Read Roman Urdu Geo ḳhurūj 35 Bible Online

ḳhurūj 35 - Roman Urdu Geo bible

ḳhurūj 35

¹mūsā ne isrāīl kī pūrī jamā'at ko ikaṭṭhā karke kahā, “rab ne tum ko yih hukm die haiṅ:

²chhih din kām-kāj kiyā jāe, lekin sātwāṅ din maḳhsūs-o-muqaddas ho. wuh rab ke lie ārām kā sabat hai. jo bhī is din kām kare use sazā-e-maut dī jāe.

³hafte ke din apne tamām gharoṅ meṅ āg tak na jalānā.”

⁴mūsā ne isrāīl kī pūrī jamā'at se kahā, “rab ne hidāyat dī hai

⁵ki jo kuchh tumhāre pās hai us meṅ se hadie lā kar rab ko uṭhāne wālī qurbānī ke taur par pesh karo. jo bhī dilī ḳhushī se denā chāhe wuh in chīzoṅ meṅ se kuchh de: sonā, chāṅdī, pītal;

⁶nīle, arġhawānī aur qirmizī rang kā dhāgā, bārīk katān, bakrī ke bāl,

⁷menḍhoṅ kī surḳh rangī huī khāleṅ, taḳhas kī khāleṅ, kīkar kī lakaṛī,

⁸shamādān ke lie zaitūn kā tel, masah karne ke lie tel aur ḳhushbūdār baḳhūr ke lie masāle,

⁹aqīq-e-ahmar aur dīgar jawāhir jo imām-e-āzam ke bālāposh aur sīne ke kīse meṅ jaṛe jāeṅge.

¹⁰tum meṅ se jitne māhir kārīgar haiṅ wuh ā kar wuh kuchh banāeṅ jo rab ne farmāyā

¹¹yānī ḳhaimā aur wuh ġhilāf jo us ke ūpar lagāe jāeṅge, hukeṅ, dīwāroṅ ke taḳhte, shahtīr, satūn aur pāe,

¹²ahd kā sandūq, use uṭhāne kī lakaṛiyāṅ, us ke kaffāre kā ḍhaknā, muqaddastarīn kamre ke darwāze kā pardā,

¹³maḳhsūs roṭiyoṅ kī mez, use uṭhāne kī lakaṛiyāṅ, us kā sārā sāmān aur roṭiyāṅ,

¹⁴shamādān aur us par rakhne ke charāġh us ke sāmān samet, shamādān ke lie tel,

¹⁵baḳhūr jalāne kī qurbāngāh, use uṭhāne kī lakaṛiyāṅ, masah kā tel, ḳhushbūdār baḳhūr, muqaddas ḳhaime ke darwāze kā pardā,

¹⁶jānwaroṅ ko chaṛhāne kī qurbāngāh, us kā pītal kā janglā, use uṭhāne kī lakaṛiyāṅ aur bāqī sārā sāmān, dhone kā hauz aur wuh ḍhāṅchā jis par hauz rakhā jātā hai,

¹⁷chārdīwārī ke parde un ke khamboṅ aur pāiyoṅ samet, sahan ke darwāze kā pardā,

¹⁸ḳhaime aur chārdīwārī kī meḳheṅ aur rasse,

¹⁹aur wuh muqaddas libās jo hārūn aur us ke beṭe maqdis meṅ ḳhidmat karne ke lie pahante haiṅ.”

²⁰yih sun kar isrāīl kī pūrī jamā'at mūsā ke pās se chalī gaī.

²¹aur jo jo dilī ḳhushī se denā chāhtā thā wuh mulāqāt ke ḳhaime, us ke sāmān yā imāmoṅ ke kapṛoṅ ke lie koī hadiyā le kar wāpas āyā.

²²rab ke hadie ke lie mard aur ḳhawātīn dilī ḳhushī se apne sone ke zewarāt masalan jaṛāo pineṅ, bāliyāṅ aur chhalle le āe.

²³jis jis ke pās darkār chīzoṅ meṅ se kuchh thā wuh use mūsā ke pās le āyā yānī nīle, qirmizī aur arġhawānī rang kā dhāgā, bārīk katān, bakrī ke bāl, menḍhoṅ kī surḳh rangī huī khāleṅ aur taḳhas kī khāleṅ.

²⁴chāṅdī, pītal aur kīkar kī lakaṛī bhī hadie ke taur par lāī gaī.

²⁵aur jitnī aurateṅ kātne meṅ māhir thīṅ wuh apnī kātī huī chīzeṅ le āīṅ yānī nīle, qirmizī aur arġhawānī rang kā dhāgā aur bārīk katān.

²⁶isī tarah jo jo aurat bakrī ke bāl kātne meṅ māhir thī aur dilī ḳhushī se maqdis ke lie kām karnā chāhtī thī wuh yih kāt kar le āī.

²⁷sardār aqīq-e-ahmar aur dīgar jawāhir le āe jo imām-e-āzam ke bālāposh aur sīne ke kīse ke lie darkār the.

²⁸wuh shamādān, masah ke tel aur ḳhushbūdār baḳhūr ke lie masāle aur zaitūn kā tel bhī le āe.

²⁹yūṅ isrāīl ke tamām mard aur ḳhawātīn jo dilī ḳhushī se rab ko kuchh denā chāhte the us sāre kām ke lie hadie le āe jo rab ne mūsā kī mārifat karne ko kahā thā.

³⁰phir mūsā ne isrāīliyoṅ se kahā, “rab ne yahūdāh ke qabīle ke bazlī'el bin ūrī bin hūr ko chun liyā hai.

³¹us ne use ilāhī rūh se māmūr karke hikmat, samajh aur tāmīr ke har kām ke lie darkār ilm de diyā hai.

³²wuh naqshe banā kar un ke mutābiq sone, chāṅdī aur pītal kī chīzeṅ banā saktā hai.

³³wuh jawāhir ko kāṭ kar jaṛne kī qābiliyat rakhtā hai. wuh lakaṛī ko tarāsh kar us se muḳhtalif chīzeṅ banā saktā hai. wuh bahut sāre aur kāmoṅ meṅ bhī mahārat rakhtā hai.

³⁴sāth hī rab ne use aur dān ke qabīle ke uhliyāb bin aḳhīsamak ko dūsroṅ ko sikhāne kī qābiliyat bhī dī hai.

³⁵us ne unheṅ wuh mahārat aur hikmat dī hai jo har kām ke lie darkār hai yānī kārīgarī ke har kām ke lie, kaṛhāī ke kām ke lie, nīle, arġhawānī aur qirmizī rang ke dhāge aur bārīk katān se kapṛā banāne ke lie aur bunāī ke kām ke lie. wuh māhir kārīgar haiṅ aur naqshe bhī banā sakte haiṅ.