Read Roman Urdu Geo ḳhurūj 17 Bible Online

ḳhurūj 17 - Roman Urdu Geo bible

ḳhurūj 17

¹phir isrāīl kī pūrī jamā'at sīn ke registān se niklī. rab jis tarah hukm detā rahā wuh ek jagah se dūsrī jagah safar karte rahe. rafīdīm meṅ unhoṅ ne ḳhaime lagāe. wahāṅ pīne ke lie pānī na milā.

²is lie wuh mūsā ke sāth yih kah kar jhagaṛne lage, “hameṅ pīne ke lie pānī do.” mūsā ne jawāb diyā, “tum mujh se kyūṅ jhagaṛ rahe ho? rab ko kyūṅ āzmā rahe ho?”

³lekin log bahut pyāse the. wuh mūsā ke ḳhilāf buṛbuṛāne se bāz na āe balki kahā, “āp hameṅ misr se kyūṅ lāe haiṅ? kyā is lie ki ham apne bachchoṅ aur rewaṛoṅ samet pyāse mar jāeṅ?”

⁴tab mūsā ne rab ke huzūr faryād kī, “maiṅ in logoṅ ke sāth kyā karūṅ? hālāt zarā bhī aur bigaṛ jāeṅ to wuh mujhe sangsār kar deṅge.”

⁵rab ne mūsā se kahā, “kuchh buzurg sāth le kar logoṅ ke āge āge chal. wuh lāṭhī bhī sāth le jā jis se tū ne daryā-e-nīl ko mārā thā.

⁶maiṅ horib yānī sīnā pahāṛ kī ek chaṭān par tere sāmne khaṛā hūṅgā. lāṭhī se chaṭān ko mārnā to us se pānī niklegā aur log pī sakeṅge.” mūsā ne isrāīl ke buzurgoṅ ke sāmne aisā hī kiyā.

⁷us ne us jagah kā nām massā aur marībā yānī ‘āzmānā aur jhagaṛnā’ rakhā, kyūṅki wahāṅ isrāīlī buṛbuṛāe aur yih pūchh kar rab ko āzmāyā ki kyā rab hamāre darmiyān hai ki nahīṅ?

⁸rafīdīm wuh jagah bhī thī jahāṅ amālīqī isrāīliyoṅ se laṛne āe.

⁹mūsā ne yashūa se kahā, “laṛne ke qābil ādmiyoṅ ko chun lo aur nikal kar amālīqiyoṅ kā muqābalā karo. kal maiṅ allāh kī lāṭhī pakaṛe hue pahāṛ kī choṭī par khaṛā ho jāūṅgā.”

¹⁰yashūa mūsā kī hidāyat ke mutābiq amālīqiyoṅ se laṛne gayā jabki mūsā, hārūn aur hūr pahāṛ kī choṭī par chaṛh gae.

¹¹aur yūṅ huā ki jab mūsā ke hāth uṭhāe hue the to isrāīlī jītte rahe, aur jab wuh nīche the to amālīqī jītte rahe.

¹²kuchh der ke bād mūsā ke bāzū thak gae. is lie hārūn aur hūr ek chaṭān le āe tāki wuh us par baiṭh jāe. phir unhoṅ ne us ke dāīṅ aur bāīṅ taraf khaṛe ho kar us ke bāzū'oṅ ko ūpar uṭhāe rakhā. sūraj ke ġhurūb hone tak unhoṅ ne yūṅ mūsā kī madad kī.

¹³is tarah yashūa ne amālīqiyoṅ se laṛte laṛte unheṅ shikast dī.

¹⁴tab rab ne mūsā se kahā, “yih wāqiā yādgārī ke lie kitāb meṅ likh le. lāzim hai ki yih sab kuchh yashūa kī yād meṅ rahe, kyūṅki maiṅ duniyā se amālīqiyoṅ kā nām-o-nishān miṭā dūṅgā.”

¹⁵us waqt mūsā ne qurbāngāh banā kar us kā nām ‘rab merā jhanḍā hai’ rakhā.

¹⁶us ne kahā, “rab ke taḳht ke ḳhilāf hāth uṭhāyā gayā hai, is lie rab kī amālīqiyoṅ se hameshā tak jang rahegī.”