Read Roman Urdu Geo ḳhurūj 33 Bible Online

ḳhurūj 33 - Roman Urdu Geo bible

ḳhurūj 33

¹rab ne mūsā se kahā, “is jagah se rawānā ho jā. un logoṅ ko le kar jin ko tū misr se nikāl lāyā hai us mulk ko jā jis kā wādā maiṅ ne ibrāhīm, is'hāq aur yāqūb se kiyā hai. un hī se maiṅ ne qasam khā kar kahā thā, ‘maiṅ yih mulk tumhārī aulād ko dūṅgā.’

²maiṅ tere āge āge farishtā bhej kar kan'ānī, amorī, hittī, farizzī, hiwwī aur yabūsī aqwām ko us mulk se nikāl dūṅgā.

³uṭh, us mulk ko jā jahāṅ dūdh aur shahd kī kasrat hai. lekin maiṅ sāth nahīṅ jāūṅgā. tum itne haṭdharm ho ki agar maiṅ sāth jāūṅ to ḳhatrā hai ki tumheṅ wahāṅ pahuṅchne se pahle hī barbād kar dūṅ.”

⁴jab isrāīliyoṅ ne yih saḳht alfāz sune to wuh mātam karne lage. kisī ne bhī apne zewar na pahne,

⁵kyūṅki rab ne mūsā se kahā thā, “isrāīliyoṅ ko batā ki tum haṭdharm ho. agar maiṅ ek lamhā bhī tumhāre sāth chalūṅ to ḳhatrā hai ki maiṅ tumheṅ tabāh kar dūṅ. ab apne zewarāt utār ḍālo. phir maiṅ faislā karūṅga ki tumhāre sāth kyā kiyā jāe.”

⁶in alfāz par isrāīliyoṅ ne horib yānī sīnā pahāṛ par apne zewar utār die.

⁷us waqt mūsā ne ḳhaimā le kar use kuchh fāsile par ḳhaimāgāh ke bāhar lagā diyā. us ne us kā nām ‘mulāqāt kā ḳhaimā’ rakhā. jo bhī rab kī marzī daryāft karnā chāhtā wuh ḳhaimāgāh se nikal kar wahāṅ jātā.

⁸jab bhī mūsā ḳhaimāgāh se nikal kar wahāṅ jātā to tamām log apne ḳhaimoṅ ke darwāzoṅ par khaṛe ho kar mūsā ke pīchhe deḳhne lagte. us ke mulāqāt ke ḳhaime meṅ ojhal hone tak wuh use deḳhte rahte.

⁹mūsā ke ḳhaime meṅ dāḳhil hone par bādal kā satūn utar kar ḳhaime ke darwāze par ṭhahar jātā. jitnī der tak rab mūsā se bāteṅ kartā utnī der tak wuh wahāṅ ṭhahrā rahtā.

¹⁰jab isrāīlī mulāqāt ke ḳhaime ke darwāze par bādal kā satūn deḳhte to wuh apne apne ḳhaime ke darwāze par khaṛe ho kar sijdā karte.

¹¹rab mūsā se rū-ba-rū bāteṅ kartā thā, aise shaḳhs kī tarah jo apne dost se bāteṅ kartā hai. is ke bād mūsā nikal kar ḳhaimāgāh ko wāpas chalā jātā. lekin us kā jawān madadgār yashūa bin nūn ḳhaime ko nahīṅ chhoṛtā thā.

¹²mūsā ne rab se kahā, “dekh, tū mujh se kahtā āyā hai ki is qaum ko kan'ān le chal. lekin tū mere sāth kis ko bhejegā? tū ne ab tak yih bāt mujhe nahīṅ batāī hālāṅki tū ne kahā hai, ‘maiṅ tujhe banām jāntā hūṅ, tujhe merā karm hāsil huā hai.’

¹³agar mujhe wāqaī terā karm hāsil hai to mujhe apne rāste dikhā tāki maiṅ tujhe jān lūṅ aur terā karm mujhe hāsil hotā rahe. is bāt kā ḳhayāl rakh ki yih qaum terī hī ummat hai.”

¹⁴rab ne jawāb diyā, “maiṅ ḳhud tere sāth chalūṅgā aur tujhe ārām dūṅgā.”

¹⁵mūsā ne kahā, “agar tū ḳhud sāth nahīṅ chalegā to phir hameṅ yahāṅ se rawānā na karnā.

¹⁶agar tū hamāre sāth na jāe to kis tarah patā chalegā ki mujhe aur terī qaum ko terā karm hāsil huā hai? ham sirf isī wajah se duniyā kī dīgar qaumoṅ se alag aur mumtāz haiṅ.”

¹⁷rab ne mūsā se kahā, “maiṅ terī yih darḳhwāst bhī pūrī karūṅga, kyūṅki tujhe merā karm hāsil huā hai aur maiṅ tujhe banām jāntā hūṅ.”

¹⁸phir mūsā bolā, “barāh-e-karm mujhe apnā jalāl dikhā.”

¹⁹rab ne jawāb diyā, “maiṅ apnī pūrī bhalāī tere sāmne se guzarne dūṅgā aur tere sāmne hī apne nām rab kā elān karūṅga. maiṅ jis par mehrbān honā chāhūṅ us par mehrbān hotā hūṅ, aur jis par rahm karnā chāhūṅ us par rahm kartā hūṅ.

²⁰lekin tū merā chehrā nahīṅ dekh saktā, kyūṅki jo bhī merā chehrā dekhe wuh zindā nahīṅ rah saktā.”

²¹phir rab ne farmāyā, “dekh, mere pās ek jagah hai. wahāṅ kī chaṭān par khaṛā ho jā.

²²jab merā jalāl wahāṅ se guzaregā to maiṅ tujhe chaṭān ke ek shigāf meṅ rakhūṅgā aur apnā hāth tere ūpar phailāūṅgā tāki tū mere guzarne ke daurān mahfūz rahe.

²³is ke bād maiṅ apnā hāth haṭāūṅgā aur tū mere pīchhe dekh sakegā. lekin merā chehrā dekhā nahīṅ jā saktā.”