Read Roman Urdu Geo ḳhurūj 7 Bible Online

ḳhurūj 7 - Roman Urdu Geo bible

ḳhurūj 7

¹lekin rab ne kahā, “dekh, mere kahne par tū fir'aun ke lie allāh kī haisiyat rakhegā aur terā bhāī hārūn terā paiġhambar hogā.

²jo bhī hukm maiṅ tujhe dūṅgā use tū hārūn ko batā de. phir wuh sab kuchh fir'aun ko batāe tāki wuh isrāīliyoṅ ko apne mulk se jāne de.

³lekin maiṅ fir'aun ko aṛ jāne dūṅgā. agarche maiṅ misr meṅ bahut se nishānoṅ aur mojizoṅ se apnī qudrat kā muzāharā karūṅga

⁴to bhī fir'aun tumhārī nahīṅ sunegā. tab misriyoṅ par merā hāth bhārī ho jāegā, aur maiṅ un ko saḳht sazā de kar apnī qaum isrāīl ko ḳhāndānoṅ kī tartīb ke mutābiq misr se nikāl lāūṅgā.

⁵jab maiṅ misr ke ḳhilāf apnī qudrat kā izhār karke isrāīliyoṅ ko wahāṅ se nikālūṅgā to misrī jān leṅge ki maiṅ rab hūṅ.”

⁶mūsā aur hārūn ne sab kuchh waisā hī kiyā jaisā rab ne unheṅ hukm diyā.

⁷fir'aun se bāt karte waqt mūsā 80 sāl kā aur hārūn 83 sāl kā thā.

⁸rab ne mūsā aur hārūn se kahā,

⁹“jab fir'aun tumheṅ mojizā dikhāne ko kahegā to mūsā hārūn se kahe ki apnī lāṭhī zamīn par ḍāl de. is par wuh sāṅp ban jāegī.”

¹⁰mūsā aur hārūn ne fir'aun ke pās jā kar aisā hī kiyā. hārūn ne apnī lāṭhī fir'aun aur us ke uhdedāroṅ ke sāmne ḍāl dī to wuh sāṅp ban gaī.

¹¹yih dekh kar fir'aun ne apne ālimoṅ aur jādūgaroṅ ko bulāyā. jādūgaroṅ ne bhī apne jādū se aisā hī kiyā.

¹²har ek ne apnī lāṭhī zamīn par phaiṅkī to wuh sāṅp ban gaī. lekin hārūn kī lāṭhī ne un kī lāṭhiyoṅ ko nigal liyā.

¹³tāham fir'aun is se muta'assir na huā. us ne mūsā aur hārūn kī bāt sunane se inkār kiyā. waisā hī huā jaisā rab ne kahā thā.

¹⁴phir rab ne mūsā se kahā, “fir'aun aṛ gayā hai. wuh merī qaum ko misr chhoṛne se roktā hai.

¹⁵kal subhsawere jab wuh daryā-e-nīl par āegā to us se milne ke lie daryā ke kināre par khaṛe ho jānā. us lāṭhī ko thāme rakhnā jo sāṅp ban gaī thī.

¹⁶jab wuh wahāṅ pahuṅche to us se kahnā, ‘rab ibrāniyoṅ ke ḳhudā ne mujhe āp ko yih batāne ke lie bhejā hai ki merī qaum ko merī ibādat karne ke lie registān meṅ jāne de. lekin āp ne abhī tak us kī nahīṅ sunī.

¹⁷chunāṅche ab āp jān leṅge ki wuh rab hai. maiṅ is lāṭhī ko jo mere hāth meṅ hai le kar daryā-e-nīl ke pānī ko mārūṅga. phir wuh ḳhūn meṅ badal jāegā.

¹⁸daryā-e-nīl kī machhliyāṅ mar jāeṅgī, daryā se badbū uṭhegī aur misrī daryā kā pānī nahīṅ pī sakeṅge’.”

¹⁹rab ne mūsā se kahā, “hārūn ko batā denā ki wuh apnī lāṭhī le kar apnā hāth un tamām jaghoṅ kī taraf baṛhāe jahāṅ pānī jamā hotā hai. tab misr kī tamām nadiyoṅ, nahroṅ, johaṛoṅ aur tālāboṅ kā pānī ḳhūn meṅ badal jāegā. pūre mulk meṅ ḳhūn hī ḳhūn hogā, yahāṅ tak ki lakaṛī aur patthar ke bartanoṅ kā pānī bhī ḳhūn meṅ badal jāegā.”

²⁰chunāṅche mūsā aur hārūn ne fir'aun aur us ke uhdedāroṅ ke sāmne apnī lāṭhī uṭhā kar daryā-e-nīl ke pānī par mārī. is par daryā kā sārā pānī ḳhūn meṅ badal gayā.

²¹daryā kī machhliyāṅ mar gaīṅ, aur us se itnī badbū uṭhne lagī ki misrī us kā pānī na pī sake. misr meṅ chāroṅ taraf ḳhūn hī ḳhūn thā.

²²lekin jādūgaroṅ ne bhī apne jādū ke zarī'e aisā hī kiyā. is lie fir'aun aṛ gayā aur mūsā aur hārūn kī bāt na mānī. waisā hī huā jaisā rab ne kahā thā.

²³fir'aun palaṭ kar apne ghar wāpas chalā gayā. use us kī parwā nahīṅ thī jo mūsā aur hārūn ne kiyā thā.

²⁴lekin misrī daryā se pānī na pī sake, aur unhoṅ ne pīne kā pānī hāsil karne ke lie daryā ke kināre kināre gaṛhe khode.

²⁵pānī ke badal jāne ke bād sāt din guzar gae.