Read Roman Urdu Geo ḳhurūj 3 Bible Online

ḳhurūj 3 - Roman Urdu Geo bible

ḳhurūj 3

¹mūsā apne susar yitro kī bheṛ-bakriyoṅ kī nigahbānī kartā thā (midiyān kā imām raūel yitro bhī kahlātā thā). ek din mūsā rewaṛ ko registān kī parlī jānib le gayā aur chalte chalte allāh ke pahāṛ horib yānī sīnā tak pahuṅch gayā.

²wahāṅ rab kā farishtā āg ke shole meṅ us par zāhir huā. yih sholā ek jhāṛī meṅ bhaṛak rahā thā. mūsā ne dekhā ki jhāṛī jal rahī hai lekin bhasm nahīṅ ho rahī.

³mūsā ne sochā, “yih to ajīb bāt hai. kyā wajah hai ki jaltī huī jhāṛī bhasm nahīṅ ho rahī? maiṅ zarā wahāṅ jā kar yih hairatangez manzar dekhūṅ.”

⁴jab rab ne dekhā ki mūsā jhāṛī ko deḳhne ā rahā hai to us ne use jhāṛī meṅ se pukārā, “mūsā, mūsā!” mūsā ne kahā, “jī, maiṅ hāzir hūṅ.”

⁵rab ne kahā, “is se zyādā qarīb na ānā. apnī jūtiyāṅ utār, kyūṅki tū muqaddas zamīn par khaṛā hai.

⁶maiṅ tere bāp kā ḳhudā, ibrāhīm kā ḳhudā, is'hāq kā ḳhudā aur yāqūb kā ḳhudā hūṅ.” yih sun kar mūsā ne apnā muṅh ḍhāṅk liyā, kyūṅki wuh allāh ko deḳhne se ḍarā.

⁷rab ne kahā, “maiṅ ne misr meṅ apnī qaum kī burī hālat dekhī aur ġhulāmī meṅ un kī chīḳheṅ sunī haiṅ, aur maiṅ un ke dukhoṅ ko ḳhūb jāntā hūṅ.

⁸ab maiṅ unheṅ misriyoṅ ke qābū se bachāne ke lie utar āyā hūṅ. maiṅ unheṅ misr se nikāl kar ek achchhe wasī mulk meṅ le jāūṅgā, ek aise mulk meṅ jahāṅ dūdh aur shahd kī kasrat hai, go is waqt kan'ānī, hittī, amorī, farizzī, hiwwī aur yabūsī us meṅ rahte haiṅ.

⁹isrāīliyoṅ kī chīḳheṅ mujh tak pahuṅchī haiṅ. maiṅ ne dekhā hai ki misrī un par kis tarah kā zulm ḍhā rahe haiṅ.

¹⁰chunāṅche ab jā. maiṅ tujhe fir'aun ke pās bhejtā hūṅ, kyūṅki tujhe merī qaum isrāīl ko misr se nikāl kar lānā hai.”

¹¹lekin mūsā ne allāh se kahā, “maiṅ kaun hūṅ ki fir'aun ke pās jā kar isrāīliyoṅ ko misr se nikāl lāūṅ?”

¹²allāh ne kahā, “maiṅ to tere sāth hūṅgā. aur is kā sabūt ki maiṅ tujhe bhej rahā hūṅ yih hogā ki logoṅ ke misr se nikalne ke bād tum yahāṅ ā kar is pahāṛ par merī ibādat karoge.”

¹³lekin mūsā ne etirāz kiyā, “agar maiṅ isrāīliyoṅ ke pās jā kar unheṅ batāūṅ ki tumhāre bāpdādā ke ḳhudā ne mujhe tumhāre pās bhejā hai to wuh pūchheṅge, ‘us kā nām kyā hai?’ phir maiṅ un ko kyā jawāb dūṅ?”

¹⁴allāh ne kahā, “maiṅ jo hūṅ so maiṅ hūṅ. un se kahnā, ‘maiṅ hūṅ ne mujhe tumhāre pās bhejā hai.

¹⁵rab jo tumhāre bāpdādā kā ḳhudā, ibrāhīm kā ḳhudā, is'hāq kā ḳhudā aur yāqūb kā ḳhudā hai usī ne mujhe tumhāre pās bhejā hai.’ yih abad tak merā nām rahegā. log yihī nām le kar mujhe nasl-dar-nasl yād kareṅge.

¹⁶ab jā aur isrāīl ke buzurgoṅ ko jamā karke un ko batā de ki rab tumhāre bāpdādā ibrāhīm, is'hāq aur yāqūb kā ḳhudā mujh par zāhir huā hai. wuh farmātā hai, ‘maiṅ ne ḳhūb dekh liyā hai ki misr meṅ tumhāre sāth kyā sulūk ho rahā hai.

¹⁷is lie maiṅ ne faislā kiyā hai ki tumheṅ misr kī musībat se nikāl kar kan'āniyoṅ, hittiyoṅ, amoriyoṅ, farizziyoṅ, hiwwiyoṅ aur yabūsiyoṅ ke mulk meṅ le jāūṅ, aise mulk meṅ jahāṅ dūdh aur shahd kī kasrat hai.’

¹⁸buzurg terī suneṅge. phir un ke sāth misr ke bādshāh ke pās jā kar us se kahnā, ‘rab ibrāniyoṅ kā ḳhudā ham par zāhir huā hai. is lie hameṅ ijāzat deṅ ki ham tīn din kā safar karke registān meṅ rab apne ḳhudā ke lie qurbāniyāṅ chaṛhāeṅ.’

¹⁹lekin mujhe mālūm hai ki misr kā bādshāh sirf is sūrat meṅ tumheṅ jāne degā ki koī zabardastī tumheṅ le jāe.

²⁰is lie maiṅ apnī qudrat zāhir karke apne mojizoṅ kī mārifat misriyoṅ ko mārūṅga. phir wuh tumheṅ jāne degā.

²¹us waqt maiṅ misriyoṅ ke diloṅ ko tumhāre lie narm kar dūṅgā. tumheṅ ḳhālī hāth nahīṅ jānā paṛegā.

²²tamām ibrānī aurateṅ apnī misrī paṛosanoṅ aur apne ghar meṅ rahne wālī misrī auratoṅ se chāṅdī aur sone ke zewarāt aur nafīs kapṛe māṅg kar apne bachchoṅ ko pahnāeṅgī. yūṅ misriyoṅ ko lūṭ liyā jāegā.”