Read Roman Urdu Geo ḳhurūj 6 Bible Online

ḳhurūj 6 - Roman Urdu Geo bible

ḳhurūj 6

¹rab ne jawāb diyā, “ab tū dekhegā ki maiṅ fir'aun ke sāth kyā kuchh kartā hūṅ. merī azīm qudrat kā tajribā karke wuh mere logoṅ ko jāne degā balki unheṅ jāne par majbūr karegā.”

²allāh ne mūsā se yih bhī kahā, “maiṅ rab hūṅ.

³maiṅ ibrāhīm, is'hāq aur yāqūb par zāhir huā. wuh mere nām allāh qādir-e-mutlaq [1] se wāqif hue, lekin maiṅ ne un par apne nām rab [2] kā inkishāf nahīṅ kiyā.

⁴maiṅ ne un se ahd karke wādā kiyā ki unheṅ mulk-e-kan'ān dūṅgā jis meṅ wuh ajnabī ke taur par rahte the.

⁵ab maiṅ ne sunā hai ki isrāīlī kis tarah misriyoṅ kī ġhulāmī meṅ karāh rahe haiṅ, aur maiṅ ne apnā ahd yād kiyā hai.

⁶chunāṅche isrāīliyoṅ ko batānā, ‘maiṅ rab hūṅ. maiṅ tumheṅ misriyoṅ ke jūe se āzād karūṅga aur un kī ġhulāmī se bachāūṅgā. maiṅ baṛī qudrat ke sāth tumheṅ chhuṛāūṅgā aur un kī adālat karūṅga.

⁷maiṅ tumheṅ apnī qaum banāūṅgā aur tumhārā ḳhudā hūṅgā. tab tum jān loge ki maiṅ rab tumhārā ḳhudā hūṅ jis ne tumheṅ misriyoṅ ke jūe se āzād kar diyā hai.

⁸maiṅ tumheṅ us mulk meṅ le jāūṅgā jis kā wādā maiṅ ne qasam khā kar ibrāhīm, is'hāq aur yāqūb se kiyā hai. wuh mulk tumhārī apnī milkiyat hogā. maiṅ rab hūṅ’.”

⁹mūsā ne yih sab kuchh isrāīliyoṅ ko batā diyā, lekin unhoṅ ne us kī bāt na mānī, kyūṅki wuh saḳht kām ke bāis himmat hār gae the.

¹⁰tab rab ne mūsā se kahā,

¹¹“jā, misr ke bādshāh fir'aun ko batā denā ki isrāīliyoṅ ko apne mulk se jāne de.”

¹²lekin mūsā ne etirāz kiyā, “isrāīlī merī bāt sunanā nahīṅ chāhte to fir'aun kyūṅ merī bāt māne jabki maiṅ ruk ruk kar boltā hūṅ?”

¹³lekin rab ne mūsā aur hārūn ko hukm diyā, “isrāīliyoṅ aur misr ke bādshāh fir'aun se bāt karke isrāīliyoṅ ko misr se nikālo.”

¹⁴isrāīl ke ābāī gharānoṅ ke sarbarāh yih the: isrāīl ke pahlauṭhe rūbin ke chār beṭe hanūk, fallū, hasron aur karmī the. in se rūbin kī chār shāḳheṅ niklīṅ.

¹⁵shamāūn ke pāṅch beṭe yamūel, yamīn, uhad, yakīn, suhar aur sāūl the. (sāūl kan'ānī aurat kā bachchā thā). in se shamāūn kī pāṅch shāḳheṅ niklīṅ.

¹⁶lāwī ke tīn beṭe jairson, qihāt aur mirārī the. (lāwī 137 sāl kī umr meṅ faut huā).

¹⁷jairson ke do beṭe libnī aur simaī the. in se jairson kī do shāḳheṅ niklīṅ.

¹⁸qihāt ke chār beṭe amrām, izhār, habrūn aur uzzī'el the. (qihāt 133 sāl kī umr meṅ faut huā).

¹⁹mirārī ke do beṭe mahlī aur mūshī the. in sab se lāwī kī muḳhtalif shāḳheṅ niklīṅ.

²⁰amrām ne apnī phūphī yūkabid se shādī kī. un ke do beṭe hārūn aur mūsā paidā hue. (amrām 137 sāl kī umr meṅ faut huā).

²¹izhār ke tīn beṭe qorah, nafaj aur zikrī the.

²²uzzī'el ke tīn beṭe mīsāel, ilsafan aur sitrī the.

²³hārūn ne ilīsibā se shādī kī. (ilīsibā ammīnadāb kī beṭī aur nahson kī bahan thī). un ke chār beṭe nadab, abīhū, ilīazar aur itamar the.

²⁴qorah ke tīn beṭe assīr, ilqānā aur abiyāsaf the. un se qorahiyoṅ kī tīn shāḳheṅ niklīṅ.

²⁵hārūn ke beṭe ilīazar ne fūtī'el kī ek beṭī se shādī kī. un kā ek beṭā fīnhās thā. yih sab lāwī ke ābāī gharānoṅ ke sarbarāh the.

²⁶rab ne amrām ke do beṭoṅ hārūn aur mūsā ko hukm diyā ki merī qaum ko us ke ḳhāndānoṅ kī tartīb ke mutābiq misr se nikālo.

²⁷in hī do ādmiyoṅ ne misr ke bādshāh fir'aun se bāt kī ki isrāīliyoṅ ko misr se jāne de.

²⁸misr meṅ rab ne mūsā se kahā,

²⁹“maiṅ rab hūṅ. misr ke bādshāh ko wuh sab kuchh batā denā jo maiṅ tujhe batātā hūṅ.”

³⁰mūsā ne etirāz kiyā, “maiṅ to ruk ruk kar boltā hūṅ. fir'aun kis tarah merī bāt mānegā.”