Read Roman Urdu Geo ḳhurūj 36 Bible Online

ḳhurūj 36 - Roman Urdu Geo bible

ḳhurūj 36

¹lāzim hai ki bazlī'el, uhliyāb aur bāqī kārīgar jin ko rab ne maqdis kī tāmīr ke lie hikmat aur samajh dī hai sab kuchh ain un hidāyāt ke mutābiq banāeṅ jo rab ne dī haiṅ.”

²mūsā ne bazlī'el aur uhliyāb ko bulāyā. sāth hī us ne har us kārīgar ko bhī bulāyā jise rab ne maqdis kī tāmīr ke lie hikmat aur mahārat dī thī aur jo ḳhushī se ānā aur yih kām karnā chāhtā thā.

³unheṅ mūsā se tamām hadie mile jo isrāīlī maqdis kī tāmīr ke lie lāe the. is ke bād bhī log roz-ba-roz subh ke waqt hadie lāte rahe.

⁴āḳhirkār tamām kārīgar jo maqdis banāne ke kām meṅ lage the apnā kām chhoṛ kar mūsā ke pās āe.

⁵unhoṅ ne kahā, “log had se zyādā lā rahe haiṅ. jis kām kā hukm rab ne diyā hai us ke lie itne sāmān kī zarūrat nahīṅ hai.”

⁶tab mūsā ne pūrī ḳhaimāgāh meṅ elān karwā diyā ki koī mard yā aurat maqdis kī tāmīr ke lie ab kuchh na lāe. yūṅ unheṅ mazīd chīzeṅ lāne se rokā gayā,

⁷kyūṅki kām ke lie sāmān zarūrat se zyādā ho gayā thā.

⁸jo kārīgar mahārat rakhte the unhoṅ ne ḳhaime ko banāyā. unhoṅ ne bārīk katān aur nīle, arġhawānī aur qirmizī dhāge se das parde banāe. pardoṅ par kisī māhir kārīgar ke kaṛhāī ke kām se karūbī farishtoṅ kā ḍizāin banāyā gayā.

⁹har parde kī lambāī 42 fuṭ aur chauṛāī 6 fuṭ thī.

¹⁰pāṅch pardoṅ ke lambe hāshie ek dūsre ke sāth joṛe gae aur isī tarah bāqī pāṅch bhī. yūṅ do baṛe ṭukṛe ban gae.

¹¹donoṅ ṭukṛoṅ ko ek dūsre ke sāth milāne ke lie unhoṅ ne nīle dhāge ke halqe banāe. yih halqe har ṭukṛe ke 42 fuṭ wāle ek kināre par lagāe gae.

¹²ek ṭukṛe ke hāshie par 50 halqe aur dūsre par bhī utne hī halqe. in do hāshiyoṅ ke halqe ek dūsre ke āmne-sāmne the.

¹³phir bazlī'el ne sone kī 50 hukeṅ banā kar un se āmne-sāmne ke halqoṅ ko ek dūsre ke sāth milāyā. yūṅ donoṅ ṭukṛoṅ ke joṛne se ḳhaimā ban gayā.

¹⁴us ne bakrī ke bāloṅ se bhī 11 parde banāe jinheṅ kapṛe wāle ḳhaime ke ūpar rakhnā thā.

¹⁵har parde kī lambāī 45 fuṭ aur chauṛāī 6 fuṭ thī.

¹⁶pāṅch pardoṅ ke lambe hāshie ek dūsre ke sāth joṛe gae aur is tarah bāqī chhih bhī.

¹⁷in donoṅ ṭukṛoṅ ko milāne ke lie us ne har ṭukṛe ke 45 fuṭ wāle ek kināre par pachās pachās halqe lagāe.

¹⁸phir pītal kī 50 hukeṅ banā kar us ne donoṅ hisse milāe.

¹⁹ek dūsre ke ūpar ke donoṅ ḳhaimoṅ kī hifāzat ke lie bazlī'el ne do aur ġhilāf banāe. bakrī ke bāloṅ ke ḳhaime par rakhne ke lie us ne menḍhoṅ kī surḳh rangī huī khāleṅ joṛ dīṅ aur us ke ūpar rakhne ke lie taḳhas kī khāleṅ milāīṅ.

²⁰is ke bād us ne kīkar kī lakaṛī ke taḳhte banāe jo ḳhaime kī dīwāroṅ kā kām dete the.

²¹har taḳhte kī ūṅchāī 15 fuṭ thī aur chauṛāī sawā do fuṭ.

²²har taḳhte ke nīche do do chūleṅ thīṅ. in chūloṅ se har taḳhte ko us ke pāiyoṅ ke sāth joṛā jātā thā tāki taḳhtā khaṛā rahe.

²³ḳhaime kī junūbī dīwār ke lie 20 taḳhte banāe gae

²⁴aur sāth hī chāṅdī ke 40 pāe bhī jin par taḳhte khaṛe kie jāte the. har taḳhte ke nīche do pāe the, aur har pāe meṅ ek chūl lagtī thī.

²⁵isī tarah ḳhaime kī shimālī dīwār ke lie bhī 20 taḳhte banāe gae

²⁶aur sāth hī chāṅdī ke 40 pāe jo taḳhtoṅ ko khaṛā karne ke lie the. har taḳhte ke nīche do pāe the.

²⁷ḳhaime kī pichhlī yānī maġhribī dīwār ke lie chhih taḳhte banāe gae.

²⁸is dīwār ko shimālī aur junūbī dīwāroṅ ke sāth joṛne ke lie kone wāle do taḳhte banāe gae.

²⁹in do taḳhtoṅ meṅ nīche se le kar ūpar tak konā thā tāki ek se shimālī dīwār maġhribī dīwār ke sāth juṛ jāe aur dūsre se junūbī dīwār maġhribī dīwār ke sāth. in ke ūpar ke sire kaṛoṅ se mazbūt kie gae.

³⁰yūṅ pichhle yānī maġhribī taḳhtoṅ kī pūrī tādād 8 thī aur in ke lie chāṅdī ke pāiyoṅ kī tādād 16, har taḳhte ke nīche do pāe.

³¹phir bazlī'el ne kīkar kī lakaṛī ke shahtīr banāe, tīnoṅ dīwāroṅ ke lie pāṅch pāṅch shahtīr. wuh har dīwār ke taḳhtoṅ par yūṅ lagāne ke lie the ki un se taḳhte ek dūsre ke sāth milāe jāeṅ.

³³darmiyānī shahtīr yūṅ banāyā gayā ki wuh dīwār kī ādhī ūṅchāī par dīwār ke ek sire se dūsre sire tak lag saktā thā.

³⁴us ne tamām taḳhtoṅ aur shahtīroṅ par sonā chaṛhāyā. shahtīroṅ ko taḳhtoṅ ke sāth lagāne ke lie us ne sone ke kaṛe banāe jo taḳhtoṅ meṅ lagāne the.

³⁵ab bazlī'el ne ek aur pardā banāyā. us ke lie bhī bārīk katān aur nīle, arġhawānī aur qirmizī rang kā dhāgā istemāl huā. us par bhī kisī māhir kārīgar ke kaṛhāī ke kām se karūbī farishtoṅ kā ḍizāin banāyā gayā.

³⁶phir us ne parde ko laṭkāne ke lie kīkar kī lakaṛī ke chār satūn, sone kī hukeṅ aur chāṅdī ke chār pāe banāe. satūnoṅ par sonā chaṛhāyā gayā.

³⁷bazlī'el ne ḳhaime ke darwāze ke lie bhī pardā banāyā. wuh bhī bārīk katān aur nīle, arġhawānī aur qirmizī rang ke dhāge se banāyā gayā, aur us par kaṛhāī kā kām kiyā gayā.

³⁸is parde ko laṭkāne ke lie us ne sone kī hukeṅ aur kīkar kī lakaṛī ke pāṅch satūn banāe. satūnoṅ ke ūpar ke siroṅ aur paṭṭiyoṅ par sonā chaṛhāyā gayā jabki un ke pāe pītal ke the.