgā. har roz log bāhar jā kar usī din kī zarūrat ke mutābiq khānā jamā kareṅ. is se maiṅ unheṅ āzmā kar dekhūṅgā ki āyā wuh merī sunte haiṅ ki nahīṅ.

⁵har roz wuh sirf utnā khānā jamā kareṅ jitnā ki ek din ke lie kāfī ho. lekin chhaṭe din jab wuh khānā tayyār kareṅge to wuh agle din ke lie bhī kāfī hogā.”

⁶mūsā aur hārūn ne isrāīliyoṅ se kahā, “āj shām ko tum jān loge ki rab hī tumheṅ misr se nikāl lāyā hai.

⁷aur kal subh tum rab kā jalāl dekhoge. us ne tumhārī shikāyateṅ sun lī haiṅ, kyūṅki asal meṅ tum hamāre ḳhilāf nahīṅ balki rab ke ḳhilāf buṛbuṛā rahe ho.

⁸phir bhī rab tum ko shām ke waqt gosht aur subh ke waqt wāfir roṭī degā, kyūṅki us ne tumhārī shikāyateṅ sun lī haiṅ. tumhārī shikāyateṅ hamāre ḳhilāf nahīṅ balki rab ke ḳhilāf haiṅ.”

⁹mūsā ne hārūn se kahā, “isrāīliyoṅ ko batānā, ‘rab ke sāmne hāzir ho jāo, kyūṅki us ne tumhārī shikāyateṅ sun lī haiṅ’.”

¹⁰jab hārūn pūrī jamā'at ke sāmne bāt karne lagā to logoṅ ne palaṭ kar registān kī taraf dekhā. wahāṅ rab kā jalāl bādal meṅ zāhir huā.

¹¹rab ne mūsā se kahā,

¹²“maiṅ ne isrāīliyoṅ kī shikāyat sun lī hai. unheṅ batā, ‘āj jab sūraj ġhurūb hone lagegā to tum gosht khāoge aur kal subh peṭ bhar kar roṭī. phir tum jān loge ki maiṅ rab tumhārā ḳhudā hūṅ’.”

¹³usī shām baṭeroṅ ke ġhol āe jo pūrī ḳhaimāgāh par chhā gae. aur aglī subh ḳhaime ke chāroṅ taraf os paṛī thī.

¹⁴jab os sūkh gaī to barf ke gāloṅ jaise patle dāne pāle kī tarah zamīn par paṛe the.

¹⁵jab isrāīliyoṅ ne use dekhā to ek dūsre se pūchhne lage, “man hū?” yānī “yih kyā hai?” kyūṅki wuh nahīṅ jānte the ki yih kyā chīz hai. mūsā ne un ko samjhāyā, “yih wuh roṭī hai jo rab ne tumheṅ khāne ke lie dī hai.

¹⁶rab kā hukm hai ki har ek utnā jamā kare jitnā us ke ḳhāndān ko zarūrat ho. apne ḳhāndān ke har fard ke lie do liṭar jamā karo.”

¹⁷isrāīliyoṅ ne aisā hī kiyā. bāz ne zyādā aur bāz ne kam jamā kiyā.

¹⁸lekin jab use nāpā gayā to har ek ādmī ke lie kāfī thā. jis ne zyādā jamā kiyā thā us ke pās kuchh na bachā. lekin jis ne kam jamā kiyā thā us ke pās bhī kāfī thā.

¹⁹mūsā ne hukm diyā, “agle din ke lie khānā na bachānā.”

²⁰lekin logoṅ ne mūsā kī bāt na mānī balki bāz ne khānā bachā liyā. lekin aglī subh mālūm huā ki bache hue khāne meṅ kīṛe paṛ gae haiṅ aur us se bahut badbū ā rahī hai. yih sun kar mūsā un se nārāz huā.

²¹har subh har koī utnā jamā kar letā jitnī use zarūrat hotī thī. jab dhūp tez hotī to jo kuchh zamīn par rah jātā wuh pighal kar ḳhatm ho jātā thā.

²²chhaṭe din jab log yih ḳhurāk jamā karte to wuh miqdār meṅ dugnī hotī thī yānī har fard ke lie chār liṭar. jab jamā'at ke buzurgoṅ ne mūsā ke pās ā kar use ittilā dī

²³to us ne un se kahā, “rab kā farmān hai ki kal ārām kā din hai, muqaddas sabat kā din jo allāh kī tāzīm meṅ manānā hai. āj tum jo tanūr meṅ pakānā chāhte ho pakā lo aur jo ubālnā chāhte ho ubāl lo. jo bach jāe use kal ke lie mahfūz rakho.”

²⁴logoṅ ne mūsā ke hukm ke mutābiq agle din ke lie khānā mahfūz kar liyā to na khāne se badbū āī, na us meṅ kīṛe paṛe.

²⁵mūsā ne kahā, “āj yihī bachā huā khānā khāo, kyūṅki āj sabat kā din hai, rab kī tāzīm meṅ ārām kā din. āj tumheṅ registān meṅ kuchh nahīṅ milegā.

²⁶chhih din ke daurān yih ḳhurāk jamā karnā hai, lekin sātwāṅ din ārām kā din hai. us din zamīn par khāne ke lie kuchh nahīṅ hogā.”

²⁷to bhī kuchh log hafte ko khānā jamā karne ke lie nikle, lekin unheṅ kuchh na milā.

²⁸tab rab ne mūsā se kahā, “tum log kab tak mere ahkām aur hidāyāt par amal karne se inkār karoge?

²⁹dekho, rab ne tumhāre lie muqarrar kiyā hai ki sabat kā din ārām kā din hai. is lie wuh tumheṅ jum'e ko do din ke lie ḳhurāk detā hai. hafte ko sab ko apne ḳhaimoṅ meṅ rahnā hai. koī bhī apne ghar se bāhar na nikle.”

³⁰chunāṅche log sabat ke din ārām karte the.

³¹isrāīliyoṅ ne is ḳhurāk kā nām ‘man’ rakhā. us ke dāne dhanie kī mānind safed the, aur us kā zāiqā shahd se bane kek kī mānind thā.

³²mūsā ne kahā, “rab farmātā hai, ‘do liṭar man ek martabān meṅ rakh kar use āne wālī nasloṅ ke lie mahfūz rakhnā. phir wuh dekh sakeṅge ki maiṅ tumheṅ kyā khānā khilātā rahā jab tumheṅ misr se nikāl lāyā’.”

³³mūsā ne hārūn se kahā, “ek martabān lo aur use do liṭar man se bhar kar rab ke sāmne rakho tāki wuh āne wālī nasloṅ ke lie mahfūz rahe.”

³⁴hārūn ne aisā hī kiyā. us ne man ke is martabān ko ahd ke sandūq ke sāmne rakhā tāki wuh mahfūz rahe.

³⁵isrāīliyoṅ ko 40 sāl tak man miltā rahā. wuh us waqt tak man khāte rahe jab tak registān se nikal kar kan'ān kī sarhad par na pahuṅche.

³⁶(jo paimānā isrāīlī man ke lie istemāl karte the wuh do liṭar kā ek bartan thā jis kā nām omar thā.)