Read Roman Urdu Geo ḳhurūj 28 Bible Online

ḳhurūj 28 - Roman Urdu Geo bible

ḳhurūj 28

¹apne bhāī hārūn aur us ke beṭoṅ nadab, abīhū, ilīazar aur itamar ko bulā. maiṅ ne unheṅ isrāīliyoṅ meṅ se chun liyā hai tāki wuh imāmoṅ kī haisiyat se merī ḳhidmat kareṅ.

²apne bhāī hārūn ke lie muqaddas libās banwānā jo purwaqār aur shāndār hoṅ.

³libās banāne kī zimmādārī un tamām logoṅ ko denā jo aise kāmoṅ meṅ māhir haiṅ aur jin ko maiṅ ne hikmat kī rūh se bhar diyā hai. kyūṅki jab hārūn ko maḳhsūs kiyā jāegā aur wuh muqaddas ḳhaime kī ḳhidmat saranjām degā to use in kapṛoṅ kī zarūrat hogī.

⁴us ke lie yih libās banāne haiṅ: sīne kā kīsā, bālāposh, choġhā, bunā huā zerjāmā, pagaṛī aur kamarband. yih kapṛe apne bhāī hārūn aur us ke beṭoṅ ke lie banwāne haiṅ tāki wuh imām ke taur par ḳhidmat kar sakeṅ.

⁵in kapṛoṅ ke lie sonā aur nīle, arġhawānī aur qirmizī rang kā dhāgā aur bārīk katān istemāl kiyā jāe.

⁶bālāposh ko bhī sone aur nīle, arġhawānī aur qirmizī rang ke dhāge aur bārīk katān se banānā hai. us par kisī māhir kārīgar se kaṛhāī kā kām karwāyā jāe.

⁷us kī do paṭṭiyāṅ hoṅ jo kandhoṅ par rakh kar sāmne aur pīchhe se bālāposh ke sāth lagī hoṅ.

⁸is ke ilāwā ek paṭkā bunanā hai jis se bālāposh ko bāndhā jāe aur jo bālāposh ke sāth ek ṭukṛā ho. us ke lie bhī sonā, nīle, arġhawānī aur qirmizī rang kā dhāgā aur bārīk katān istemāl kiyā jāe.

⁹phir aqīq-e-ahmar ke do patthar chun kar un par isrāīl ke bārah beṭoṅ ke nām kandā karnā.

¹⁰har jauhar par chhih chhih nām un kī paidāish kī tartīb ke mutābiq kandā kie jāeṅ.

¹¹yih nām us tarah jauharoṅ par kandā kie jāeṅ jis tarah muhr kandā kī jātī hai. phir donoṅ jauhar sone ke ḳhānoṅ meṅ jaṛ kar

¹²bālāposh kī do paṭṭiyoṅ par aise lagānā ki kandhoṅ par ā jāeṅ. jab hārūn mere huzūr āegā to jauharoṅ par ke yih nām us ke kandhoṅ par hoṅge aur mujhe isrāīliyoṅ kī yād dilāeṅge.

¹³sone ke ḳhāne banānā

¹⁴aur ḳhālis sone kī do zanjīreṅ jo ḍorī kī tarah gundhī huī hoṅ. phir in do zanjīroṅ ko sone ke ḳhānoṅ ke sāth lagānā.

¹⁵sīne ke lie kīsā banānā. us meṅ wuh qur'e paṛe raheṅ jin kī mārifat merī marzī mālūm kī jāegī. māhir kārīgar use un hī chīzoṅ se banāe jin se hārūn kā bālāposh banāyā gayā hai yānī sone aur nīle, arġhawānī aur qirmizī rang ke dhāge aur bārīk katān se.

¹⁶jab kapṛe ko ek dafā tah kiyā gayā ho to kīse kī lambāī aur chauṛāī nau nau inch ho.

¹⁷us par chār qatāroṅ meṅ jawāhir jaṛnā. har qatār meṅ tīn tīn jauhar hoṅ. pahlī qatār meṅ lāl, [7] zabarjad [8] aur zumurrad.

¹⁸dūsrī meṅ fīrozā, sang-e-lājaward [9] aur hajr-ul-qamar. [10]

¹⁹tīsrī meṅ zarqon, [11] aqīq [12] aur yāqūt-e-arġhawānī. [13]

²⁰chauthī meṅ pukhrāj, [14] aqīq-e-ahmar [15] aur yashab. [16] har jauhar sone ke ḳhāne meṅ jaṛā huā ho.

²¹yih bārah jawāhir isrāīl ke bārah qabīloṅ kī numāindagī karte haiṅ. ek ek jauhar par ek qabīle kā nām kandā kiyā jāe. yih nām us tarah kandā kie jāeṅ jis tarah muhr kandā kī jātī hai.

²²sīne ke kīse par ḳhālis sone kī do zanjīreṅ lagānā jo ḍorī kī tarah gundhī huī hoṅ.

²³unheṅ lagāne ke lie do kaṛe banā kar kīse ke ūpar ke do konoṅ par lagānā.

²⁴ab donoṅ zanjīreṅ un do kaṛoṅ se lagānā.

²⁵un ke dūsre sire bālāposh kī kandhoṅ wālī paṭṭiyoṅ ke do ḳhānoṅ ke sāth joṛ denā, phir sāmne kī taraf lagānā.

²⁶kīse ke nichle do konoṅ par bhī sone ke do kaṛe lagānā. wuh andar, bālāposh kī taraf lage hoṅ.

²⁷ab do aur kaṛe banā kar bālāposh kī kandhoṅ wālī paṭṭiyoṅ par lagānā. yih bhī sāmne kī taraf lage hoṅ lekin nīche, bālāposh ke paṭke ke ūpar hī.

²⁸sīne ke kīse ke nichle kaṛe nīlī ḍorī se bālāposh ke in nichle kaṛoṅ ke sāth bāndhe jāeṅ. yūṅ kīsā paṭke ke ūpar achchhī tarah sīne ke sāth lagā rahegā.

²⁹jab bhī hārūn maqdis meṅ dāḳhil ho kar rab ke huzūr āegā wuh isrāīlī qabīloṅ ke nām apne dil par sīne ke kīse kī sūrat meṅ sāth le jāegā. yūṅ wuh qaum kī yād dilātā rahegā.

³⁰sīne ke kīse meṅ donoṅ qur'e banām ūrīm aur tummīm rakhe jāeṅ. wuh bhī maqdis meṅ rab ke sāmne āte waqt hārūn ke dil par hoṅ. yūṅ jab hārūn rab ke huzūr hogā to rab kī marzī pūchhne kā wasīlā hameshā us ke dil par hogā.

³¹choġhā bhī bunanā. wuh pūrī tarah nīle dhāge se banāyā jāe. choġhe ko bālāposh se pahle pahnā jāe.

³²us ke garebān ko bune hue kālar se mazbūt kiyā jāe tāki wuh na phaṭe.

³³nīle, arġhawānī aur qirmizī rang ke dhāge se anār banā kar unheṅ choġhe ke dāman meṅ lagā denā. un ke darmiyān sone kī ghanṭiyāṅ lagānā.

³⁴dāman meṅ anār aur ghanṭiyāṅ bārī bārī lagānā.

³⁵hārūn ḳhidmat karte waqt hameshā choġhā pahne. jab wuh maqdis meṅ rab ke huzūr āegā aur wahāṅ se niklegā to ghanṭiyāṅ sunāī deṅgī. phir wuh nahīṅ maregā.

³⁶ḳhālis sone kī taḳhtī banā kar us par yih alfāz kandā karnā, ‘rab ke lie maḳhsūs-o-muqaddas.’ yih alfāz yūṅ kandā kie jāeṅ jis tarah muhr kandā kī jātī hai.

³⁷use nīlī ḍorī se pagaṛī ke sāmne wāle hisse se lagāyā jāe

³⁸tāki wuh hārūn ke māthe par paṛī rahe. jab bhī wuh maqdis meṅ jāe to yih taḳhtī sāth ho. jab isrāīlī apne nazarāne lā kar rab ke lie maḳhsūs kareṅ lekin kisī ġhaltī ke bāis qusūrwār hoṅ to un kā yih qusūr hārūn par muntaqil hogā. is lie yih taḳhtī har waqt us ke māthe par ho tāki rab isrāīliyoṅ ko qabūl kar le.

³⁹zerjāme ko bārīk katān se bunanā aur is tarah pagaṛī bhī. phir kamarband banānā. us par kaṛhāī kā kām kiyā jāe.

⁴⁰hārūn ke beṭoṅ ke lie bhī zerjāme, kamarband aur pagaṛiyāṅ banānā tāki wuh purwaqār aur shāndār nazar āeṅ.

⁴¹yih sab apne bhāī hārūn aur us ke beṭoṅ ko pahnānā. un ke saroṅ par tel unḍel kar unheṅ masah karnā. yūṅ unheṅ un ke uhde par muqarrar karke merī ḳhidmat ke lie maḳhsūs karnā.

⁴²un ke lie katān ke pājāme bhī banānā tāki wuh zerjāme ke nīche nange na hoṅ. un kī lambāī kamr se rān tak ho.

⁴³jab bhī hārūn aur us ke beṭe mulāqāt ke ḳhaime meṅ dāḳhil hoṅ to unheṅ yih pājāme pahnane haiṅ. isī tarah jab unheṅ muqaddas kamre meṅ ḳhidmat karne ke lie qurbāngāh ke pās ānā hotā hai to wuh yih pahneṅ, warnā wuh qusūrwār ṭhahar kar mar jāeṅge. yih hārūn aur us kī aulād ke lie ek abadī usūl hai.