Read Roman Urdu Geo ayyūb 10 Bible Online

ayyūb 10 - Roman Urdu Geo bible

ayyūb 10

¹mujhe apnī jān se ghin ātī hai. maiṅ āzādī se āh-o-zārī karūṅga, khule taur par apnā dilī ġham bayān karūṅga.

²maiṅ allāh se kahūṅgā ki mujhe mujrim na ṭhahrā balki batā ki terā mujh par kyā ilzām hai.

³kyā tū zulm karke mujhe radd karne meṅ ḳhushī mahsūs kartā hai hālāṅki tere apne hī hāthoṅ ne mujhe banāyā? sāth sāth tū bedīnoṅ ke mansūboṅ par apnī manzūrī kā nūr chamkātā hai. kyā yih tujhe achchhā lagtā hai?

⁴kyā terī āṅkheṅ insānī haiṅ? kyā tū sirf insān kī sī nazar se deḳhtā hai?

⁵kyā tere din aur sāl fānī insān jaise mahdūd haiṅ? hargiz nahīṅ!

⁶to phir kyā zarūrat hai ki tū mere qusūr kī talāsh aur mere gunāh kī tahqīq kartā rahe?

⁷tū to jāntā hai ki maiṅ bequsūr hūṅ aur ki tere hāth se koī bachā nahīṅ saktā.

⁸tere apne hāthoṅ ne mujhe tashkīl de kar banāyā. aur ab tū ne muṛ kar mujhe tabāh kar diyā hai.

⁹zarā is kā ḳhayāl rakh ki tū ne mujhe miṭṭī se banāyā. ab tū mujhe dubārā ḳhāk meṅ tabdīl kar rahā hai.

¹⁰tū ne ḳhud mujhe dūdh kī tarah unḍel kar panīr kī tarah jamne diyā.

¹¹tū hī ne mujhe jild aur gosht-post se mulabbas kiyā, haḍḍiyoṅ aur nasoṅ se tayyār kiyā.

¹²tū hī ne mujhe zindagī aur apnī mehrbānī se nawāzā, aur terī dekh-bhāl ne merī rūh ko mahfūz rakhā.

¹³lekin ek bāt tū ne apne dil meṅ chhupāe rakhī, hāṅ mujhe terā irādā mālūm ho gayā hai.

¹⁴wuh yih hai ki ‘agar ayyūb gunāh kare to maiṅ us kī pahrādārī karūṅga. maiṅ use us ke qusūr se barī nahīṅ karūṅga.’

¹⁵agar maiṅ qusūrwār hūṅ to mujh par afsos! aur agar maiṅ begunāh bhī hūṅ tāham maiṅ apnā sar uṭhāne kī jur'at nahīṅ kartā, kyūṅki maiṅ sharm khā khā kar ser ho gayā hūṅ. mujhe ḳhūb musībat pilāī gaī hai.

¹⁶aur agar maiṅ khaṛā bhī ho jāūṅ to tū sherbabar kī tarah merā shikār kartā aur mujh par dubārā apnī mojizānā qudrat kā izhār kartā hai.

¹⁷tū mere ḳhilāf nae gawāhoṅ ko khaṛā kartā aur mujh par apne ġhazab meṅ izāfā kartā hai, tere lashkar saf-dar-saf mujh par hamlā karte haiṅ.

¹⁸tū mujhe merī māṅ ke peṭ se kyūṅ nikāl lāyā? behtar hotā ki maiṅ usī waqt mar jātā aur kisī ko nazar na ātā.

¹⁹yūṅ hotā jaisā maiṅ kabhī zindā hī na thā, mujhe sīdhā māṅ ke peṭ se qabr meṅ pahuṅchāyā jātā.

²⁰kyā mere din thoṛe nahīṅ haiṅ? mujhe tanhā chhoṛ! mujh se apnā muṅh pher le tāki maiṅ chand ek lamhoṅ ke lie ḳhush ho sakūṅ,

²¹kyūṅki jald hī mujhe kūch karke wahāṅ jānā hai jahāṅ se koī wāpas nahīṅ ātā, us mulk meṅ jis meṅ tārīkī aur ghane sāy rahte haiṅ.

²²wuh mulk andherā hī andherā aur kālā hī kālā hai, us meṅ ghane sāy aur betartībī hai. wahāṅ raushnī bhī andherā hī hai.”