Read Roman Urdu Geo ḳhurūj 39 Bible Online

ḳhurūj 39 - Roman Urdu Geo bible

ḳhurūj 39

¹bazlī'el kī hidāyat par kārīgaroṅ ne nīle, arġhawānī aur qirmizī rang kā dhāgā le kar maqdis meṅ ḳhidmat ke lie libās banāe. unhoṅ ne hārūn ke muqaddas kapṛe un hidāyāt ke ain mutābiq banāe jo rab ne mūsā ko dī thīṅ.

²unhoṅ ne imām-e-āzam kā bālāposh banāne ke lie sonā, nīle, arġhawānī aur qirmizī rang kā dhāgā aur bārīk katān istemāl kiyā.

³unhoṅ ne sone ko kūṭ kūṭ kar warq banāyā aur phir use kāṭ kar dhāge banāe. jab nīle, arġhawānī aur qirmizī rang ke dhāge aur bārīk katān se kapṛā banāyā gayā to sone kā yih dhāgā mahārat se kaṛhāī ke kām meṅ istemāl huā.

⁴unhoṅ ne bālāposh ke lie do paṭṭiyāṅ banāīṅ aur unheṅ bālāposh ke kandhoṅ par rakh kar sāmne aur pīchhe se bālāposh ke sāth lagāīṅ.

⁵paṭkā bhī banāyā gayā jis se bālāposh ko bāndhā jātā thā. is ke lie bhī sonā, nīle, arġhawānī aur qirmizī rang kā dhāgā aur bārīk katān istemāl huā. yih un hidāyāt ke ain mutābiq huā jo rab ne mūsā ko dī thīṅ.

⁶phir unhoṅ ne aqīq-e-ahmar ke do patthar chun lie aur unheṅ sone ke ḳhānoṅ meṅ jaṛ kar un par isrāīl ke bārah beṭoṅ ke nām kandā kie. yih nām jauharoṅ par us tarah kandā kie gae jis tarah muhr kandā kī jātī hai.

⁷unhoṅ ne pattharoṅ ko bālāposh kī do paṭṭiyoṅ par yūṅ lagāyā ki wuh hārūn ke kandhoṅ par rab ko isrāīliyoṅ kī yād dilāte raheṅ. yih sab kuchh rab kī dī gaī hidāyāt ke ain mutābiq huā.

⁸is ke bād unhoṅ ne sīne kā kīsā banāyā. yih māhir kārīgar kā kām thā aur un hī chīzoṅ se banā jin se hārūn kā bālāposh bhī banā thā yānī sone aur nīle, arġhawānī aur qirmizī rang ke dhāge aur bārīk katān se.

⁹jab kapṛe ko ek dafā tah kiyā gayā to kīse kī lambāī aur chauṛāī nau nau inch thī.

¹⁰unhoṅ ne us par chār qatāroṅ meṅ jawāhir jaṛe. har qatār meṅ tīn tīn jauhar the. pahlī qatār meṅ lāl, zabarjad aur zumurrad.

¹¹dūsrī meṅ fīrozā, sang-e-lājaward aur hajr-ul-qamar.

¹²tīsrī meṅ zarqon, aqīq aur yāqūt-e-arġhawānī.

¹³chauthī meṅ pukhrāj, aqīq-e-ahmar aur yashab. har jauhar sone ke ḳhāne meṅ jaṛā huā thā.

¹⁴yih bārah jawāhir isrāīl ke bārah qabīloṅ kī numāindagī karte the. ek ek jauhar par ek qabīle kā nām kandā kiyā gayā, aur yih nām us tarah kandā kie gae jis tarah muhr kandā kī jātī hai.

¹⁵ab unhoṅ ne sīne ke kīse ke lie ḳhālis sone kī do zanjīreṅ banāīṅ jo ḍorī kī tarah gundhī huī thīṅ.

¹⁶sāth sāth unhoṅ ne sone ke do ḳhāne aur do kaṛe bhī banāe. unhoṅ ne yih kaṛe kīse ke ūpar ke do konoṅ par lagāe.

¹⁷phir donoṅ zanjīreṅ un do kaṛoṅ ke sāth lagāī gaīṅ.

¹⁸un ke dūsre sire bālāposh kī kandhoṅ wālī paṭṭiyoṅ ke do ḳhānoṅ ke sāth joṛ die gae. phir sāmne kī taraf lagāe gae.

¹⁹unhoṅ ne kīse ke nichle do konoṅ par bhī sone ke do kaṛe lagāe. wuh andar, bālāposh kī taraf lage the.

²⁰ab unhoṅ ne do aur kaṛe banā kar bālāposh kī kandhoṅ wālī paṭṭiyoṅ par lagāe. yih bhī sāmne kī taraf lage the lekin nīche, bālāposh ke paṭke ke ūpar hī.

²¹unhoṅ ne sīne ke kīse ke nichle kaṛe nīlī ḍorī se bālāposh ke in nichle kaṛoṅ ke sāth bāndhe. yūṅ kīsā paṭke ke ūpar achchhī tarah sīne ke sāth lagā rahā. yih un hidāyāt ke ain mutābiq huā jo rab ne mūsā ko dī thīṅ.

²²phir kārīgaroṅ ne choġhā bunā. wuh pūrī tarah nīle dhāge se banāyā gayā. choġhe ko bālāposh se pahle pahnanā thā.

²³us ke garebān ko bune hue kālar se mazbūt kiyā gayā tāki wuh na phaṭe.

²⁴unhoṅ ne nīle, arġhawānī aur qirmizī rang ke dhāge se anār banā kar unheṅ choġhe ke dāman meṅ lagā diyā.

²⁵un ke darmiyān ḳhālis sone kī ghanṭiyāṅ lagāī gaīṅ.

²⁶dāman meṅ anār aur ghanṭiyāṅ bārī bārī lagāī gaīṅ. lāzim thā ki hārūn ḳhidmat karne ke lie hameshā yih choġhā pahne. rab ne mūsā ko yihī hukm diyā thā.

²⁷kārīgaroṅ ne hārūn aur us ke beṭoṅ ke lie bārīk katān ke zerjāme banāe. yih bunane wāle kā kām thā.

²⁸sāth sāth unhoṅ ne bārīk katān kī pagaṛiyāṅ aur bārīk katān ke pājāme banāe.

²⁹kamarband ko bārīk katān aur nīle, arġhawānī aur qirmizī rang ke dhāge se banāyā gayā. kaṛhāī karne wāloṅ ne is par kām kiyā. sab kuchh un hidāyāt ke mutābiq banāyā gayā jo rab ne mūsā ko dī thīṅ.

³⁰unhoṅ ne muqaddas tāj yānī ḳhālis sone kī taḳhtī banāī aur us par yih alfāz kandā kie, ‘rab ke lie maḳhsūs-o-muqaddas.’

³¹phir unhoṅ ne ise nīlī ḍorī se pagaṛī ke sāmne wāle hisse se lagā diyā. yih bhī un hidāyāt ke mutābiq banāyā gayā jo rab ne mūsā ko dī thīṅ.

³²āḳhirkār maqdis kā kām mukammal huā. isrāīliyoṅ ne sab kuchh un hidāyāt ke mutābiq banāyā thā jo rab ne mūsā ko dī thīṅ.

³³wuh maqdis kī tamām chīzeṅ mūsā ke pās le āe yānī muqaddas ḳhaimā aur us kā sārā sāmān, us kī hukeṅ, dīwāroṅ ke taḳhte, shahtīr, satūn aur pāe,

³⁴ḳhaime par menḍhoṅ kī surḳh rangī huī khāloṅ kā ġhilāf aur taḳhas kī khāloṅ kā ġhilāf, muqaddastarīn kamre ke darwāze kā pardā,

³⁵ahd kā sandūq jis meṅ sharīat kī taḳhtiyāṅ rakhnī thīṅ, use uṭhāne kī lakaṛiyāṅ aur us kā ḍhaknā,

³⁶maḳhsūs roṭiyoṅ kī mez, us kā sārā sāmān aur roṭiyāṅ,

³⁷ḳhālis sone kā shamādān aur us par rakhne ke charāġh us ke sāre sāmān samet, shamādān ke lie tel,

³⁸baḳhūr jalāne kī sone kī qurbāngāh, masah kā tel, ḳhushbūdār baḳhūr, muqaddas ḳhaime ke darwāze kā pardā,

³⁹jānwaroṅ ko chaṛhāne kī pītal kī qurbāngāh, us kā pītal kā janglā, use uṭhāne kī lakaṛiyāṅ aur bāqī sārā sāmān, dhone kā hauz aur wuh ḍhāṅchā jis par hauz rakhnā thā,

⁴⁰chārdīwārī ke parde un ke khamboṅ aur pāiyoṅ samet, sahan ke darwāze kā pardā, chārdīwārī ke rasse aur meḳheṅ, mulāqāt ke ḳhaime meṅ ḳhidmat karne kā bāqī sārā sāmān

⁴¹aur maqdis meṅ ḳhidmat karne ke wuh muqaddas libās jo hārūn aur us ke beṭoṅ ko pahnane the.

⁴²sab kuchh un hidāyāt ke mutābiq banāyā gayā thā jo rab ne mūsā ko dī thīṅ.

⁴³mūsā ne tamām chīzoṅ kā muāinā kiyā aur mālūm kiyā ki unhoṅ ne sab kuchh rab kī hidāyāt ke mutābiq banāyā thā. tab us ne unheṅ barkat dī.