Read Roman Urdu Geo ḳhurūj 40 Bible Online

ḳhurūj 40 - Roman Urdu Geo bible

ḳhurūj 40

¹phir rab ne mūsā se kahā,

²“pahle mahīne kī pahlī tārīḳh ko mulāqāt kā ḳhaimā khaṛā karnā.

³ahd kā sandūq jis meṅ sharīat kī taḳhtiyāṅ haiṅ muqaddastarīn kamre meṅ rakh kar us ke darwāze kā pardā lagānā.

⁴is ke bād maḳhsūs roṭiyoṅ kī mez muqaddas kamre meṅ lā kar us par tamām zarūrī sāmān rakhnā. us kamre meṅ shamādān bhī le ānā aur us par us ke charāġh rakhnā.

⁵baḳhūr kī sone kī qurbāngāh us parde ke sāmne rakhnā jis ke pīchhe ahd kā sandūq hai. phir ḳhaime meṅ dāḳhil hone ke darwāze par pardā lagānā.

⁶jānwaroṅ ko chaṛhāne kī qurbāngāh sahan meṅ ḳhaime ke darwāze ke sāmne rakhī jāe.

⁷ḳhaime aur is qurbāngāh ke darmiyān dhone kā hauz rakh kar us meṅ pānī ḍālnā.

⁸sahan kī chārdīwārī khaṛī karke us ke darwāze kā pardā lagānā.

⁹phir masah kā tel le kar use ḳhaime aur us ke sāre sāmān par chhiṛak denā. yūṅ tū use mere lie maḳhsūs karegā aur wuh muqaddas hogā.

¹⁰phir jānwaroṅ ko chaṛhāne kī qurbāngāh aur us ke sāmān par masah kā tel chhiṛaknā. yūṅ tū use mere lie maḳhsūs karegā aur wuh nihāyat muqaddas hogā.

¹¹isī tarah hauz aur us ḍhāṅche ko bhī maḳhsūs karnā jis par hauz rakhā gayā hai.

¹²hārūn aur us ke beṭoṅ ko mulāqāt ke ḳhaime ke darwāze par lā kar ġhusl karānā.

¹³phir hārūn ko muqaddas libās pahnānā aur use masah karke mere lie maḳhsūs-o-muqaddas karnā tāki imām ke taur par merī ḳhidmat kare.

¹⁴us ke beṭoṅ ko lā kar unheṅ zerjāme pahnā denā.

¹⁵unheṅ un ke wālid kī tarah masah karnā tāki wuh bhī imāmoṅ ke taur par merī ḳhidmat kareṅ. jab unheṅ masah kiyā jāegā to wuh aur bād meṅ un kī aulād hameshā tak maqdis meṅ is ḳhidmat ke lie maḳhsūs hoṅge.”

¹⁶mūsā ne sab kuchh rab kī hidāyāt ke mutābiq kiyā.

¹⁷pahle mahīne kī pahlī tārīḳh ko muqaddas ḳhaimā khaṛā kiyā gayā. unheṅ misr se nikle pūrā ek sāl ho gayā thā.

¹⁸mūsā ne dīwār ke taḳhtoṅ ko un ke pāiyoṅ par khaṛā karke un ke sāth shahtīr lagāe. isī tarah us ne satūnoṅ ko bhī khaṛā kiyā.

¹⁹us ne rab kī hidāyāt ke ain mutābiq dīwāroṅ par kapṛe kā ḳhaimā lagāyā aur us par dūsre ġhilāf rakhe.

²⁰us ne sharīat kī donoṅ taḳhtiyāṅ le kar ahd ke sandūq meṅ rakh dīṅ, uṭhāne ke lie lakaṛiyāṅ sandūq ke kaṛoṅ meṅ ḍāl dīṅ aur kaffāre kā ḍhaknā us par lagā diyā.

²¹phir us ne rab kī hidāyāt ke ain mutābiq sandūq ko muqaddastarīn kamre meṅ rakh kar us ke darwāze kā pardā lagā diyā. yūṅ ahd ke sandūq par pardā paṛā rahā.

²²mūsā ne maḳhsūs roṭiyoṅ kī mez muqaddas kamre ke shimālī hisse meṅ us parde ke sāmne rakh dī jis ke pīchhe ahd kā sandūq thā.

²³us ne rab kī hidāyat ke ain mutābiq rab ke lie maḳhsūs kī huī roṭiyāṅ mez par rakhīṅ.

²⁴usī kamre ke junūbī hisse meṅ us ne shamādān ko mez ke muqābil rakh diyā.

²⁵us par us ne rab kī hidāyat ke ain mutābiq rab ke sāmne charāġh rakh die.

²⁶us ne baḳhūr kī sone kī qurbāngāh bhī usī kamre meṅ rakhī, us parde ke bilkul sāmne jis ke pīchhe ahd kā sandūq thā.

²⁷us ne us par rab kī hidāyat ke ain mutābiq ḳhushbūdār baḳhūr jalāyā.

²⁸phir us ne ḳhaime kā darwāzā lagā diyā.

²⁹bāhar jā kar us ne jānwaroṅ ko chaṛhāne kī qurbāngāh ḳhaime ke darwāze ke sāmne rakh dī. us par us ne rab kī hidāyat ke ain mutābiq bhasm hone wālī qurbāniyāṅ aur ġhallā kī nazareṅ chaṛhāīṅ.

³⁰us ne dhone ke hauz ko ḳhaime aur us qurbāngāh ke darmiyān rakh kar us meṅ pānī ḍāl diyā.

³¹mūsā, hārūn aur us ke beṭe use apne hāth-pāoṅ dhone ke lie istemāl karte the.

³²jab bhī wuh mulāqāt ke ḳhaime meṅ dāḳhil hote yā jānwaroṅ ko chaṛhāne kī qurbāngāh ke pās āte to rab kī hidāyat ke ain mutābiq pahle ġhusl karte.

³³āḳhir meṅ mūsā ne ḳhaimā, qurbāngāh aur chārdīwārī khaṛī karke sahan ke darwāze kā pardā lagā diyā. yūṅ mūsā ne maqdis kī tāmīr mukammal kī.

³⁴phir mulāqāt ke ḳhaime par bādal chhā gayā aur maqdis rab ke jalāl se bhar gayā.

³⁵mūsā ḳhaime meṅ dāḳhil na ho sakā, kyūṅki bādal us par ṭhahrā huā thā aur maqdis rab ke jalāl se bhar gayā thā.

³⁶tamām safar ke daurān jab bhī maqdis ke ūpar se bādal uṭhtā to isrāīlī safar ke lie tayyār ho jāte.

³⁷agar wuh na uṭhtā to wuh us waqt tak ṭhahre rahte jab tak bādal uṭh na jātā.

³⁸din ke waqt bādal maqdis ke ūpar ṭhahrā rahtā aur rāt ke waqt wuh tamām isrāīliyoṅ ko āg kī sūrat meṅ nazar ātā thā. yih silsilā pūre safar ke daurān jārī rahā.